ఏపీలో రైతులకు ముఖ్య గమనిక.. రేపే ఆఖరి తేదీ

ఆంధ్రప్రదేశ్ రైతులకు ముఖ్య గమనిక. రైతన్నలకు అండగా ఉండేందుకు ఏపీ ప్రభుత్వం అన్నదాత సుఖీభవ పథకం అమలు చేస్తున్న సంగతి తెలిసిందే. అన్నదాత సుఖీభవ పీఎం కిసాన్ యోజన కింద ఇప్పటికే అర్హులైన రైతులకు తొలివిడతగా రూ.7000 సాయం కూడా అందించారు. అన్నదాత సుఖీభవ కింద రాష్ట్ర ప్రభుత్వం ఐదు వేల రూపాయలు అందించగా.. కేంద్ర ప్రభుత్వం పీఎం కిసాన్ యోజన కింద రూ.2000 అందించింది. దీంతో తొలివిడతలో అర్హులైన ఒక్కొక్క రైతు రూ.7000 లబ్ధి పొందారు.. అయితే సాంకేతిక కారణాలతో కొంతమంది రైతులకు అన్నదాత సుఖీభవ పథకం డబ్బులు అందలేదు.

అలాంటి రైతులు అన్నదాత సుఖీభవ పథకం కోసం మరోసారి దరఖాస్తు చేసుకునేందుకు ప్రభుత్వం అవకాశం కల్పించింది. ఆగస్ట్ 25వ తేదీ వరకూ అన్నదాత సుఖీభవ పథకం కోసం దరఖాస్తు చేసుకునేందుకు సమయం ఇచ్చింది. అయితే ఈ గడువు రేపటితో ముగియనుండటంతో అర్హులై ఉండి అన్నదాత సుఖీభవ సాయం అందని రైతులు త్వరపడాలని వ్యవసాయ శాఖ అధికారులు కోరుతున్నారు. అలాగే ఏ కారణంతో అన్నదాత సుఖీభవ సాయం అందలేదనేదీ రైతులకు తెలియజేస్తున్నారు.

అన్నదాత సుఖీభవ డబ్బులు రాకపోవటానికి పలు కారణాలను అధికారులు చెప్తున్నారు. లబ్ధిదారుల్లో కొంతమంది చనిపోయి ఉండటం, అలాగే రైతుల బ్యాంక్ ఖాతాలకు ఎన్‌పీసీఐ మ్యాపింగ్ లేకపోవటం, ఆధార్ సీడింగ్ నమోదు చేయించుకోకపోవటం, ఈ కేవైసీ పెండింగ్ కారణాలతో సాయం అంది ఉండకపోవచ్చని చెప్తున్నారు. అలాగే భూముల క్రయవిక్రయాలు, పెళ్లిళ్ల సమయంలో పొలం కట్నంగా అందించడం, భూమి బదలాయింపు వంటివి కూడా కారణం కావచ్చని చెప్తున్నారు. అలాంటి వారి పేర్లు పెండింగ్ జాబితాలో ఉన్నాయని.. ఆయా రైతులు తమ సమస్యలను పరిష్కరించుకుంటే అన్నదాత సుఖీభవ పథకం సాయం అందుతుందని వివరిస్తున్నారు. దరఖాస్తు చేసుకునేందుకు రేపే (ఆగస్ట్ 25) ఆఖరి రోజని.. అర్హులైన రైతులు త్వరపడాలని సూచిస్తున్నారు.

మరోవైపు కేంద్ర ప్రభుత్వం పథకమైన పీఎం కిసాన్ యోజనతో కలిసి అన్నదాత సుఖీభవ పథకం అమలు చేస్తున్న సంగతి తెలిసిందే. కేంద్రం వాటాగా రూ.6000తో పాటుగా రాష్ట్ర ప్రభుత్వం రూ.14000 కలిపి ఏటా రూ.20000లను మూడు విడతల్లో రైతులకు అందించనుంది. ఒక విడతలో రూ.7000, రెండో విడతలో రూ.7000, మూడో విడతలో రూ.6000 చొప్పున అందించనున్నారు. ఈ క్రమంలోనే ఆగస్ట్ నాలుగో తేదీన అన్నదాతు సుఖీభవ తొలి విడత నిధులను 47 లక్షల మంది రైతుల బ్యాంక్ ఖాతాల్లోకి జమ చేశారు.