లలిత్ మోదీ సెటైర్లు వీడియో.. భారత్‌కు తీసుకొచ్చి శిక్షిస్తామన్న కేంద్రం

లలిత్ మోదీ , విజయ్ మాల్యా వంటి పరారీలో ఉన్న నేరస్థులను స్వదేశానికి తీసుకొచ్చి, చట్ట ప్రకారం శిక్ష పడేలా చేస్తామని కేంద్ర ప్రభుత్వం స్పష్టం చేసింది. లలిత్ మోదీ, విజయ్ మాల్యాలు ‘మేము భారత్ నుంచి పరారైన అతిపెద్ద నేరస్థులం’ అని కేంద్ర ప్రభుత్వాన్ని ఎగతాళి చేస్తూ ఇన్‌స్టాగ్రామ్‌లో పోస్ట్ చేసిన వీడియో సామాజిక మాధ్యమాల్లో వైరల్ అయిన సంగతి తెలిసిందే. యూకే నుంచి భారతదేశానికి అప్పగించే ప్రక్రియపై విమర్శలు వెల్లువెత్తుతున్నాయి. ఆ వీడియోకు ప్రతిస్పందనగా కేంద్రం నుంచి ఈ ప్రకటన వెలువడింది.

లలిత్ మోదీ 2010లో పన్ను ఎగవేత, మనీలాండరింగ్ ఆరోపణలతో భారతదేశం విడిచివెళ్లారు. 2019లో ఆయనను ‘పరారీ ఆర్థిక నేరస్థుడు’గా ప్రకటించారు. కింగ్‌ఫిషర్ ఎయిర్‌లైన్స్ మాజీ ప్రమోటర్ విజయ్ మాల్యా , 2016లో అప్పుల ఎగవేత ఆరోపణలతో దేశం విడిచి పారిపోయారు. ఆయనను కూడా 2019లో పరారీలో ఉన్న ఆర్థిక నేరస్థుడిగా ప్రకటించగా.. వీరిద్దరూ ప్రస్తుతం యూకేలో దర్జాగా తిరుగుతున్నారు.

శుక్రవారం నిర్వహించిన మీడియా సమావేశంలో లలిత్ మోదీ, విజయ్ మాల్యా వీడియోపై విలేకర్లు అడిగిన ప్రశ్నకు విదేశాంగ శాఖ అధికార ప్రతినిధి రణధీర్ జైస్వాల్ సమాధానం ఇచ్చారు. ఆయన మాట్లాడుతూ.. ‘భారతదేశంలొ చట్టాల నుంచి తప్పించుకుని, పరారీలో ఉన్న వ్యక్తులందరినీ దేశానికి తిరిగి తీసుకురావడానికి మేము పూర్తిగా కట్టుబడి ఉన్నాం... ఈ విషయంలో మేము అనేక ప్రభుత్వాలతో చర్చలు జరుపుతున్నాం.. ఇందుకు సంబంధించిన ప్రక్రియలు కొనసాగుతున్నాయి. ఈ కేసులలో అనేక చట్టపరమైన అంశాలు ఉన్నాయి, కానీ వారిని ఇక్కడ కోర్టులలో విచారణకు హాజరుపరచడానికి మేము వారిని తిరిగి తీసుకొచ్చేందుకు కట్టుబడి ఉన్నాం’ అని తెలిపారు.

లండన్‌లో విజయ్ మాల్యా తన పుట్టిన రోజు వేడుకలు చేసుకున్నారు. ఈ వేడుకలకు హాజరైన లలిత్ మోదీ.. విజయ్ మాల్యాతో కలిసి వీడియో రికార్డు చేశారు. ఈ వీడియోను ఇన్‌స్టాగ్రామ్‌లో షేర్ చేస్తూ.. ‘మేము భారత్ నుంచి పరారైన అతిపెద్ద నేరస్థులం.. ఈ వీడియో చూసి అసూయతో మీ గుండెలు మండిపోనివ్వండి’ అంటూ క్యాప్షన్ పెట్టారు.