పెళ్లయిన 58 ఏళ్లకు విడాకుల కావాలంటూ కోర్టు మెట్లెక్కిన వృద్ధ జంట

వివాహ బంధం అనేది కేవలం ఇద్దరు వ్యక్తుల మధ్య బంధం మాత్రమే కాదని.. అది దశాబ్దాల కాలం పాటు సాగే ఒక సామాజిక వ్యవస్థ అని రాజస్థాన్ హైకోర్టు పునరుద్ఘాటించింది. దాదాపు 58 ఏళ్ల క్రితం పెళ్లయిన ఒక వృద్ధ దంపతులు విడాకులు కోరుతూ దాఖలు చేసిన పిటిషన్‌ను విచారించిన ధర్మాసనం.. చిన్నపాటి విభేదాలు, ఆస్తి తగాదాలను క్రూరత్వంగా పరిగణించలేమని స్పష్టం చేస్తూ విడాకులు ఇచ్చేందుకు నిరాకరించింది.

అర శతాబ్దపు బంధంలో చిచ్చు..

ఈ దంపతులకు 1967 జూన్ 29వ తేదీన వివాహం జరిగింది. దాదాపు 46 ఏళ్ల పాటు అంటే 2013 వరకు ఎలాంటి ఫిర్యాదులు లేకుండా వీరు అన్యోన్యంగానే జీవించారు. అయితే 2014లో వీరి మధ్య విభేదాలు మొదలు అయ్యాయి. ముఖ్యంగా తమకున్న స్థిరాస్తిని పెద్ద కొడుకు పేరు మీద రాయాలని భార్య కోరుతుండగా.. ఇద్దరు కొడుకులకు సమానంగా పంచాలని భర్త పట్టుబట్టారు. ఈ ఆస్తి వివాదమే చినికి చినికి గాలివానలా మారి ఒకరిపై ఒకరు అక్రమ సంబంధాల ఆరోపణలు చేసుకునే వరకు వెళ్లింది.

ఈక్రమంలోనే తన భార్య తనపై తప్పుడు వరకట్న వేధింపుల కేసు పెట్టిందని.. అది తనను అవమానించడమేనని భర్త కోర్టుకెక్కారు. తనకు విడాకులు ఇప్పించాలని పట్టుబట్టారు. కానీ భరత్‌పూర్ ఫ్యామిలీ కోర్టు అతని విడాకుల విన్నపాన్ని తోసిపుచ్చడంతో.. ఆయన హైకోర్టును ఆశ్రయించారు. ఈక్రమంలోనే విచారణ జరిపిన న్యాయస్థానం.. మొదట భార్య తనపై కక్షతో తప్పుడు ఎఫ్ఐఆర్ నమోదు చేసిందని భర్త వాదించాడు. మరోవైపు భార్య.. తన భర్త తనను నిర్లక్ష్యం చేస్తున్నాడని, కుటుంబ ఆస్తిని వృథా చేస్తున్నాడని ఆరోపించింది.

ఓర్పు పెరగాలి: కోర్టు కీలక వ్యాఖ్యలు

ఉభయ పక్షాల వాదనలు విన్న హైకోర్టు డివిజన్ బెంచ్.. విడాకుల అప్పీల్‌ను కొట్టివేస్తూ కొన్ని కీలక వ్యాఖ్యలు చేసింది. దంపతుల మధ్య వచ్చే చిన్నపాటి ఒడిదుడుకులు, వాదోపవాదాలు సహజమని.. వాటిని చట్టపరమైన క్రూరత్వంగా పరిగణించి విడాకులు ఇవ్వలేమని తెలిపింది. దాదాపు ఐదు దశాబ్దాలకు పైగా కలిసి ఉన్న దంపతులలో మానసిక సహనం, ఒకరిపై ఒకరికి అవగాహన వయసుతో పాటు పెరగాలి కానీ తగ్గకూడదని హితవు పలికింది. ఈ వయసులో విడాకులు మంజూరు చేస్తే అది కేవలం భార్యకే కాకుండా.. మొత్తం కుటుంబ గౌరవానికి భంగం కలిగిస్తుందని, వారి సామాజిక ప్రతిష్ట దెబ్బతింటుందని కోర్టు అభిప్రాయపడింది. ఆస్తి వివాదాలు కుటుంబ సమస్యలకు దారి తీయవచ్చు కానీ అవి వివాహ బంధాన్ని రద్దు చేయడానికి తగిన కారణాలు కావని ధర్మాసనం స్పష్టం చేసింది.