బ్రహ్మపుత్ర నది కింద .. దేశంలోనే తొలి రోడ్డు-రైలు సొరంగ మార్గం

ఈశాన్య భారతాన్ని అభివృద్ధి పథంలో నడిపించేందుకు కేంద్ర ప్రభుత్వం మరో ప్రతిష్టాత్మక అడుగు వేసింది. అస్సాంలోని బ్రహ్మపుత్ర నది కింద దేశంలోనే మొట్టమొదటి, ప్రపంచంలోనే రెండోదైన రోడ్డు, రైలు అండర్ వాటర్ ట్విన్ టన్నెల్ నిర్మాణానికి కేంద్ర ఆర్థిక వ్యవహారాల కేబినెట్ కమిటీ శనివారం పచ్చజెండా ఊపింది. గోహ్‌పూర్-నుమాలిగఢ్ మధ్య నిర్మించనున్న ఈ గ్రీన్‌ఫీల్డ్ కారిడార్ కోసం ఏకంగా రూ. 18,662 కోట్లు కేటాయించారు.

6 గంటల ప్రయాణం.. ఇక 20 నిమిషాల్లోనే!

ప్రస్తుతం నేషనల్ హైవే-715 మీదున్న నుమాలిగఢ్ నుంచి హైవే-15 పైనున్న గోహ్‌పూర్‌కు చేరుకోవాలంటే సుమారు 240 కిలోమీటర్ల దూరం ప్రయాణించాలి. కాజీరంగ నేషనల్ పార్క్, బిశ్వనాథ్ పట్టణం మీదుగా సాగే ఈ ప్రయాణానికి దాదాపు 6 గంటల సమయం పడుతుంది. అయితే బ్రహ్మపుత్ర నది కింద నిర్మించే ఈ నూతన సొరంగ మార్గం అందుబాటులోకి వస్తే.. ఈ దూరం భారీగా తగ్గి ప్రయాణ సమయం కేవలం నిమిషాల్లోనే ముగియనుంది. ఇది అస్సాంతో పాటు అరుణాచల్ ప్రదేశ్, నాగాలాండ్ వంటి రాష్ట్రాల రవాణా ముఖచిత్రాన్ని పూర్తిగా మార్చివేయనుంది.

ఈ ప్రాజెక్టు కేవలం ప్రయాణ సౌకర్యం కోసం మాత్రమే కాదు.. రక్షణ పరంగా కూడా భారత్‌కు అత్యంత కీలకంగా మారబోతుంది. ముఖ్యంగా చైనాతో సరిహద్దు ఉద్రిక్తతల నేపథ్యంలో సరిహద్దు ప్రాంతాలకు సరుకు రవాణా, సైనిక కదలికలను వేగవంతం చేసేందుకు ఈ సొరంగ మార్గం ఉపయోగపడుతుంది. దీనికి తోడు నిన్ననే ప్రధాని మోదీ దిబ్రూఘర్-మొరాన్ జాతీయ రహదారిపై ఏర్పాటు చేసిన ఎమర్జెన్సీ ల్యాండింగ్ ఫీల్డ్ వద్ద సి-130జే (C-130J) విమానంలో ల్యాండ్ అయ్యారు. అత్యవసర సమయాల్లో యుద్ధ విమానాలు ఇక్కడ దిగేలా దీనిని రూపొందించారు.

మల్టీ మోడల్ కనెక్టివిటీ

ఈ గ్రీన్‌ఫీల్డ్ కారిడార్ కేవలం రెండు ప్రాంతాలను కలపడమే కాకుండా.. 11 ఆర్థిక కేంద్రాలు, 3 సామాజిక కేంద్రాలను అనుసంధానిస్తుంది. 4 ప్రధాన రైల్వే స్టేషన్లు, 2 విమానాశ్రయాలు, 2 అంతర్గత జలమార్గాలకు మెరుగైన కనెక్టివిటీని అందిస్తుంది. ఇంజినీరింగ్-ప్రొక్యూర్‌మెంట్-కన్స్ట్రక్షన్  మోడల్‌లో దీనిని నిర్మించనున్నారు. ఈ మెగా ప్రాజెక్టు వల్ల లాజిస్టిక్స్ ఖర్చులు తగ్గడమే కాకుండా ఈశాన్య రాష్ట్రాల్లో పారిశ్రామికాభివృద్ధికి కొత్త ద్వారాలు తెరుచుకోనున్నాయి. అస్సాం గడ్డపై ఆవిష్కృతం కాబోతున్న ఈ ఇంజినీరింగ్ అద్భుతం భారత్ ప్రతిభను ప్రపంచానికి చాటి చెప్పనుంది.