బెంగాల్ గవర్నర్‌గా ఆర్.ఎన్. రవి? దీద సర్కార్‌లో మొదలైన ఉత్కంఠ

ఎన్నికల వేళ పశ్చిమ బెంగాల్ రాజకీయం మరోసారి వేడెక్కుతోంది. తమిళనాడు గవర్నర్‌గా పనిచేసిన ఆర్.ఎన్. రవిని బెంగాల్‌కు పంపే యోచనలో కేంద్రం ఉన్నట్లు వస్తున్న వార్తలు ఇప్పుడు కలకలం రేపుతున్నాయి. ఈ పరిణామంపై ముఖ్యమంత్రి మమతా బెనర్జీ తీవ్ర అసంతృప్తితో ఉన్నట్లు రాజకీయ వర్గాల్లో చర్చ నడుస్తోంది. ఇప్పటికే కేంద్రంపై పోరాడుతున్న తృణమూల్ కాంగ్రెస్, రవి రాకను తమ ప్రభుత్వానికి కొత్త సవాలుగా భావిస్తోంది.
గతంలో తమిళనాడు గవర్నర్‌గా ఆర్.ఎన్. రవి వ్యవహరించిన తీరును పరిశీలిస్తే, అక్కడ డీఎంకే ప్రభుత్వానికి ఆయన నిరంతరం సవాలుగా నిలిచారు. రాష్ట్ర ప్రభుత్వ విధానాలను బహిరంగంగానే విభేదించడం, అసెంబ్లీ ఆమోదించిన బిల్లులను క్లియరెన్స్ ఇవ్వకుండా పక్కన పెట్టడం వంటి చర్యలతో ఆయన వార్తల్లో నిలిచారు. దీంతో బెంగాల్ వంటి సున్నితమైన రాష్ట్రంలో ఆయన అడుగుపెడితే పాలనపై ఎలాంటి ప్రభావం చూపుతుందోనన్న ఆందోళన అధికార పార్టీలో వ్యక్తమవుతోంది.
సాధారణంగా పశ్చిమ బెంగాల్‌లో రాజ్ భవన్ మరియు సెక్రటేరియట్ మధ్య సంబంధాలు ఎప్పుడూ ఒడుదుడుకులతోనే సాగుతుంటాయి. మాజీ గవర్నర్ జగదీప్ ధన్ కర్ హయాంలో మమతా బెనర్జీకి, గవర్నర్ వ్యవస్థకు మధ్య పెద్ద యుద్ధమే నడిచింది. ఇప్పుడు అదే తరహాలో దూకుడుగా వ్యవహరించే ఆర్.ఎన్. రవి రాకతో మళ్ళీ పాత రోజులు పునరావృతం అవుతాయని రాజకీయ విశ్లేషకులు అంచనా వేస్తున్నారు. ఈ నియామకం జరిగితే రాష్ట్ర ప్రయోజనాలకు విఘాతం కలుగుతుందని తృణమూల్ నేతలు భావిస్తున్నారు.
మరోవైపు, ఎన్నికల సమయంలో గవర్నర్ పాత్ర అత్యంత కీలకంగా ఉంటుంది. శాంతిభద్రతల విషయంలో రవి తీసుకునే నిర్ణయాలు ప్రభుత్వానికి ఇబ్బందికరంగా మారే అవకాశం ఉందని మమతా బెనర్జీ వర్గాలు అనుమానిస్తున్నాయి. కేంద్రం కావాలనే తమను ఇబ్బంది పెట్టడానికి ఇలాంటి నిర్ణయాలు తీసుకుంటోందని ఆరోపణలు వస్తున్నాయి. మొత్తానికి రవి రాక వార్తలతో బెంగాల్ రాజకీయాల్లో ఇప్పుడే ముందస్తు సెగలు మొదలయ్యాయి.