విద్వేషాలను రెచ్చగొట్టే ప్రసంగాలపై సుప్రీంలో పిటిషన్,,,,కేంద్రానికి కీలక సూచనలు చేసిన న్యాయమూర్తులు

దేశవ్యాప్తంగా ద్వేషపూరిత ప్రసంగాల కేసులను పరిశీలించేందుకు కమిటీని ఏర్పాటు చేయాలని కేంద్రాన్ని సుప్రీంకోర్టు ఆదేశించింది. విద్వేష ప్రసంగాలను అరికట్టేలా చర్యలు తీసుకోవాలని కేంద్రాన్ని ఆదేశించాలని ప్రముఖ జర్నలిస్ట్ షాహీన్ అబ్దుల్లా వేసిన పిటిషన్‌పై జస్టిస్ సంజీవ్ ఖన్నా, జస్టిస్ ఎస్వీఎన్ భట్‌ల ధర్మాసనం విచారణ చేపట్టింది. దేశవ్యాప్తంగా జరిగే ర్యాలీలలో ఒక కమ్యూనిటీ సభ్యులను చంపడానికి.. వారి ఆర్థిక, సామాజిక బహిష్కరణకు పిలుపునిచ్చే కఠినమైన ద్వేషపూరిత ప్రసంగాలను అణిచివేసేలా ఆదేశాలు ఇవ్వాలని అభ్యర్థించారు.

ఈ పిటిషన్‌పై విచారణ సందర్భంగా సమాజంలోని వివిధ వర్గాల ప్రజల మధ్య సామరస్యం, సౌహార్ద్రం ఉండాలని, దీనిని కొనసాగించడం అందరి బాధ్యత అని ధర్మాసనం నొక్కి చెప్పింది. ద్వేషపూరిత ప్రసంగాలు ప్రమాదకరమని, అవి ఎవరికీ ఆమోదయోగ్యం కాదని స్పష్టం చేసింది. ఇటీవల హరియాణాలోని నుహ్‌లో మత ఘర్షణలకు సంబందించి దాఖలైన కేసుల పరిశీలనకు ఓ కమిటీని నియమించాలని ఆ రాష్ట్ర డీజీపీకి ఆదేశాలు జారీచేస్తామని వివరించింది.

ముగ్గురు లేదా నలుగురు అధికారులు ఉండే ఈ కమిటీ రాష్ట్రంలోని అన్ని పోలీస్‌స్టేషన్ల నుంచి సమాచారాన్ని తెప్పించుకుని పరిశీలించి తగిన ఆదేశాలిస్తుందని పేర్కొంది. ఈ ప్రతిపాదనపై ఆగస్టు 18లోగా కేంద్రం తన అభిప్రాయాన్ని తెలియజేయాలని అదనపు సొలిసిటర్‌ జనరల్‌ కె.ఎం.నటరాజ్‌ను కోరింది. ‘రాష్ట్ర ప్రభుత్వాలు, పోలీసులు గుర్తింపుతో సంబంధం లేకుండా ఏ సామాజికవర్గమైనా ద్వేషపూరిత ప్రసంగాలు చేయకుండా, భౌతిక హింస లేదా ఆస్తులకు నష్టం జరగకుండా చూస్తారని మేం ఆశిస్తున్నాం.. విశ్వసిస్తున్నాం’ అని పిటిషనర్ అన్నారు. ఈ కేసు తదుపరి విచారణను ఆగస్టు 18కి వాయిదా వేసింది.

నుహ్ జిల్లాలో మత హింస చెలరేగిన ఆరు రోజుల తర్వాత ఉద్రిక్తతల మధ్య ఆగస్టు 7న హరియాణాలోని గురుగ్రామ్‌లో మహాపంచాయత్ నిర్వహించారు. హిందూ సమాజ్ మహాపంచాయత్ నిర్వహించిన సభకు పోలీసుల అనుమతించలేదు. మత ఘర్షణల్లో పాకిస్థాన్‌తో సంబంధం ఉందనే విషయాన్ని కూడా హరియాణా పోలీసులు పరిశీలిస్తున్నారు. ఈ దర్యాప్తునకు సంబంధించి కీలక వివరాలపై తాము వ్యాఖ్యానించబోమని పోలీసులు చెప్పారు.