విబేధాలున్నా.. మాల్దీవులకు బడ్జెట్‌లో కేంద్రం భారీగా నిధులు

గురవారం కేంద్రం ప్రవేశపెట్టిన మధ్యంతర బడ్జెట్‌లో పర్యాటకంతోపాటు సరిహద్దును ఆనుకుని ప్రాంతాలకు భారీగా నిధులు కేటాయించారు. ఈ క్రమంలో మాల్దీవులతో దౌత్యపరమైన విభేదాలు నెలకొన్న తరుణంలోనూ ఆ దేశానికి బడ్జెట్‌లో పెద్ద పీట వేసింది. మాల్దీవులకు ఆర్థిక సాయం కింద రూ.600 కోట్లు కేటాయించింది. ఈ కేటాయింపు గతేడాదితో పోలిస్తే 50 శాతం అధికం. గత బడ్జెట్‌లో ఆ దేశ అభివృద్ధికి కేంద్రం రూ.400 కోట్లు ఇవ్వాలని నిర్ణయించింది. సవరించిన అంచనాల ప్రకారం రూ.770 కోట్లు ఖర్చు చేసింది. ఖర్చు చేసిన దాంతో పోలిస్తే మాత్రం ఈసారి కేటాయింపులు 22 శాతం తగ్గాయి. దేశం అవలంబిస్తున్న ‘పొరుగుకే ప్రాధాన్యం’ అనే విధానంలో ఈ బడ్జెట్‌లో కింది విధంగా నిధులు కేటాయించింది. దేశంలో అతిపెద్ద మౌలిక సదుపాయాల ప్రాజెక్ట్ అయిన 500 మిలియన్ల డాలర్ల గ్రేటర్ మాలే కనెక్టివిటీ ప్రాజెక్ట్‌తో పాటు రక్షణ, భద్రతా సహకారంలో కీలకమైన మాల్దీవులతో విభేదాలను భారత్ కోరుకోవడం లేదు. మాల్దీవుల కోసం మొత్తం కేటాయింపు రుణం కాకుండా గ్రాంట్ రూపంలో ఉంటుంది.

మరోవైపు, ఎప్పటి మాదిరిగా బడ్జెట్ కేటాయింపుల్లో ఈసారి కూడా భూటాన్‌కు ప్రాధాన్యత ఇచ్చారు. భూటాన్‌కు రూ.2,068 కోట్లు, నేపాల్‌కు రూ.700 కోట్లు ఇవ్వనున్నట్లు తెలిపింది. వీటి తర్వాత అత్యధికం మాల్దీవులకే కేటాయించింది. అయితే, విదేశాలకు చేసే సాయాన్ని ప్రస్తుత బడ్జెట్‌లో 10 శాతం తగ్గించారు. నిరుడు రూ.5,426 కోట్లివ్వగా.. ఇప్పుడు దానిని రూ.4,883 కోట్లకు పరిమితం చేసింది. గత బడ్జెట్ కంటే ఇది రూ.874 కోట్లు తక్కువ. ఇక, అంతర్యుద్ధంతో సతమతమవుతోన్న పొరుగన ఉన్న మాయన్మార్‌కు గతేడాది కంటే కేటాయింపులు తగ్గించింది. గత బడ్జెట్‌లో రూ.370 కేటాయించగా.. ప్రస్తుతం అది రూ.250 కోట్లకు పరిమితమైంది. తర్వాతి అఫ్గనిస్థాన్‌కు రూ.200 కోట్లు, బంగ్లాదేశ్‌కు రూ.120 కోట్లు అందజేయనున్నట్టు తెలిపింది. అలాగే, ఇరాన్‌తో అనుసంధాన ప్రాజెక్టులపై ప్రత్యేక దృష్టి సారించిన కేంద్రం.. అక్కడ చాబహార్‌ పోర్టు నిర్వహణకు రూ.100 కోట్లను ఇస్తున్నట్లు చెప్పింది.