జమ్ముకశ్మీర్లోని రాంబన్ జిల్లాలో లోయలో పడిన జవాన్ల బస్సు
Andhra Pradesh Telugu | Suryaa Desk | Published : Mon, Dec 24, 2018, 02:07 PM
సరిహద్దు భద్రతా సిబ్బందితో వెళ్తున్న ఓ బస్సు లోయలో పడిన ఘటన జమ్ముకశ్మీర్లోని రాంబన్ జిల్లాలో చోటుచేసుకుంది. ఈ ఘటనలో ఓ జవాను మృతిచెందగా.. 34 మంది గాయపడ్డారు. అధికారులు తెలిపిన వివరాల ప్రకారం.. ఇండో-టిబెటన్ బోర్డర్ పోలీస్(ఐటీబీపీ) దళానికి చెందిన సిబ్బంది కశ్మీర్లో ఇటీవల జరిగిన స్థానిక సంస్థల ఎన్నికల విధుల్లో పాల్గొన్నారు. విధులు ముగించుకుని సోమవారం వారు బుద్గామ్ నుంచి బయల్దేరారు. మార్గమధ్యంలో రాంబన్ జిల్లాలోని ఖునీ నల్లా ప్రాంతం వద్ద జవాన్లు ప్రయాణిస్తున్న బస్సు అదుపుతప్పి లోయలో పడింది. అయితే అదృష్టవశాత్తు బస్సు పూర్తిగా లోయలో పడకుండా చెట్లు అడ్డుకున్నాయి. దీంతో పెను ప్రమాదం తప్పింది.
ఈ ప్రమాదంలో ఓ జవాను ప్రాణాలు కోల్పోయినట్లు అధికారులు తెలిపారు. ఘటనా సమయంలో బస్సులో 35 మంది భద్రతాసిబ్బంది ఉన్నారు. మరో 34 మందిని స్థానికులు, పోలీసులు రక్షించి లోయ నుంచి బయటకు తీసుకొచ్చారు. వీరందరూ గాయపడగా చికిత్స నిమిత్తం స్థానిక ఆసుపత్రికి తరలించారు.
|
|