ఆహా.. అరకు కాఫీ అమోఘం.. ఐరాస ప్రశంసలు

అరకు అంటే ప్రకృతి సోయగాలు, మదిని దోచే సుందర దృశ్యాలు, గిరిజనం, కొండ కోన గుర్తుకు వస్తాయి. ఇక, ఆర్గానిక్ కాఫీకి చిరునామా 'అరకు'. ఈ కాఫీ ఎల్లలు దాటి కాఫీ ప్రియులను అలరిస్తోంది. తాజాగా, అరకు కాఫీ ఐక్యరాజ్యసమితి ప్రశంసలు అందుకుంది. అంతర్జాతీయ మహిళా దినోత్సవం సందర్భంగా ‘నారీశక్తి’పై ఐరాసలో భారత శాశ్వత మిషన్ ప్రత్యేక కార్యక్రమం నిర్వహించింది. ఈ క్రమంలో అరకు లోయలోని గిరిజన మహిళలు సాగుచేస్తోన్న కాఫీ ప్రస్థానంపై నిర్వాహకులు ప్రధానంగా దృష్టి సారించారు. ‘సీడ్‌ టు కప్‌’ పేరిట అరకు కాఫీ సాగులో మహిళల ప్రభావవంతమైన పాత్రను వివరించారు.

మహిళల సారథ్యంలో ప్రగతి సాధనపై భారత నిబద్ధత ప్రపంచ దేశాలకు స్ఫూర్తిదాయకమని ఐక్యరాజ్యసమితి సాధారణ సభ 78వ అధ్యక్షుడు డెన్నిస్‌ ఫ్రాన్సిస్‌ కొనియాడారు. జనవరిలో తాను భారత్‌లో పర్యటించినపుడు అక్కడి ‘నారీశక్తి’ పరివర్తన ఫలాలను ప్రత్యక్షంగా చూసినట్టు తెలిపారు. కాఫీ సాగు ద్వారా వ్యవసాయ, ఆర్థిక, సామాజిక విప్లవాన్ని తీసుకురావడంలో అరకు మహిళల పాత్రకు ఈ కార్యక్రమం ఓ గుర్తింపుగా ఫ్రాన్సిస్ వ్యాఖ్యానించారు. అంతేకాదు, మహిళల సాధికారతలో చాలాకాలం నుంచి భారత్‌ పోషించిన చారిత్రక పాత్రలో ఐరాస మానవహక్కుల కమిషన్‌ భారత ప్రతినిధిగా పనిచేసిన (1947-48) విద్యావేత్త హన్సా మెహతాను గుర్తుచేసుకోకపోతే అసంపూర్ణంగా ఉంటుందని అన్నారు.

‘ఫైనాన్స్, డిజిటల్ టెక్నాలజీ నుంచి ఆరోగ్యం, విద్య, అంతరిక్షం, విమానయానం వరకు, భారతీయ మహిళలు తమ దేశ అభివృద్ధిలో కీలక భూమిక పోషిస్తున్నారు.. లింగ సమానత్వాన్ని పెంపొందించడం, మహిళలకు సాధికారత కల్పించడం,మరింత న్యాయమైన, సమానమైన ప్రపంచాన్ని సాధించడంలో ఎవరూ వెనుకబడకుండా చూసుకోవడంలో భారత్ నిబద్ధత నుంచి మనం స్ఫూర్తి పొందుదాం.’ అని ఫ్రాన్సిస్ చెప్పారు.

సుస్థిర వ్యవసాయ పద్ధతులను భారత మహిళలకు అనుసంధానం చేసిన విధానం గొప్పగా ఉందని ఐరాస డిప్యూటీ సెక్రటరీ జనరల్‌ అమీనా మొహమ్మద్‌ ప్రశంసించారు. సువాసన పరిమళం గల అరకు కాఫీ సాగులో ఆద్యంతం మహిళల పాత్ర కీలకమని భారత మిషన్ పేర్కొంది. ఈ కార్యక్రమంలో పాల్గొన్న ఐరాస దౌత్యవేత్తలు, సీనియర్‌ అధికారులు అరకు కాఫీ రుచి చూశారు. ‘‘అరకులోని గిరిజన మహిళలు సాగుచేస్తున్న ఆర్గానిక్‌ కాఫీ అద్భుతమైన మా ప్రయాణానికి ఓ చిహ్నం’ అని భారత శాశ్వత ప్రతినిధి రుచిరా కంబోజ్‌ పేర్కొన్నారు.