ఏపీలోని సీనియర్ ఐపీఎస్‌లపై ఈసీ బదిలీ వేటు.. జగన్‌పై రాయిదాడే కారణమా

ఎన్నికల పోలింగ్ తేదీ సమీపిస్తున్న వేళ ఆంధ్రప్రదేశ్‌లో మరో కీలక పరిణామం చోటు చేసుకుంది. ఆంధ్రప్రదేశ్‌‍లోని ఇద్దరు సీనియర్ పోలీసు అధికారులపై కేంద్ర ఎన్నికల సంఘం బదిలీ వేటు వేసింది. ఇంటెలిజెన్స్‌ డీజీ పీఎస్‌ఆర్‌ ఆంజనేయులు, విజయవాడ సీపీ కాంతిరాణాలను బదిలీ చేస్తూ కేంద్ర ఎన్నికల సంఘం ఆదేశాలు జారీ చేసింది. ఈ ఇద్దరు ఐపీఎస్ అధికారులకు ఎన్నికలతో సంబంధం లేని విధులు అప్పగించాలని ఎన్నికల సంఘం స్పష్టం చేసింది. వీరిద్దరిని తక్షణమే విధుల నుంచి తప్పించాలని.. వీరి స్థానంలో కొత్తవారిని నియమించేందుకు పేర్లు సూచించాలని కేంద్ర ఎన్నికల సంఘం తన ఉత్తర్వుల్లో స్పష్టం చేసింది.

మేమంతా సిద్ధం బస్సు యాత్రలో భాగంగా వైఎస్ జగన్ మోహన్ రెడ్డి ఇటీవల విజయవాడలో పర్యటించారు. అయితే విజయవాడ పర్యటనలో వైఎస్ జగన్ మీద రాయితో దాడి చేశారు. ఈ ఘటనలో సీఎం ఎడమకన్ను పై భాగంలో గాయం కాగా.. మాజీ మంత్రి వెల్లంపల్లి శ్రీనివాస్ కంటికి తీవ్రగాయమైంది. ఈ ఘటన రాష్ట్రవ్యాప్తంగా తీవ్ర చర్చనీయాంశమైంది. సీఎం హోదాలో ఉన్న వ్యక్తి మీద రాయితో దాడి జరగడం దేశవ్యాప్తంగా చర్చకు దారతీసింది. ఇది పోలీస్ అధికారుల భద్రతా వైఫల్యమేనని విపక్షాలు ఆరోపించగా.. టీడీపీ శ్రేణులు దాడి చేశాయని వైసీపీ ఆరోపించింది. ఈ ఘటనకు సంబంధించి పోలీసులు సిట్ ఏర్పాటు చేసి దర్యాప్తు జరుపుతున్నారు.

అయితే ఘటన విజయవాడ పరిధిలో జరగడంతో.. విజయవాడ సీపీ కాంతి రాణా దీనిపై ఎన్నికల సంఘానికి నివేదిక సమర్పించారు. ఘటన ఎలా జరిగిందనే వివరాలను ఈసీకి నివేదించారు. అయితే సీఎం మీద దాడి జరగడాన్ని ఈసీ చాలా సీరియస్‌గా తీసుకున్నట్లు సమాచారం. రాయిదాడి ఘటనపై పోలీసుల దర్యాప్తు జరుగుతున్న సమయంలోనే ఇంటెలిజెన్స్ డీజీ ఆంజనేయులు, విజయవాడ సీపీ కాంతిరాణాలను బదిలీ చేస్తూ నిర్ణయం తీసుకుంది. ఘటనపై ఈసీకి వచ్చిన ఫిర్యాదుల ఆధారంగానే బదిలీ చేసినట్లు సమాచారం. అలాగే వారికి ఎన్నికల విధులతో సంబంధం లేని విధులు అప్పగించాలని స్పష్టం చేసింది. వీరి స్థానంలో కొత్తవారిని నియమించేందుకు బుధవారం మధ్యాహ్నం 3గంటల్లోగా ఒక్కో పోస్టుకు ముగ్గురేసి అధికారుల పేర్లు పంపాలని సూచించింది.