బుల్డోజర్‌కు టోల్ ఫీజు అడిగారని.. ‌టోల్‌బూత్‌ను కూల్చేశాడు.. వైరల్ వీడియో

బుల్లడోజర్‌కు టోల్ ఫీజు అడిగారని ఆగ్రహంతో ఏకంగా టూల్‌బూత్‌లనే కూల్చేశాడు ఓ డ్రైవర్. విస్తుగొలిపే ఈ ఘటన ఉత్తర్‌ ప్రదేశ్‌లోని హపుర్ సమీపంలో ఢిల్లీ - లక్నో జాతీయ రహదారిపై మంగళవారం మధ్యాహ్నం చోటుచేసుకుంది. ప్రస్తుతం దీనికి సంబంధించిన వీడియో సోషల్ మీడియాలో వైరల్ అవుతోంది. దీంతో కేసు నమోదుచేసిన పోలీసులు.. నిందితుడ్ని అదుపులోకి తీసుకున్నారు. పోలీసుల కథనం ప్రకారం.. ఢిల్లీ- లక్నో జాతీయ రహదారిపై హపుర్ సమీపంలోని ఛజర్సీ టోల్ ప్లాజ్ వద్ద ఘటన జరిగిందని తెలిపారు.

ఆ మార్గంలో వస్తున్న జేసీబీ ఆపరేటర్‌ను టోల్‌బూత్ సిబ్బంది ఆపి.. టోల్‌ రుసుం కట్టమని అడిగారు. అందుకు నిరాకరించిన నిందితుడు.. టోల్‌బూత్ సిబ్బందితో వాగ్వాదానికి దిగాడు. ఫీజు కట్టడానికి ససేమిరా అన్నాడు. దీంతో ఆగ్రహానికి గురైన వ్యక్తి.. జేసీబీతో టోల్‌బూత్‌లు కూల్చడానికి సిద్దమయ్యాడు. ఈ హఠాత్పరిణామానికి టోల్ బూత్ సిబ్బంది షాకయ్యారు. జేసీబీతో కూల్చేస్తుంటే ఏం చేయలేక నిస్సాహాయంగా ఉండిపోయారు. అతడి దుశ్చర్య అక్కడ ఉన్న ఓ ఉద్యోగి తన మొబైల్ ఫోన్‌లో రికార్డు చేశాడు.

సోషల్ మీడియాలో ఈ వీడియోను పోస్ట్ చేసిన అతడు.. ఘటన జరిగిన తీరును వివరించాడు. ‘టోల్ ఫీజు కట్టడానికి నిరాకరించిన జేసీబీ డ్రైవర్ బూత్‌లను ధ్వంసం చేశాడు’ అని తెలిపాడు. రికార్డు చేస్తుంటే కెమెరాకు దగ్గరగా వచ్చి జేసీబీ రిజిస్ట్రేషన్ నంబర్‌ను బిగ్గరగా చెప్పాడని పేర్కొన్నాడు. వీడియో వైరల్ కావడంతో పోలీసులు రంగంలోకి దిగారు. టోల్ ప్లాజ్‌కు 35 కిలోమీటర్ల దూరం వెళ్లిపోగా.. అక్కడ అతడ్ని అదుపులోకి తీసుకున్నారు. నిందితుడ్ని అరెస్ట్ చేశామని పోలీసులు వెల్లడించారు.