మోదీ క్యాబినెట్‌లోని 70 మందికి సగటు ఆస్తి రూ.100 కోట్లపైమాటే.. టాప్‌లో తెలుగోడే!

వరుసగా మూడోసారి నరేంద్ర మోదీ నాయకత్వంలో ఎన్డీయే ప్రభుత్వం ఏర్పాటుకాగా.. 71 మందితో మంత్రివర్గం ఏర్పడింది. కొత్తగా కొలువుదీరిన మోదీ 3.0 క్యాబినెట్‌లో 99 శాతం లేదా 70 మంది కోటీశ్వేరులేనని అసోసియేషన్ ఆఫ్ డెమొక్రాటిక్ రిఫామ్స్ (ఏడీఆర్‌) నివేదిక వెల్లడించింది. వీరి సగటు ఆస్తి రూ.107.94 కోట్లని పేర్కొంది. అంతేకాదు, ఆరుగురు మంత్రులు తమకు రూ.100 కోట్లు అంతకన్నా ఎక్కువ ఆస్తులు ఉన్నట్టు ప్రకటించారని పేర్కొంది. వీరిలో కేంద్ర గ్రామీణాభివృద్ధి, కమ్యూనికేషన్ల శాఖ సహాయమంత్రి, గుంటూరు ఎంపీ పెమ్మసాని చంద్రశేఖర్‌ రూ.5,705.47 కోట్లతో తొలిస్థానంలో ఉన్నారు.

ఆయన తర్వాతి స్థానాల్లో రూ.424.75 కోట్లతో టెలికాం, ఈశాన్యరాష్ట్రాల అభివృద్ధి మంత్రి జ్యోతిరాదిత్య సింధియా, రూ.217.23 కోట్ల విలువైన ఆస్తులతో ఉక్కు, భారీ పరిశ్రమల శాఖ మంత్రి హెచ్‌డీ కుమారస్వామి, రూ.144.12 కోట్లతో రైల్వే, సమాచార ప్రసార శాఖ మంత్రి అశ్వినీ వైష్ణవ్, రూ.121.54 కోట్లతో ప్రణాళిక శాఖ (స్వతంత్ర మంత్రి) రావ్ ఇంద్రజీత్ సింగ్, రూ.110.95 కోట్లతో వాణిజ్య వ్యవహారాల శాఖ మంత్రి పీయూష్ గోయల్ నిలిచారు.

మోదీ క్యాబినెట్‌లో యువత కంటే అనుభవానికి పెద్దపీట వేశారు. మంత్రులుగా ప్రమాణం చేసిన 71 మందిలో 66 శాతం మంది (47 మంది) వయసు 51 నుంచి 70 ఏళ్ల మధ్య ఉంది. 51 ఏళ్ల నుంచి 60 ఏళ్ల మధ్య వయసున్నవారు 22 మంది.. 31 నుంచి 50 ఏళ్ల మధ్య వయసున్నవారు 24 శాతం మంది (17 మంది) ఉండగా, వారిలో ఇద్దరి వయసు 31-40 మధ్య ఉండడం విశేషం. అతి చిన్న వయస్కుడు పౌరవిమానయాన శాఖ మంత్రి, శ్రీకాకుళం టీడీపీ ఎంపీ కింజరాపు రామ్మోహన్‌నాయుడు.

అలాగే, మోదీ 3.0 కొత్త మంత్రుల్లో 28 మందిపై క్రిమినల్‌ కేసులు ఉన్నట్టు ఏడీఆర్ నివేదిక పేర్కొంది. వారిలో 19 మందిపై హత్యాయత్నం, మహిళలపై నేరాలు, విద్వేష ప్రసంగాలు వంటి అభియోగాలతో తీవ్రమైన క్రిమినల్‌ కేసులు ఉన్నట్టు వివరించింది. షిప్పింగ్ అండ్ జలరవాణా శాఖ సహాయమంత్రి శాంతను ఠాకూర్, ఈశాన్య రాష్ట్రాల అభివృద్ధి శాఖ సహాయమంత్రి సుఖాంత మజుందార్‌లను హత్యాయత్నం కేసులను ఎదుర్కొంటున్నారు.

హోం శాఖ సహాయమంత్రి, కరీంనగర్ ఎంపీ బండి సంజయ్, పర్యాటక శాఖల సహాయమంత్రి, త్రిసూర్ ఎంపీ నటుడు సురేశ్‌ గోపీ సహా ఐదుగురు మంత్రులపై మహిళలపై నేరాలకు సంబంధించిన కేసులు నమోదయ్యాయి. ఇక, క్యాబినెట్ సభ్యుల విద్యార్హతల విషయానికి వస్తే.. 11 మంది విద్యార్హత 12వ తరగతి మాత్రమే. అయితే, 57 మంది (80%) మంత్రుల విద్యార్హత గ్రాడ్యుయేట్‌ లేదా అంతకంటే ఎక్కువగా ఉంది.