ఇంగ్లీష్ మీడియం స్కూల్స్‌పై విద్యార్థుల తల్లిదండ్రుల మోజు ఆత్మహత్యతో సమానం: ఎన్‌సీఈఆర్‌టీ చీఫ్

ఇప్పుడు మనిషి బతకాలి అంటే ఇంగ్లీష్ రావాలి అనే పరిస్థితి నెలకొంది. చదువు వచ్చినా రాకపోయినా ఇంగ్లీష్ రావాల్సిందేనని చాలా మంది నమ్ముతున్నారు. ఇక చిన్నతనం నుంచే ఇంగ్లీష్ బాగా నేర్చుకుని భాషలో ప్రావీణ్యం సంపాదించుకుంటేనే ఉద్యోగాలు వస్తాయనే గుడ్డి నమ్మకం కూడా చాలా మంది మెదడులలో నాటుకుపోయింది. అందుకే అప్పు చేసి అయినా సరే చాలా మంది తల్లిదండ్రులు.. తమ పిల్లల భవిష్యత్ కోసం ఇంగ్లీష్ మీడియం స్కూళ్లకు పంపించి చదివిస్తున్నారు. ఈ క్రమంలోనే చాలా మంది.. స్కూళ్లు ఎలా ఉన్నాయి, అందులో ఎంత నాణ్యమైన విద్యను అందిస్తున్నారు, అసలు ఆ స్కూల్‌లో పాఠాలు చెప్పే టీచర్లు ఎంత వరకు చెప్పగలరు అనేవి తెలుసుకోకుండా.. ఇంగ్లీష్ మీడియం స్కూల్ అయితే చాలు.. తమ పిల్లలకు ఇంగ్లీష్ వస్తుందని భావించి.. ఏ స్కూల్ పడితే ఆ స్కూల్‌లో జాయిన్ చేస్తున్నారు.

అయితే ఇలా ఇంగ్లీష్ మీడియం స్కూళ్లు అంటే తల్లిదండ్రులు మోజు పడటం అనేది.. ఆత్మహత్య చేసుకున్నట్లేనని నేషనల్ కౌన్సిల్ ఆఫ్ ఎడ్యుకేషనల్ రీసెర్చ్ అండ్ ట్రైనింగ్ - ఎన్‌సీఈఆర్‌టీ డైరెక్టర్ దినేష్ ప్రసాద్ సక్లానీ పేర్కొన్నారు. అనేక స్కూల్‌లలో పూర్తి శిక్షణ పొందిన టీచర్లు లేనప్పటికీ.. అలాంటి పాఠశాలల్లోకి తమ విద్యార్థులను తల్లిదండ్రులు పంపించడం మంచిది కాదని దినేష్ ప్రసాద్ సక్లానీ తీవ్ర ఆవేదన వ్యక్తం చేశారు. ఇలాంటి పరిణామాలను చూస్తుంటే కోరి కష్టాలను కొని తెచ్చుకున్నట్టేనని ఆయన వ్యాఖ్యానించారు. ఈ సందర్భంగానే ప్రభుత్వ పాఠశాలలు కూడా నాణ్యమైన విద్యను అందిస్తున్నాయని దినేష్ ప్రసాద్ సక్లానీ తెలిపారు. కంటెంట్ మొత్తం ఇంగ్లీష్‌లో నింపడం పిల్లలను వారి మూలాలు, సంస్కృతి నుంచి దూరం చేయడంతోపాటు వారి విజ్ఞానంపై ప్రభావం చూపుతుందని పేర్కొన్నారు.

 ఇంగ్లీష్‌ మీడియం పాఠశాలలవైపు తల్లిదండ్రులు బాగా ఇష్టం చూపిస్తున్నారని.. అలాంటి స్కూళ్లలో ఇంగ్లీష్ చెప్పే టీచర్లు లేకున్నా.. ఉన్న వారికి సరైన ట్రైనింగ్ లేకపోయినా అలాంటి స్కూళ్లకే చాలా మంది తల్లిదండ్రులు పంపిస్తున్నారని చెప్పారు. ఇలాంటివి ఆత్మహత్య కంటే తక్కువేం కాదని పేర్కొన్నారు. అందుకే సొంత భాషలో బోధించాలని నూతన విద్యా విధానం చెబుతోందని దినేష్ ప్రసాద్ సక్లానీ తెలిపారు. మాతృభాషలో చదువుకుంటేనే మూలాలు సరిగ్గా అర్థం చేసుకోగలరని చెప్పారు. బహుభాషా విధానం అనేది కేవలం బోధించడానికి మాత్రమే కాదని.. పలు భాషలను నేర్చుకునేందుకు దోహదం చేస్తుందని సక్లాని చెప్పారు.

ఇక కంటెంట్‌ మొత్తం ఇంగ్లీష్‌లో ఉండటం మొదలుపెడితే అక్కడే విజ్ఞానం కోల్పోవడం ప్రారంభం అవుతుందని సక్లానీ తెలిపారు. భాష అనేది శక్తినిచ్చేదిగా ఉండాలి కానీ.. కోల్పోయేవిధంగా ఉండకూడదని వెల్లడించారు. ఇప్పటివరకు మనం కోల్పోయిన దాన్ని బహుభాషా విద్య ద్వారా తిరిగి పొందేందుకు ప్రయత్నిస్తున్నామని ఎన్‌సీఈఆర్‌టీ చీఫ్ చెప్పారు. ఒడిశాలో గిరిజన విద్యార్థుల కోసం ఫోటోలు, కథలు, పాటలతో కూడిన పుస్తకాలను తయారు చేస్తున్నామని వెల్లడించారు. దీనివల్ల స్థానిక సంస్కృతితోపాటు మాట్లాడటం, నేర్చుకునే నైపుణ్యాలు మెరుగుపరుచుకోవచ్చని తెలిపారు. కేంద్ర ప్రభుత్వం 2020లో నూతన జాతీయ విద్యా విధానాన్ని తీసుకువచ్చింది. కనీసం ఐదో తరగతి వరకు మాతృభాషలో చదువుకోవాలని సిఫార్సు చేసింది. 8, ఆ పైతరగతుల్లోనూ మాతృభాషలోనే బోధించేందుకు ప్రాధాన్యం ఇవ్వాలని సూచించింది.