టి20 సిరీస్‌ భారత్‌ ఖాతాలోకి చేరింది

నాగ్‌పూర్‌లో అద్భుతం జరిగింది. బంగ్లాదేశ్‌ చేతిలో టి20 సిరీస్‌ కోల్పోయే ప్రమాదంలో పడిన సమయంలో టీమిండియా తీవ్ర ఒత్తిడి మధ్య ఉవ్వెత్తున లేచింది. 43 బంతుల్లో 65 పరుగులు చేస్తే గెలిచే స్థితిలో నిలిచిన బంగ్లాదేశ్‌ను కుప్పకూల్చి ఒక్కసారిగా తన స్థాయిని ప్రదర్శించి పరువు నిలబెట్టుకుంది. 34 పరుగుల వ్యవధిలో మిగిలిన 8 వికెట్లు తీసి సొంతగడ్డపై దర్జాగా సిరీస్‌ను సొంతం చేసుకుంది. మ్యాచ్‌ కీలక దశలో రెండు ప్రధాన వికెట్లు తీసి శివమ్‌ దూబే విజయానికి బాటలు వేస్తే... ఏకంగా 6 వికెట్ల ప్రదర్శనతో దీపక్‌ చహర్‌ అదరగొట్టాడు. చహర్‌ ప్రదర్శన అంతర్జాతీయ టి20ల్లో అత్యుత్తమం కాగా, భారత్‌ తరఫున టి20ల్లో తొలి హ్యాట్రిక్‌ తీసిన అరుదైన బౌలర్‌గా కూడా అతను నిలిచాడు. తన 3వ ఓవర్‌ చివరి బంతికి వికెట్‌ తీసిన చహర్‌... నాలుగో ఓవర్‌ తొలి రెండు బంతులకు వికెట్లు పడగొట్టి ‘హ్యాట్రిక్‌’ నమోదు చేశాడు. అంతకుముందు శ్రేయస్‌ అయ్యర్, రాహుల్‌ అర్ధసెంచరీలతో టీమిండియా స్కోరులో ప్రధాన పాత్ర పోషించారు.   . బంగ్లాదేశ్‌తో జరుగుతున్న నిర్ణయాత్మకమైన చివరి టీ20లో టీమిండియా యువ బ్యాట్స్‌మెన్‌ కేఎల్‌ రాహుల్‌, శ్రేయాస్‌ అయ్యర్‌లు హాఫ్‌ సెంచరీలతో అదరగొట్టారు. దీంతో బంగ్లాకు టీమిండియా 175 పరుగుల లక్ష్యాన్ని నిర్దేశించింది. కేఎల్‌ రాహుల్‌ (52; 35 బంతుల్లో 7ఫోర్లు) బాధ్యతాయుతంగా ఆడగా.. అయ్యర్‌ (62; 33 బంతుల్లో 3 ఫోర్లు, 5సిక్సర్లు) బంగ్లా బౌలర్లకు చుక్కలు చూపించాడు. చివర్లో మనీశ్‌ పాండే(22 నాటౌట్‌; 13 బంతుల్లో 3ఫోర్లు) బ్యాట్‌ ఝులిపించడంతో టీమిండియా నిర్ణీత 20 ఓవర్లలో ఐదు వికెట్ల నష్టానికి 174 పరుగులు చేసింది. అనంతరం బంగ్లా 19.2 ఓవర్లలో 144 పరుగులకే ఆలౌటైంది. నయీమ్‌ (48 బంతుల్లో 81; 10 ఫోర్లు, 2 సిక్సర్లు) చెలరేగగా, మిథున్‌ (27) సహకరించాడు. వీరిద్దరు మూడో వికెట్‌కు 61 బంతుల్లో 98 పరుగులు జోడించి విజయం దిశగా నడిపించినా... భారత బౌలర్లు ఆ అవకాశం ఇవ్వలేదు. పేసర్‌ దీపక్‌ చహర్‌ కేవలం 7 పరుగులిచ్చి 6 వికెట్లు పడగొట్టగా... శివమ్‌ దూబేకు 3 వికెట్లు దక్కాయి. చహర్‌కే ‘మ్యాన్‌ ఆఫ్‌ ద మ్యాచ్‌’, ‘సిరీస్‌’ అవార్డులు దక్కాయి.