బాంబులతో రష్యా ముప్పేట దాడి...ప్రాణ భయంతో పొరుగు ప్రాంతాలకు జనం పరుగులు

ఉక్రెయిన్ లో జనం భిక్కుభిక్కుమంటూ బతకాల్సి వస్తోంది. రష్యా దాడులతో ఉక్రెయిన్ అల్లాడుతోంది. బాంబు మోతలతో అక్కడి ప్రజలు భయభయంగా గడుపుతున్నారు. ఏం జరుగుతుందో తెలియక చంటి పిల్లలు హడలిపోతున్నారు. ఇళ్లను వదిలి బంకర్లలో, అండర్ గ్రౌండ్స్‌లో దాక్కుంటున్నారు. ఈ నేపథ్యంలో అక్కడ వలస సంక్షోభం కూడా మొదలైంది. అక్కడి ప్రజలు ప్రాణాలు అరచేతిలో పెట్టుకుని దేశాన్ని వీడుతున్నారు. పిల్లలతో, చేతులో సామాన్లతో, కన్నీళ్లతో పుట్టిన నేలను వీడుతున్నారు. ఇప్పటికే 50 లక్షల మంది వెళ్లినట్టు తెలుస్తోంది. ఈ విషయాన్ని ఐక్యరాజ్య సమితి అనుబంధ సంస్థలు వెల్లడించాయి. కేవలం 48 గంటల్లోపే 50,000 మందికి పైగా ఉక్రేనియన్లు దేశం నుంచి వెళ్లిపోయారు. సరిహద్దు ప్రాంతాల నుంచి చాలామంది తమ చిన్న పిల్లలను ఎత్తుకుని, సామాన్లు పట్టుకుని వెళ్లలేక వెళ్తున్నారు. దీనికి సంబంధించిన ఫోటోలు సోషల్ మీడియాలో వైరల్ అవుతున్నాయి. ఇప్పటికే రష్యా క్షిపణులు, బాంబుల కారణంగా కొన్ని ప్రాంతాల్లో భవనాలు ధ్వంసమయ్యాయి. రాకెట్లు పడుతున్నాయి, రష్యా సైనిక బలగాలు చుట్టుముడుతున్నాయి. మరికొన్ని ప్రాంతాల్లో చమురు, డబ్బు, నిత్యావసరాల కొరత ఏర్పడింది. దీంతో ప్రాణాలను కాపాడుకోవడానికి ఉక్రెయిన్ ప్రజలు ఆ దేశాన్ని వీడి ఐరోపా దేశాలకు వలస వెళ్తున్నారు. ముఖ్యంగా మహిళలు, పిల్లలు రుమేనియా, హంగరీ, పొలండ్‌, స్లొవేకియాలోకి ప్రవేశించారు. ఈ మేరకు పోలాండ్‌లోకి వెళ్లే సరిహద్దు వద్ద పొడవైన క్యూలు కనిపించాయి. పొలాండ్‌లోకి వెళ్లడానికి సరిహద్దు ప్రాంతంలో ప్రవేశించడానికి గడ్డకట్టే చలిలో ఆరు గంటల నుంచి 12 గంటల వరకూ వేచి ఉన్నారు. మగవాళ్లు మాత్రం యుద్ధంలో సహకరించడానికి దేశంలోనే ఉండిపోతున్నారు. దాంతో మహిళలు కన్నీరుమున్నీరవుతున్నారు. తమ భర్తలు, అన్నలు, తండ్రులు ఉక్రెయిన్‌లోనే ఉండిపోయారని, వారి ప్రాణాలను గ్యారంటీ లేదని విలపిస్తున్నారు. రష్యా దేశం మొత్తాన్ని ఆక్రమిస్తుందని, తమ వాళ్ల పరిస్థితి ఏంటని ఆవేదన వ్యక్తం చేస్తున్నారు. అదే సమయంలో కొంతమంది ఉక్రెయిన్‌ను వస్తున్నారు. తమ దేశాన్ని రక్షించుకోవాలనే ఉద్దేశంతో సొంత నేలపై అడుగుపెడుతున్నారు. కాగా ఉక్రెయిన్‌పై రష్యా చేస్తోన్న దాడికి ఐరోపా యూనియన్ ఖండించింది. ఈ మేరకు ఫ్రాన్స్ తన సంఘీభావాన్ని తెలియజేసింది.