మార్చి 1 నుంచి ఇక పాత ఐఎఫ్ఎస్‌సీ కోడ్లు పని చేయవు

తాజాగా మొదలైన బ్యాంకుల విలీనాలు సంబంధిత బ్యాంకు కష్టమర్లకు సంకటంగా మారుతోంది. తాజాగా లక్ష్మీ విలాస్ బ్యాంక్ కస్టమర్లకు ముఖ్యమైన అలర్ట్ వచ్చింది. ఈ బ్యాంక్ 2020 నవంబర్‌లో డీబీఎస్‌లో బ్యాంక్‌లో విలీనం అయిపోయింది. అయితే బ్యాంక్ ఐఎఫ్ఎస్‌సీ కోడ్ ఇప్పటి వరకు చెల్లుబాటు అవుతూనే వచ్చాయి. అయితే మార్చి 1 నుంచి ఇక పాత ఐఎఫ్ఎస్‌సీ కోడ్లు పని చేయవు. కొత్తవి అమలులోకి వస్తాయి. అందువల్ల బ్యాంక్ కస్టమర్లు ఈ విషయాన్ని గుర్తు పెట్టుకోవాలి. డీబీఎస్ బ్యాంక్ కొత్త ఐఎఫ్‌ఎస్‌సీ కోడ్స్ ఉపయోగించాల్సి ఉంటుంది. అంటే మార్చి 1 నుంచి నెఫ్ట్, ఐఎంపీఎస్, ఆర్‌టీజీఎస్ వంటి మార్గాల్లో డబ్బులు పంపాలంటే కచ్చితంగా కొత్త డీబీఎస్ ఐఎఫ్ఎస్‌సీ కోడ్స్ వాడాల్సి ఉంటుంది. డీబీఎస్ బ్యాంక్ ఇప్పటికే కస్టమర్లకు ఈ విషయాన్ని తెలియజేసింది. ఈమెయిల్స్, ఎస్ఎంఎస్ వంటివి పంపి ఖాతాదారులకు అలర్ట్ చేసింది. కేవలం మనీ ట్రాన్స్‌ఫర్ మాత్రమే కాకుండా పాత చెక్ బుక్స్ కలిగి ఉంటే.. వాటిని కూడా మార్చుకోవాల్సి ఉంటుంది. ఎందుకంటే ఎంఐసీఆర్ కోడ్ మారుతుంది. అందువల్ల పాత చెక్స్ చెల్లుబాటు కావు. మీ వద్ద పాత చెక్ బుక్స్ ఉంటే.. వాటిని తీసుకెళ్లి బ్యాంక్ నుంచి కొత్త చెక్ బుక్స్ పొందాలి. అప్పుడు ఎలాంటి ఇబ్బందులు ఉండవు. 2021 నవంబర్ 1 నుంచే కొత్త చెక్ బుక్స్ అందుబాటులోకి వచ్చాయి. నేరుగా బ్యాంక్ బ్రాంచ్‌కు వెళ్లి చెక్ బుక్ కోసం అప్లై చేసుకోవచ్చు. లేదంటే కస్టమర్ కేర్ నెంబర్‌కు కాల్ చేసి, ఇంటర్నెట్ బ్యాంకింగ్ ద్వారా చెక్ బుక్ కోసం అప్లై చేసుకోవచ్చు. కొత్త చెక్ బుక్స్ లేదంటే కొత్త ఐఎఫ్ఎస్‌సీ కోడ్స్ కచ్చితంగా పొందాలి. వీటిని ఇన్‌కమ్ ట్యాక్స్, ఇన్సూరెన్స్ కంపెనీలు, మ్యూచువల్ ఫండ్స్, నేషనల్ పెన్షన్ సిస్టమ్, డీమ్యాట్ అకౌంట్ వంటి వాటిల్లో ఈ వివరాలను అప్‌డేట్ చేసుకోవాల్సి ఉంటుంది. అందువల్ల కచ్చితంగా బ్యాంక్ కస్టమర్లు ఈ పని పూర్తి చేసుకోవాలి. కాగా కేంద్ర ప్రభుత్వం ఇప్పటికే పలు బ్యాంకులను విలీనం చేసిన విషయం తెలిసిందే. ఎస్‌బీఐ అనుబంధ బ్యాంకుల నుంచి ఈ విలీన ప్రక్రియ ప్రారంభమైంది. చాలా బ్యాంకులను విలీనం చేశారు. బ్యాంకుల విలీనం వల్ల బ్యాంకింగ్ వ్యవస్థ మరింత బలపడుతుందని కేంద్ర ప్రభుత్వం పేర్కొంటోంది. ఆంధ్ర బ్యాంక్ కూడా ఇలానే కనుమరుగు అయ్యింది.