ఉక్రెయిన్ పై దాడి ఫలితం...రష్యా బ్యాంకులపై నిషేధ అస్త్రాలు

నిషేధాలతో రష్యాను అష్టదిగ్భంధం చేసే పనిలో ఉక్రెయిన్ మద్దతు దేశాలు తలమునకలయ్యాయి. రష్యాపై ఇప్పటికే అమెరికాతో సహా కొన్ని దేశాలు ఆంక్షల అస్త్రాలను సంధించాయి. రష్యా బ్యాంకులపై నిషేధం విధించాయి. అయినా రష్యా వైఖరిలో మార్పు రాలేదు. దాంతో మరిన్ని చర్యలు చేపట్టేందుకు నిర్ణయించుకున్నాయి. ఇందులో భాగంగానే అంతర్జాతీయ పేమెంట్ వ్యవస్థ స్విఫ్ట్ నుంచి రష్యాను తొలగించేందుకు నిర్ణయం తీసుకున్నాయి. సొసైటీ ఫర్‌ వరల్డ్‌వైడ్‌ ఇంటర్‌బ్యాంక్‌ ఫైనాన్షియల్‌ టెలికమ్యూనికేషన్స్‌ (స్విఫ్ట్) నుంచి రష్యా బ్యాంకులను తొలగిస్తున్నట్టు అమెరికా, ఐరోపా దేశాలు, కెనడా, బ్రిటన్‌లు ఒక ప్రకటనలో వెల్లడించాయి. ఇది త్వరలో అమల్లోకి వస్తుందని తెలిపాయి. ఉక్రెయిన్‌పై రష్యా దాడిని ఖండిస్తూ, రష్యా దూకుడుకు అడ్డుకట్ట వేసేందుకే ఈ నిర్ణయం తీసుకున్నట్టు ఆ దేశాలు తెలియజేశాయి. ఉక్రెయిన్ ప్రజలకు తాము అండగా ఉన్నామని, ఉక్రెయిన్‌ను రక్షించడానికి కట్టుబడి ఉన్నామని ప్రకటనలో వెల్లడించాయి. రష్యాను ఏకాకిగా మారుస్తామని హెచ్చరించాయి. ఉక్రెయిన్‌పై రష్యా దాడిని చారిత్రక తప్పిదంగా అభివర్ణించాయి. కాగా స్విఫ్ట్ నుంచి రష్యాను తొలగించడంతో రష్యా బ్యాంకింగ్‌ రంగం అంతర్జాతీయ లావాదేవీలు నిర్వహించడం చాలా కష్టంగా మారుతుంది. ఈ చర్యతో రష్యాలోని సంపన్న వర్గాలకు చెందిన వ్యక్తుల గోల్డెన్ పాస్‌పోర్టులు పనిచేయవు. అయితే ఈ యుద్ధాన్ని ఇప్పటికన్న ఆపకపోతే ముందు ముందు మరిన్ని చర్యలు తీసుకునే అవకాశం ఉన్నట్టు తెలుస్తుంది. అయితే ఎన్ని ఆంక్షలు తీసుకున్నా ఆగేది లేదని ఇప్పటికే రష్యా ప్రకటించింది. తాము అనుకున్న లక్ష్యాన్ని చేరే వరకు ఆపేది లేదని రష్యా ప్రకటించింది. ఈ ఆంక్షల ఒరిగేదేమి లేదంటూ కొట్టిపడేసింది. మరోవైపు ఉక్రెయిన్‌లో రష్యా తన దాడిని కొనసాగిస్తూనే ఉంది. ఇప్పటికే రష్యా బలగాలు ఉక్రెయిన్‌లో కీవ్ నగరాన్ని చుటముట్టాయి. రష్యా సైన్యంతో అక్కడి ఉక్రెయిన్ సైనికులు తలపడుతున్నారు. ప్రస్తుతానికి కీవ్ నగరం తమ ఆధీనంలో ఉందని ఉక్రెయిన్ ఇప్పటికే ప్రకటించింది.