‘జవాన్’సినిమా రివ్యూ

‘తిక్క’, ‘విన్నర్’ ఇలా వరుసగా రెండు ఫ్లాప్ సినిమాలతో మెగా హీరో సాయి ధరం తేజ్ డీలా పడ్డాడు. తను అతిథి పాత్ర చేసిన ‘నక్షత్రం’ కూడా ఆశించిన స్థాయిలో ఆడలేదు. దీంతో ఇప్పుడు ‘జవాన్’ సినిమాపైనే ఆశలు పెట్టుకున్నాడు. ‘జవాన్’ సినిమా విజయంపై తేజు చాలా కాన్ఫిడెంట్‌గా కనిపించాడు. హీరోగా తన కెరీర్‌కు కీలకమైన ఈ సినిమాతో మెగా మేనల్లుడు విజయాన్ని అందుకున్నాడో.. లేదో.. సమీక్షలోకి వెళ్లి తెలుసుకుందాం! 

కథ:  జై(సాయి ధరం తేజ్)కు చిన్నప్పటి నుంచి దేశభక్తి చాలా ఎక్కువ. బాధ్యత గల వ్యక్తిత్వం గలవాడు. రాష్ట్రీయ స్వయం సేవక్ సంఘ్(ఆర్ఎస్ఎస్)లో మెంబర్‌గా ఉంటాడు. డిఫెన్స్ రీసెర్చ్ అండ్ డెవలప్‌మెంట్ ఆర్గనైజేషన్(డీఆర్‌డీవో)లో ఉద్యోగం సంపాదించాలనేది అతడి కోరిక. మరోపక్క కేశవ్(ప్రసన్న) హైటెక్ క్రిమినల్. ఉగ్రవాద దాడులకు పాల్పడుతుంటాడు. అనుకోకుండా ఆ టెర్రరిస్ట్ గ్యాంగ్‌ను ఎదుర్కొని దేశానికి నష్టం జరగకుండా కాపాడతాడు జై. దీంతో జై మీద కేశవ్ పగ పడతాడు. 

ఇండియన్ ఆర్మీ కోసం డీఆర్‌డీవో తయారు చేసిన ‘ఆక్టోపస్’ అనే మిస్సైల్‌ను జై ద్వారా సంపాదించాలని కేశవ్ నిర్ణయించుకుంటాడు. దీని కోసం జైని బెదిరించి అతని కుటుంబ సభ్యులను కేశవ్ తన అదుపులో పెట్టుకుంటాడు. ఈ పరిస్థితుల నుంచి జై ఎలా బయటపడ్డాడు..? కుటుంబాన్ని, దేశ సంపదను ఎలా కాపాడాడు..? ఒక కామన్ మ్యాన్ ఉగ్రవాదులను ఎలా ఎదిరించాడు..? అనే విషయాలు సినిమా చూసి తెలుసుకోవాల్సిందే! 

విశ్లేషణ:  దేశం, కుటుంబం కోసం తాపత్రయ పడే ఒక మధ్యతరగతి యువకుడి కథే ఈ ‘జవాన్’. అయితే దర్శకుడు బీవీఎస్ రవి రాసుకున్న కథలో ఎక్కడా కొత్తదనం కనిపించదు. హీరో, విలన్ మధ్య సన్నివేశాలను కూడా ఆసక్తికరంగా రాసుకోలేకపోయారు. వారిద్దరి మధ్య సాగే మైండ్ గేమ్ అంత ఇంట్రస్టింగ్‌గా లేదు. దర్శకుడిగా కంటే రైటర్‌గా ఆయన రాసుకున్న సంభాషణలు ఆకట్టుకుంటాయి. దేశభక్తి గురించి వివరించే సన్నివేశాలు, ఎమోషనల్ సీన్స్ ఆడియన్స్‌కు బాగా కనెక్ట్ అవుతాయి. హీరో పాత్రను ఎలివేట్ చేసిన విధానం బాగుంది. అయితే ఆశించిన స్థాయిలో సినిమాను రక్తి కట్టించలేకపోయారు. 

ఈ సినిమా ప్లస్ పాయింట్ సాయి ధరం తేజ్ నటన. ప్రతి సన్నివేశంలో ఎమోషన్‌ను బాగా పండించాడు. డాన్స్, యాక్షన్ సన్నివేశాల్లో అవలీలగా నటించేశాడు. గత చిత్రాలతో పోలిస్తే ఈ సినిమాలో హీరోయిన్ మెహరీన్ కాస్త బొద్దుగా కనిపించింది. గ్లామర్ పరంగా యూత్‌ను ఆకట్టుకుంటుంది. ఇక విలన్‌గా నటించిన ప్రసన్న తన పాత్రకు పూర్తి న్యాయం చేశాడు. తెలుగులో పూర్తిస్థాయి పాత్రలో నటించడం తొలిసారి అయినప్పటికీ తన నటనతో ప్రేక్షకులను మెప్పిస్తాడు. 

జయప్రకాష్, ఈశ్వరీ, సత్యం రాజేష్ తన పాత్రల పరిధుల్లో బాగానే నటించారు. టెక్నికల్‌గా మంచి క్వాలిటీతో సినిమాను రూపొందించారు. తమన్ అందించిన పాటలు, నేపథ్య సంగీతం ఆకట్టుకుంటాయి. గుహన్ అందించిన సినిమాటోగ్రఫీ సినిమా స్థాయిని పెంచింది. పాటల్లో విజువల్స్ బాగున్నాయి. ఎడిటింగ్ వర్క్ పర్వాలేదనిపిస్తుంది. కథ, కథనాల్లో కొత్తదనం లేకపోవడంతో రెగ్యులర్ కమర్షియల్ సినిమాల్లో ‘జవాన్’ కూడా ఒకటిగా మిగిలిపోతుంది.