అధిక జీతం ఉన్నవారికే హెచ్-1బీ వీసా?.. భారతీయ టెక్కీలకు లాభమా? నష్టమా?

అగ్రరాజ్యం అమెరికాలో అడుగు పెట్టాలని కలలుగనే విదేశీ నిపుణులకు, ముఖ్యంగా భారతీయ ఐటీ ఉద్యోగులకు అత్యంత కీలకమైన హెచ్-1బీ వీసా నిబంధనలు మారబోతున్నాయి. దశాబ్దాలుగా కొనసాగుతున్న అదృష్ట ఆధారిత 'కంప్యూటరైజ్డ్ లాటరీ' విధానానికి స్వస్తి పలికి.. దానికి బదులుగా అభ్యర్థి నైపుణ్యం, పొందే వేతనం ఆధారంగా వీసాలు కేటాయించే దిశగా అమెరికా ప్రభుత్వం అడుగులు వేస్తోంది. దీనికి సంబంధించిన ప్రతిపాదనలు ఇప్పుడు తుది సమీక్ష దశకు చేరుకున్నాయి.

తుది సమీక్షలో కొత్త నిబంధనలు

డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ రూపొందించిన ఈ కొత్త నిబంధనలను ప్రస్తుతం 'ఆఫీస్ ఆఫ్ మేనేజ్‌మెంట్ అండ్ బడ్జెట్'  సమీక్షిస్తోంది. అమెరికా ఫెడరల్ చట్టాల మార్పు ప్రక్రియలో ఈ సమీక్షను చివరి దశగా పరిగణిస్తారు. ఇక్కడ ఆమోదం లభించిన వెంటనే అధికారిక ప్రకటన వెలువడనుంది. అయితే 2026 నుంచి జరిగే హెచ్-1బీ వీసా కేటాయింపు ప్రక్రియలో ఈ కొత్త విధానాన్నే అమలు చేయాలని బైడెన్ ప్రభుత్వం భావిస్తోంది. ప్రముఖ ఇమిగ్రేషన్ సంస్థ 'ఫ్రాగోమెన్' నివేదిక ఆధారంగా ఈ కీలక మార్పులు వెలుగులోకి వచ్చాయి.

ఏమిటీ 'వెయిటెడ్ సెలక్షన్' సిస్టమ్?

ఇప్పటి వరకు వీసా దరఖాస్తులను కంప్యూటర్ ద్వారా లాటరీ తీసి ఎంపిక చేసేవారు. ఇందులో ఎవరికి వీసా దక్కుతుందో ఎవరూ ఊహించ లేకపోయేవారు. అయితే కొత్తగా ప్రవేశ పెట్టనున్న 'వెయిటెడ్ సెలక్షన్ సిస్టమ్' ప్రకారం.. ఉద్యోగులను వారి వార్షిక వేతనాల ఆధారంగా ఒకటి నుంచి నాలుగు స్థాయిలుగా వర్గీకరిస్తారు. అత్యధిక వేతనం పొందే నాల్గవ స్థాయి, మూడవ స్థాయి ఉద్యోగులకు వీసా దక్కే అవకాశాలు ఎక్కువగా ఉంటాయి. తక్కువ జీతానికి విదేశీయులను తెచ్చుకుని అమెరికన్ల ఉద్యోగాలకు గండి కొట్టే కంపెనీలకు చెక్ పెట్టడం.. కేవలం అత్యున్నత నైపుణ్యం కలిగిన నిపుణులను మాత్రమే దేశంలోకి ఆహ్వానించడం దీని ప్రధాన ఉద్దేశం.

ఈ కొత్త విధానం వల్ల అధిక వేతనం పొందే సీనియర్ సాఫ్ట్‌వేర్ ఇంజినీర్లు, నైపుణ్యం గల నిపుణులకు ప్రయోజనం చేకూరనుంది. అయితే కెరీర్ ప్రారంభంలో ఉండి తక్కువ వేతనానికి పని చేసే జూనియర్ టెక్కీలకు మాత్రం ఇది గట్టి దెబ్బేనని నిపుణులు హెచ్చరిస్తున్నారు. తక్కువ వేతన స్థాయిల్లో ఉండే దరఖాస్తుదారులకు ఈ వెయిటెడ్ సిస్టమ్ వల్ల వీసా దక్కడం దాదాపు కష్టతరం అవుతుంది. ప్రభుత్వం ఈ సమీక్షను వీలైనంత త్వరగా పూర్తి చేసి.. తుది నిబంధనల అడ్వాన్స్ కాపీని విడుదల చేయాలని చూస్తోంది. వచ్చే ఏడాది వీసా దరఖాస్తుల స్వీకరణ సమయానికే ఈ నిబంధనలు అమల్లోకి రావచ్చని అమెరికా వర్గాలు భావిస్తున్నాయి. ఇదే జరిగితే.. హెచ్-1బీ వీసా చరిత్రలో ఇదొక అతిపెద్ద మలుపు కానుంది.