రివ్యూ : రామ్ గోపాల్ వర్మ 'లక్ష్మీస్ ఎన్టీఆర్'

ఎపుడైతే బాలకృష్ణ..వాళ్ల నాన్న ఎన్టీఆర్ జీవిత కథపై సినిమా చేస్తున్నా అని అనౌన్స్ చేసాడో..అప్పుడే  రామ్ గోపాల్ వర్మ..‘లక్ష్మీస్ ఎన్టీఆర్’  సినిమాను అనౌన్స్ చేసాడు. ఇక బాలకృష్ణ..తన తండ్రి జీవితాన్ని రెండు భాగాలుగా తెరకెక్కించాడు. అందులో మొదటి భాగాన్ని ఎన్టీఆర్ ఫస్ట్ టైమ్ ముఖ్యమంత్రిగా ప్రమాణ స్వీకారం చేసిన జనవరి 9న రిలీజ్ చేస్తే..రామ్ గోపాల్ వర్మ మాత్రం ఎన్టీఆర్ ..తెలుగు దేశం వ్యవస్థాపక దినోత్సవమైన మార్చి 29న అనుకోకుండా రిలీజ్ చేయడం జరిగింది. మరి ఎన్టీఆర్ జీవిత చరమాంకంలో జరిగిన సంఘటనల నేపథ్యంలో రామ్ గోపాల్ వర్మ తెరకెక్కించిన లక్ష్మీస్ ఎన్టీఆర్‌తో ప్రజలకు వర్మ ఏం చూపెట్టాడో మన  మూవీరివ్యూలో చూద్దాం..

నటీనటుల విషయానికొస్తే..

ఈ సినిమాలో ఎన్టీఆర్ పాత్రలో నటించిన విజయ్ కుమార్ అనే రంగస్థల  నటుడు తన పరిధి మేరకు అచ్చు ఎన్టీఆర్ చూస్తున్న ఫీలింగ్ తీసుకొచ్చాడు. అన్నగారి ఆహార్యాన్ని డైలాగ్ డెలవరి విషయంలో నటించాడనేకంటే జీవించాడనే చెప్పాలి. మరోవైపు చంద్రబాబు నాయుడు పాత్రను చేసిన శ్రీతేజ్ తన యాక్టింగ్‌తో మెప్పించాడు. ముఖ్యంగా కుట్రలు, కుతంత్రాలు,రాజకీయాలు తెలిసిన వ్యక్తి పాత్రలో అద్భుతంగా ఒదిగిపోయాడు. మొత్తంగా ఈ సినిమా మొత్తాన్ని తన భుజాలపై మోసాడు. ఇక లక్ష్మీ పార్వతిగా నటించిన యజ్ఞాశెట్టి తర పరిధి మేరకు బాగానే నటించింది. అక్కడక్కడా కొంచెం ఓవర్ చేసినట్టు ఉంది. ఇక వర్మ కూడా ఆమె పాత్రను మదర్ థెరిసా తరహా పాత్రలో తీర్చిదిద్దాడు. మరోవైపు హరికృష్ణ,బాలకృష్ణ,మోహన్ బాబు, పురంధేశ్వరి పాత్రల్లో నటించిన నటీనటులతో పాటు మిగతా పాత్రల్లో నటించిన నటీనటులు పర్వాలేదనిపించారు.

టెక్నిషియన్స్ విషయానికొస్తే..

దర్శకుడు రామ్ గోపాల్ వర్మ, మరో దర్శకుడు అగస్త్య మంజుతో కలిసి ఈ సినిమాను తనకు తోచిన తెలిసిన యాంగిల్‌లో తెరకెక్కించినట్టు కనబడుతోంది. లక్ష్మీస్ ఎన్టీఆర్ సినిమా కోసం రామ్ గోపాల్ వర్మ అందరికి తెలిసిన నటీనటులను కాకుండా కొత్తవాళ్లతో ఈ సినిమా తెరకెక్కించాడాన్ని అభినందించాలి. ముఖ్యంగా ఎన్టీఆర్ పాత్రలో నటించిన రంగస్థల నటుడు ఎంపికలోనే వర్మ..మొదటి విజయాన్ని సాధించాడు. మరోవైపు లక్ష్మీ పార్వతిగా చేసిన యజ్ఞాశెట్టి పాత్రను కొంచెం ఓవర్‌గా చూపించినట్టు ఉంది. మరోవైపు మోహన్ బాబు..అన్నగారితో మేజర్ చంద్రకాంత్ సినిమా చేయడంలో లక్ష్మీ పార్వతి ప్రోద్భలం ఉందనే విషయాన్ని చూపించారు. మరోవైపు చంద్రబాబు నాయుడు పాత్రను టోటల్‌గా విలన్‌గా చిత్రీకరించాడు. ఇక చంద్రబాబు పాత్ర సినిమాలో కనిపించేటపుడు పాముకు సంబంధించిన నాదస్వరం మ్యూజిక్ పెట్టడం హైలెట్.ముఖ్యంగా రామోజీరావు ఈనాడు సపోర్ట్‌తోనే చంద్రబాబు..తెలుగు దేశం ఎమ్మెల్యేలను తనవైపు తిప్పుకొని ఎన్టీఆర్‌ను పదవీచ్యుతుడిని చేయించినట్టు చూపించారు. ఇక ఎన్టీఆర్ చనిపోయేటపుడు హరికృష్ణ,బాలకృష్ణలు దేశంలోనే లేరు.వారు చనిపోయినపుడు దగ్గరే ఉన్నట్టు చూపించారు. ఎన్టీఆర్ చనిపోయేటపుడు లక్ష్మీ పార్వతి దగ్గరగానే ఉంది. కానీ ఈ సినిమాలో ఆమెను ఎన్టీఆర్ పార్థివ దేహాన్ని చూడనీయకుండా దూరంగా ఉన్నట్టు వర్మ చూపించాడు. మొత్తానికీ సార్వత్రిక ఎన్నికల వేళ   ఈ సినిమా ఏపీ రాజకీయాలపై ఎలాంటి ప్రభావం చూపిస్తుందో కూడా చూడాలి. సంగీతం విషయానికొస్తే..కళ్యాణి మాలిక్ ఇచ్చిన సిట్యూవేషనల్ మ్యూజిక్ బాగుంది. చాలా రోజుల తర్వాత ఎస్పీ బాలసుబ్రహ్మణ్యం గొంతు ఈ సినిమాలో వినబడింది. కెమెరా వర్క్, పొడక్షన్ వాల్యూస్ బాగున్నాయి. మొత్తానికి ‘లక్ష్మీస్ ఎన్టీఆర్’ మూవీ వర్మ మార్క్‌ ఎన్టీఆర్ అనే చెప్పాలి.

ప్లస్

ఎన్టీఆర్ వెన్నుపోటు ఎపిసోడ్ 
చంద్రబాబు నాయుడు పాత్ర చిత్రీకరణ
రామ్ గోపాల్ వర్మ టేకింగ్
డైలాగ్స్

మైనస్  

స్లో నెరేషన్
క్లైమాక్స్ వెరీ స్లో