కల్వకుంట్ల కన్నారావు అరెస్ట్.. ఆ కేసులో ఆయనదే కీలక పాత్ర: ఆదిభట్ల సీఐ

లోక్‌సభ ఎన్నికలు సమీపిస్తోన్న వేళ తెలంగాణలో రాజకీయాలు రసవత్తరంగా మారుతున్నాయి. ఈ నేపథ్యంలో ప్రతిపక్ష బీఆర్ఎస్ గడ్డు కాలం ఎదుర్కోంది. ఓవైపు పార్టీలోని కీలక నేతలంతా కాంగ్రెస్ బాట పడుతుంటే.. మరోవైపు గులాబీ నేతల అరెస్టులు ఆ పార్టీ శ్రేణులను ఆందోళనకు గురి చేస్తున్నాయి. ఇప్పటికే మాజీ సీఎం కేసీఆర్ కుమార్తె.. ఎమ్మెల్సీ కల్వకుంట్ల కవిత ఢిల్లీ లిక్కర్ స్కాం కేసులో భాగంగా అరెస్ట్ కాగా.. ఇప్పుడు కల్వకుంట్ల కుటుంబానికి చెందిన మరొకరు అరెస్ట్ కావడం చర్చనీయాంశంగా మారింది.

కేసీఆర్ అన్న కుమారుడు కల్వకుంట్ల తేజేశ్వరరావు అలియాస్ కన్నారావు అరెస్ట్ అయ్యారు. కన్నారావును ఆదిభట్ల పోలీసులు అదుపులోకి తీసుకున్నారు. ల్యాండ్ కబ్జా ఆరోపణలతో ఇప్పటికే పోలీసులు నోటీసులు ఇవ్వగా.. అరెస్ట్ కాకుండా ఉండేందుకు ముందస్తు బెయిల్ పిటీషన్‌ దాఖలు చేయగా దాన్ని న్యాయస్థానం కొట్టేసింది. దీంతో.. పోలీసులు ఆయనను అరెస్ట్ చేశారు.

హైదరాబాద్ శివార్లలోని మన్నెగూడ వద్ద రెండెకరాల స్థలాన్ని కబ్జా చేయడానికి కన్నారావు ప్రయత్నించినట్లు బాధితులు ఫిర్యాదు చేశారు. ఈ ఫిర్యాదు మేరకు.. కన్నారావుతో పాటు మరో 38 మందిపై భూకబ్జా కేసులు నమోదు చేశారు. కాగా.. కన్నారావుపై ఐపీసీ సెక్షన్లు 307, 447, 427, 436, 148, 149 కింద ఆదిభట్ల పోలీసులు ఈ కేసు నమోదు చేసినట్టు సమాచారం.

మార్చి 3వ తేదీన కన్నారావు, ఆయన అనుచరులు మన్నెగూడాలో ల్యాండ్ కబ్జా చేసే ప్రయత్నం చేసినట్టుగా ఆదిభట్ల సీఐ రాఘవేంద్ర రెడ్డి వివరించారు. శ్రీనివాస్ అనే వ్యక్తి ఫిర్యాదు మేరకు కేసు నమోదు చేశామని.. 26 మంది కన్నారావు అనుచరులు JCB సహాయంతో ల్యాండ్‌లో ఉన్న కాంపౌండ్ వాల్‌ను కూలగొట్టినట్టుగా తెలిపారు. స్థలంలో ఉన్న వారిపై దాడి కూడా చేశారని తెలిపారు. జెక్కిడి సురేందర్ రెడ్డి, జెక్కిడి చంద్రారెడ్డి వద్ద 2 కోట్ల డబ్బులు తీసుకొని ల్యాండ్ సెటిల్ చేస్తానని కన్నారావు హామీ ఇచ్చినట్టు సీఐ పేర్కొన్నారు. ఈ కేసులో ఇప్పటివరకు 9 మందిని అరెస్ట్ చేశామని.. కన్నారావు పాత్రనే కీలకంగా ఉందని సీఐ రాఘవేంద్ర రెడ్డి తెలిపారు. కన్నారావుపై గతంలో కూడా భూకబ్జా కేసులు ఉన్నట్టు తెలుస్తోందని.. ఈరోజే కన్నా రావుని అరెస్టు చేశామని తెలిపారు. ఈ కేసులో మొత్తం 26 మందిని గుర్తించామని.. పరారీలో ఉన్న వారి కోసం గాలిస్తున్నామని తెలిపారు.