రేవంత్ సర్కార్ సంచలన నిర్ణయం.. ఫీజుల నియంత్రకు కొత్త చట్టం

సంచలన నిర్ణయాలతో దూసుకుపోతున్న సీఎం రేవంత్ రెడ్డి.. మరో కీలక నిర్ణయం తీసుకునే దిశగా అడుగులు వేస్తున్నారు. తెలంగాణలో ఇష్టానుసారంగా వ్యవహరిస్తున్న కార్పొరేట్ విద్యాసంస్థలపై కొరడా ఝుళిపించేందుకు రేవంత్ రెడ్డి సర్కార్ సిద్ధమైంది. పెరుగుతున్న ఫీజులపై తల్లిదండ్రుల నుంచి ప్రభుత్వానికి పెద్ద ఎత్తున ఫిర్యాదులు తలెత్తటంతో.. ఈ అంశంపై ప్రత్యేక దృష్టి సారించింది సర్కార్. తెలంగాణలో కార్పొరేట్ కాలేజ్‌లు ఇష్టారీతిన ఫీజులు వసూలు చేస్తుండటంపై రాష్ట్ర ప్రభుత్వం సీరియస్‌గా ఉన్నట్లు సమాచారం. ఫీజుల పేరుతో విద్యార్థులను వేధింపులకు గురి చేయడంతో గతంలో.. పదుల సంఖ్యలో విద్యార్థులు ఆత్మహత్యలు చేసుకున్న విషయం తెలిసిందే.

అయితే.. ఈ విషయంపై గతంలో పెద్ద ఎత్తున ఫిర్యాదులు అందినా.. బీఆర్ఎస్ ప్రభుత్వం తూతూమంత్రంగానే చర్యలు తీసుకుందన్న ఆరోపణలు వెల్లువెత్తాయి. అందుకు కారణం.. బీఆర్ఎస్ పార్టీలో ఉన్న చాలా మంది కీలక నేతలకు కార్పొరేట్ విద్యా సంస్థలు ఉండటమేనంటూ అభిప్రాయాలు వ్యక్తమయ్యాయి. కాగా.. ఇప్పుడు అధికారంలోకి వచ్చిన కాంగ్రెస్ ప్రభుత్వం.. ఫీజు దోపిడీకి పాల్పడుతూ సామాన్యుల నుంచి విద్యను దూరం చేస్తున్న కార్పొరేట్ విద్యాలయాలపై దృష్టి సారించింది. అనుమతులు లేకుండా కొనసాగుతోన్న కార్పొరేట్ కళాశాలలపై చర్యలు చేపట్టడమే కాకుండా.. ఫీజుల నియంత్రణకు ప్రత్యేక చట్టం కూడా తీసుకొచ్చే ఆలోచన చేస్తున్నట్టు తెలుస్తోంది.

అయితే.. ప్రస్తుతం లోక్ సభ ఎన్నికల కోడ్ నడుస్తుండటంతో.. ఎలక్షన్లు ముగిసిన వెంటనే అసెంబ్లీ సమావేశమై ఫీజుల నియంత్రణపై ప్రత్యేక చట్టం తీసుకొచ్చేందుకు కసరత్తు చేస్తున్నట్టు తెలుస్తోంది. ఈ మేరకు విధివిధానాలు సిద్ధం చేయాలని అధికారులకు సీఎం రేవంత్ రెడ్డి ఆదేశాలు కూడా ఇచ్చినట్టు సమాచారం. మరోవైపు.. పరీక్షలు పూర్తయి సెలవులు కూడా రావటం.. కొన్ని స్కూళ్లు, కాలేజీల్లో అడ్మీషన్లు కూడా ప్రారంభమవటంతో.. తల్లిదండ్రులు ఆందోళన వ్యక్తం చేస్తున్నారు. ఎన్నికలు పూర్తయి చట్టం చేసి.. అది అమల్లోకి వచ్చే సరికి అడ్మీషన్లు పూర్తయిపోయి తరగతులు కూడా ప్రారభమవుతాయంటూ వాపోతున్నారు.