చిన్న పిల్లల్లో పెరుగుతున్న మీజిల్స్ కేసులు.. తల్లిదండ్రుల నిర్లక్ష్యమే కారణం

తెలంగాణలో మీజిల్స్ (తట్టు) కేసులు అకస్మాత్తుగా పెరగుతున్నాయి. ముఖ్యంగా చిన్న పిల్లల్లో ఈ వ్యాధి తీవ్రత ఎక్కువగా ఉంది. 15 ఏళ్లలోపు పిల్లల్లో కేసులు పెరుగుతన్నట్లు నిపుణులు చెబుతున్నారు. గడచిన ఆరు నెలల్లో తెలంగాణలో వెయ్యికి పైగా కేసుల నమోదైనట్లు చెప్పారు. రాష్ట్రంలో 1500 మీజిల్స్‌ అనుమానిత కేసులపై ప్రత్యేక వైద్య పరీక్షలు చేయగా.. 921 మందికి పాజిటివ్‌గా నిర్ధారణ అయింది. ఈ కేసుల్లో అత్యధికంగా హైదరాబాద్‌లో నమోదయ్యాయి. తర్వాత స్థానం రంగారెడ్డి జిల్లాలో నమోదు కాగా.. మూడో స్థానంలో మేడ్చల్‌-మల్కాజిగిరి జిల్లా ఉంది. అన్ని జిల్లాల్లోనూ కేసులు నమోదైనట్లు చెప్పారు.

వ్యాధి సోకిన చిన్నారుల్లో తొమ్మిది నెలల్లోపు పిల్లలు 131 మంది ఉన్నారు. అయితే మొత్తం నమోదైన కేసుల్లో 237 మంది పిల్లలకు తల్లిదండ్రుల నిర్లక్ష్యం కారణంగానే వ్యాధిబారిన పడినట్లు చెప్పారు. పిల్లలకు మీజిల్స్ వ్యాక్సినేషన్‌ ఇప్పించకపోవటంతోనే వ్యాధి బారిన పడినట్లు చెప్పారు. మరో 128 మంది పిల్లలకు ఒక డోస్‌ మాత్రమే వ్యాక్సిన్ వేయించగా.. వారు కూడా వ్యాధికి గురయ్యారు. తల్లిదండ్రులు ఉదాసీనంగా వ్యవహరించి వ్యాక్సిన్‌లు వేయించకపోవడం పిల్లల పాలిట శాపంగా మారుతోందన్నారు.

మీజిల్స్‌-మంప్స్‌-రుబెల్లా వ్యాక్సిన్‌ను పిల్లలకు వేయించడం ద్వారా తట్టు, చికెన్‌పాక్స్‌ వంటివి వ్యాధులు రాకుండా అడ్డుకోవచ్చునని చెబుతున్నారు. చిన్న పిల్లలకు 12 నుంచి 15 నెలల్లోపు ఒక డోసు, నాలుగేళ్ల నుంచి ఆరేళ్లలోపు మరో డోసు వ్యాక్సిన్‌ వేయించాలని సూచిస్తున్నారు. ప్రాథమిక, పట్టణ ఆరోగ్యకేంద్రాలు, ప్రభుత్వ ఆసుపత్రుల్లో ఈ టీకా ఫ్రీగా వేస్తారన్నారు. చిన్న పిల్లల ప్రైవేటు ఆసుపత్రుల్లోనూ టీకా దొరుకుతుంది.

మీజిల్స్ లక్షణాలు ఇవీ..

మీజిల్స్ వైరస్ వల్ల అధిక జ్వరం, అలసట, తీవ్రమైన దగ్గు, శరీరంపై దద్దుర్లు, కళ్లు ఎరుపెక్కడం, నోటిలో మచ్చలు, ముక్కు కారటం వంటివి ఉంటాయి. తల నుంచి మొదలై.. ఇతర శరీర భాగాలకు వ్యాపిస్తుంది. ప్రధానంగా శ్వాసకోశ సమస్యలు ఏర్పడతాయి. వ్యాధిసోకిన వారం నుంచి రెండు వారాల్లో శరీరంపై తీవ్ర ప్రభావం చూపుతుంది. దగ్గు, తుమ్ముల ద్వారా మీజిల్స్‌ ఇతరులకు వ్యాపించే అవకాశం ఉంది. లక్షణాలు కనిపించిన వెంటనే నిర్లక్ష్యం చేయకుండా డాక్టర్లను సంప్రదించాలని సూచిస్తున్నారు.