‘పార్టీలకు అతీతంగా గౌరవం పొందారు’.. తెలంగాణ బీజేపీ ఎంపీకి లేఖ రాసిన రాహుల్ గాంధీ

తెలంగాణ బీజేపీ ఎంపీ ధర్మపురి అర్వింద్‌కు కాంగ్రెస్ కీలక నేత, లోక్ సభలో ప్రతిపక్ష నేత అయిన రాహుల్ గాంధీ లేఖ రాశారు. అర్వింద్ తండ్రి, కాంగ్రెస్ పార్టీ సీనియర్ నేత ధర్మపురి శ్రీనివాస్ ఇటీవల కన్నుమూసిన సంగతి తెలిసిందే. ఈ నేపథ్యంలోనే బీజేపీ ఎంపీకి రాహుల్ లేఖ రాశారు. ‘మీ తండ్రి మరణం ఎంతో బాధించింది. మనం ఓ గొప్ప నాయకుణ్ని కోల్పోయాం. ఉమ్మడి ఆంధ్రప్రదేశ్ రాజకీయాలపై డీఎస్ చెరగని ముద్ర వేశారు’ అని ఆ లేఖలో రాహుల్ గాంధీ పేర్కొన్నారు.

ఆంధ్రప్రదేశ్, తెలంగాణల్లో కాంగ్రెస్ పార్టీకి డీఎస్ చేసిన సేవలను ఎప్పటికీ మరువలేమన్న రాహుల్ గాంధీ.. ఆయన తన జీవితాన్ని ప్రజాసేవకు అంకితం చేశారని కొనియాడారు. డీఎస్ నాయకత్వం, నిర్వహణ నైపుణ్యాలు ఏపీలో కాంగ్రెస్ పార్టీకి తిరుగులేని విజయాన్ని అందించాయన్నారు. అన్నింటి కంటే ముఖ్యంగా.. ఎంత ఎదిగినా ఒదిగి ఉండే తీరు పార్టీలకు అతీతంగా ఆయన్ను ఇష్టపడేలా చేసిందన్నారు. ఆయన వారసత్వం మనలో స్ఫూర్తి నింపుతుందన్నారు.

‘తండ్రిని కోల్పోయిన మీరు ఎంత దుఃఖిస్తున్నారో, ఎంతో వేదనకు గురవుతున్నారో నేను అర్థం చేసుకోగలను. నా హృదయపూర్వక సంతాపాన్ని అంగీకరించండి. ఈ కష్ట కాలంలో మీ కోసం, మీ కుటుంబం కోసం నేను ప్రార్థిస్తున్నాను’ అని అర్వింద్‌కు రాసిన లేఖలో రాహుల్ గాంధీ పేర్కొన్నారు. జూన్ రెండో తేదీన రాహుల్ గాంధీ రాసిన ఈ లేఖను సోషల్ మీడియాలో పోస్టు చేసిన ధర్మపురి అర్వింద్.. ‘రాహుల్ గాంధీ జీ.. మా తండ్రి మరణం పట్ల సానుభూతి వ్యక్తం చేసినందుకు.. ఆయన గురించి గొప్పగా చెప్పినందుకు.. మా అమ్మ తరఫున, మా కుటుంబం తరఫున.. మీకు నా ధన్యవాదాలు’ అని అర్వింద్ ఎక్స్‌లో పోస్టు చేశారు.

కాంగ్రెస్ పార్టీ సీనియర్ నాయకుడైన ధర్మపురి శ్రీనివాస్ జూన్ 29న అనారోగ్యంతో మరణించిన సంగతి తెలిసిందే. ఉమ్మడి ఆంధ్రప్రదేశ్‌లో పీసీసీ చీఫ్‌గా వ్యవహరించిన డీఎస్.. వరుసగా రెండు పర్యాయాలు కాంగ్రెస్ పార్టీ అధికారంలోకి రావడంలో కీలక పాత్ర పోషించారు. ఏపీ కేబినెట్లో అనేక కీలకమైన పదవుల్లో పని చేశారు. తెలంగాణ ఏర్పాటయ్యాక 2015లో టీఆర్ఎస్‌లో చేరిన డీఎస్.. 2016 నుంచి 2022 వరకు రాజ్యసభ సభ్యుడిగా వ్యవహరించారు. ఆ తర్వాత ఆయన తిరిగి కాంగ్రెస్ గూటికి చేరారు. డీఎస్ పెద్ద కుమారుడు సంజయ్ కాంగ్రెస్ పార్టీలో కొనసాగుతుండగా.. చిన్న కొడుకైన అర్వింద్ బీజేపీలో చేరి వరుసగా రెండుసార్లు నిజామాబాద్ ఎంపీగా గెలిచారు.