హైదరాబాద్-బెంగళూరు మధ్య ప్రయాణాలు సాగించే వారికి గుడ్‌న్యూస్

హైదరాబాద్, బెంగళూరు నగరాలు సౌత్ ఇండియాలో టాప్ సిటీలు. ఇక్కడ అనేక ఐటీ పరిశ్రమలు ఉన్నాయి. రెండు మెట్రో నగరాల మధ్య నిత్యం వేల సంఖ్యలో ప్రయాణాలు సాగిస్తుంటారు. ఈ నేపథ్యంలో రెండు నగరాల మధ్య ప్రయాణాలు సాగించే వారికి కేంద్రం గుడ్‌న్యూస్ చెప్పింది. హైదరాబాద్-బెంగళూరు మధ్య ఉన్న 44వ నేషనల్ హైవేను విస్తరించాలని డిసైడ్ అయ్యింది. ప్రస్తుతం ఈ రహదారి 4 వరుసలుగా ఉండగా.. దాన్ని 12 వరుసలకు విస్తరించేందుకు సిద్ధమైంది. రెండు మహా నగరాల మధ్య ట్రాఫిక్ రద్దీ, భవిష్యత్ అవసరాల దృష్ట్యా రోడ్డు విస్తరణకు కేంద్రం సిద్ధమైంది. కేంద్ర దేశవ్యాప్తంగా ఎక్స్‌ప్రెస్‌ల వెంట ఎకానమిక్ జోన్లు (ఆర్థిక నడవాలు) ఏర్పాటు చేసి వాటికి ప్రోత్సాహకాలు కూడా ఉందిస్తోంది. ఈ నేపథ్యంలో తెలంగాణ-కర్ణాటక రాష్ట్రాలను పారిశ్రామికంగా మరింతగా అభివృద్ధి చేయటంలో ఈ రహదారి కీలకం కానుంది. ఈ నేపథ్యంలోనే రహదారి విస్తరణకు కేంద్రం ఒకే చెప్పింది. ఈ రహదారిని 12 వరసలుగా విస్తరించటం ద్వారా.. ఏపీలోని రాయలసీమ ప్రాంతం కూడా పారిశ్రామికంగా అభివృద్ది చెందనుంది.

హైదరాబాద్-బెంగళూరు జాతీయ రహదారి మెుత్తం పొడవు 576 కి.మీ కాగా.. తెలంగాణలో ఈ రహదారి విస్తీర్ణం 210 కి.మీ ఉంటుంది. ఏపీలో 260 కి.మీ, కర్ణాటకలో 106 కి.మీ పొడవు ఉంటుంది. ఇదంతా ఇప్పుడు 4 వరుసలుగా ఉండగా.. దాన్ని 12 వరుసలకు విస్తరించేందుకు కేంద్రం సిద్ధమైంది. ఈ రహదారి 12 వరుసలకు విస్తరిస్తే.. గణనీయమైన అభివృద్ది జరగనుంది. తెలంగాణతో పాటు ఏపీలోని ఈ రహదారి వెళ్లే ప్రాంతంలో భూముల ధరలు మరింతగా పెరగనున్నాయి.

ఇక హైదరాబాద్- అమరావతి మధ్య కూడా కొత్తగా ఎక్స్‌ప్రెస్ వే అందుబాటులోకి రానుంది. అమరావతి-హైదరాబాద్‌ మధ్య దూరం తగ్గించేందుకు ఈ ఎక్స్‌ప్రెస్‌ వేను అందుబాటులోకి తీసుకొస్తున్నారు. రెండు నగరాల మధ్య నేరుగా కనెక్టివిటీ ఏర్పడేందుకు.. గ్రీన్‌ఫీల్డ్‌ ఎక్స్‌ప్రెస్‌వే నిర్మించాలని ఏపీ ప్రభుత్వం కోరింది. ఎక్స్‌ప్రెస్‌వే హామీ విభజన చట్టంలోనూ ఉంది. ఏపీ ప్రభుత్వ విజ్ఞప్తి మేరకు ఎక్స్‌ప్రెస్‌వే నిర్మాణానికి కేంద్రం అంగీకారం తెలిపింది. హైదరాబాద్-అమరావతి మధ్య 201-220 కి.మీ. పొడవున ఆ రహదారి నిర్మాణం జరిగితే.. ప్రస్తుతం ఉన్న హైదరాబాద్ విజయవాడ హైవేపై ఒత్తిడి తగ్గుతుంది హైదరాబాద్-అమరావతి మధ్య దూరం 60-70 కి.మీ. మేర తగ్గుతుంది.