టాటా నిష్క్రమణ యావత్ దేశానికి తీరని లోటు: సీఎం రేవంత్

ప్రముఖ పారిశ్రామిక వేత్త, మానవతావాది టాటా గ్రూప్ ఛైర్మన్‌ రతన్‌ టాటా (86) మృతి పట్ల సీఎం రేవంత్ రెడ్డి తీవ్ర దిగ్ర్భాంతి వ్యక్తం చేశారు. ఈరోజు దేశం ఒక గొప్ప వ్యక్తిని కోల్పోయిందన్నారు. వారి నిష్క్రమణ పారిశ్రామిక రంగానికే కాకుండా యావత్ దేశానికి తీరని లోటు అని అన్నారు. రతన్ టాటా వ్యాపార రంగంలో నిబద్ధతకు, విలువలకు కట్టుబడిన గొప్ప వ్యక్తిగానే కాకుండా దాతృత్వానికి ప్రతీక అని ముఖ్యమంత్రి పేర్కొన్నారు.

పద్మవిభూషణ్ సహా అనేక గౌరవ పురస్కారాలు అందుకున్న రతన్ టాటా ఇక మన మధ్య లేకపోవడం బాధకరమన్నారు. టాటా చారిటబుల్ ట్రస్టు ద్వారా వారు ఎనలేని సేవలు అందించారని, విద్య, వైద్యం, గ్రామీణాభివృద్ధి రంగాల్లో విశిష్ట సేవలు అందించారని గుర్తుచేశారు. రతన్ టాటా ఆత్మకు శాంతి చేకూరాలని భగవంతుడిని ప్రార్థించారు. వారి కుటుంబానికి ప్రగాఢ సానుభూతి తీవ్ర సంతాపాన్ని తెలియజేశారు.

రతన్ టాటా మృతిపట్ల బీఆర్ఎస్ అధినేత, మాజీ సీఎం కేసీఆర్ సైతం దిగ్ర్భాంతి వ్యక్తం చేశారు. భారతీయ పారిశ్రామిక రంగాన్ని మార్చి.. తరాలకు స్ఫూర్తినిచ్చిన దార్శనిక నాయకుడు రతన్ టాటా అని కేసీఆర్ కొనియాడారు. ఆయన ఆవిష్కరణ, సమగ్రత, దాతృత్వం, వారసత్వం మన హృదయాల్లో శాశ్వతంగా నిలిచి ఉంటుందన్నారు. టాటా చేసిన సేవలకు హృదయపూర్వకంగా కృతజ్ఞులమై ఉంటామన్నారు.

తాము టీహబ్ ని చూసిన ప్రతిసారీ, రతన్ టాటాను గుర్తుంచుకుంటామని మాజీమంత్రి, బీఆర్ఎస్ వర్కింగ్ ప్రెసిడెంట్ కేటీఆర్ అన్నారు. నిజమైన ఆవిష్కర్త, అద్భుతమైన మానవుడు, అనేకమందికి ప్రేరణగా నిలిచిన వ్యక్తి రతన్ టాటా మరణం వ్యాపార, దాతృత్వం, మానవత్వ ప్రపంచానికి తీరని లోటన్నారు. భౌతికంగా దూరమైనా.. మా అందరి హృదయాలలో నివసిస్తుంటారన్నారు. ప్రపంచాన్ని మెరుగైన ప్రదేశంగా మార్చాలని కోరుకునే ప్రతి ఒక్కరికీ టాటా స్ఫూర్తిని కలిగి ఉంటారన్నారు.

వయోభారంతో గత కొన్ని రోజులుగా ఇబ్బందులు పడుతున్న టాటా ముంబైలోని ఆస్పత్రిలో చికిత్స పొందుతూ కన్నుమూశారు. బుధవారం (అక్టోబర్ 09న) రాత్రి 11 గంటల సమయంలో తుదిశ్వాస విడిచారు. అంతకు రెండ్రోజుల ముందు వయోభారానికి సంబంధించిన పలు అనారోగ్య సమస్యల కారణంగా హాస్పిటల్‌లో చేరారు. క్రమంగా టాటా ఆరోగ్యం క్షీణిస్తూ వస్తుండటంతో.. ఆయనను ఇంటెన్సివ్ కేర్‌లో ఉంచి ట్రీట్‌మెంట్ అందించారు. టాటా పరిస్థితి పూర్తిగా విషమించటంతో చికిత్స పొందుతూనే ప్రాణాలు కోల్పోయారు.