చిన్నపిల్లాడికి తినిపిస్తుండగా,,,,ఇడ్లీలో జెర్రీ ప్రత్యక్షం

బయట ఏం తిన్నాలన్న ఒకటికి వందసార్లు ఆలోచించాల్సిన పరిస్థితి ఎదురైంది. ప్రస్తుతం ప్రతీదాంట్లో కల్తీ జరుగుతున్న సంఘటనలు వెలుగుచూస్తున్న నేపథ్యంలో.. ఈమధ్య ఎందులో ఏం కనిపిస్తుందో అన్న ఆందోళన కూడా ప్రజల్లో మొదలైంది. బిర్యానీలో బొద్దింక, సాంబారులో ఎలుక, పప్పులో జెర్రీ.. ఇలా ఒక్కో దగ్గర ఒక్కో ఘటన వెలుగులోకి వస్తుండటంతో.. జనాలు బయట తినాలంటేనే బెంబేలెత్తిపోతున్నాయి. ఇటీవలో హైదరాబాద్‌లోని ఓ ఫేమస్ హోటల్‌లో పప్పులో జెర్రీ ప్రత్యక్షమవటం అందరినీ ఆందోళనకు గురి చేసింది. ఈ ఘటన పూర్తిగా మర్చిపోకముందే.. మరో ఘటన వెలుగుచూసింది. జగిత్యాలలోని ఓ పేరుపొందిన హోటల్‌లో ఇడ్లీలో జెర్రీ దర్శనమిచ్చింది. అది కూడా ఓ చిన్నపిల్లాడికి తినిపిస్తుండగా కనిపించటం గమనార్హం.

జగిత్యాల జిల్లా కేంద్రంలోని టిఫిన్స్‌కు ఫేమస్ అయిన.. గణేష్ భవన్ ఉడిపి హోటల్‌కు ఆదివారం (అక్టోబర్ 13న) రోజున ఓ కస్టమర్ తన కుటుంబంతో సహా వచ్చాడు. తన రెండేళ్ల కొడుకుకు తినిపించేందుకు ఇడ్లీ వడ ఆర్డర్ చేశాడు. వాళ్లు ఇచ్చిన పార్సిల్ తీసి.. పిల్లాడికి తినిపిస్తున్న క్రమంలో.. అందులో జెర్రీ అవశేషాలు కనిపించాయి. అది చూసి.. షాక్ అయిన ఆ కుటుంబం వెంటనే.. హోటల్ యజమానిని ప్రశ్నించగా.. నిర్లక్ష్యంగా సమాధానం ఇచ్చాడు. మిగతా కస్టమర్లు కూడా ఆగ్రహం వ్యక్తం చేయటంతో.. అది జెర్రీ కాదని.. పేపర్ అని కాసేపు, దారం అని మరికాసేపు బుకాయించాడు. నోట్లో వేసుకుని తినిచూపించాలని కూడా ప్రయత్నించాడు. కానీ.. అది జెర్రీ అని తేలటంతో వెంటనే ఉమ్మేశాడు.

దీంతో.. ఆ ఇడ్లీలను చెత్తడబ్బాలో పడేయటానికి ప్రయత్నించిన హోటల్ సిబ్బందిని అడ్డుకుని.. వెంటనే పోలీసులకు సమాచారం అందించారు. ఈ క్రమంలో.. హోటల్ యజమాని బాధితులతో వాగ్వాదానికి దిగాడు. హుటాహుటిన ఘటనాస్థలికి చేరుకున్న పోలీసులు కస్టమర్లందరినీ బయటికి పంపించేసి.. హోటల్‌ని మూసేశారు. ఫుడ్ సేఫ్టీ అధికారులు ఫుడ్ ఐటమ్స్ పరిశీలించి.. హోటల్‌‍కు జరిమానా కూడా విధించారు. ఇలాంటి ఘటనలు పునరావృత్తం కాకుండా కఠిన చర్యలు తీసుకోవాలని కస్టమర్లు కోరుతున్నారు. చిన్న చిన్న పిల్లల కోసం చాలా మంది హోటల్ నుంచి టిఫిన్స్ తీసుకెళ్తుంటారని.. ఇలా జెర్రీలు, బల్లులు వస్తే.. పిల్లలకు ఏమైనా జరిగితే పరిస్థితి ఏంటని కస్టమర్లు ఆందోళన వ్యక్తం చేస్తున్నారు.