తెలంగాణ రైతులకు గుడ్‌న్యూస్.. నేడు అకౌంట్లలో డబ్బులు జమ, చెక్ చేసుకోండి..

తెలంగాణ ప్రభుత్వం అనేక రైతు సంక్షేమ పథకాలు అమలు చేస్తోన్న సంగతి తెలిసిందే. ఇప్పటికే రూ. 2 లక్షల రైతు రుణమాఫీ చేయగా.. నేడో రేపో రైతు భరోసా పథకం కింద పంట పెట్టుబడి సాయం అందించేందుకు సిద్ధమైంది. ఇప్పటికే విధివిధానాలు రూపొందించే పనిలో నిమగ్నమైంది. ఇక రాష్ట్రంలో సన్నాల సాగును ప్రోత్సహించేందుకు బోనస్‌ ప్రకటించించిన విషయం తెలిసింది. సన్న వరి ప్రతి క్వింటాకు రూ.500 ఇస్తామన్నారు. ఇప్పటికే రాష్ట్రంలో ధాన్యం కొనుగోళ్లు ప్రారంభమయ్యాయి.

రాష్ట్రవ్యాప్తంగా దొడ్డు వడ్లకు, సన్నాలకు వేర్వేరు కేంద్రాలను ఏర్పాటు చేశారు. ప్రభుత్వ నిర్ణయంతో ఈ సీజన్‌లో అన్నదాతలు పెద్ద ఎత్తున సాగు చేశారు. రాష్ట్రవ్యాప్తంగా దొడ్డు రకం వడ్లు 23,58,344 ఎకరాల్లో సాగు చేయగా.. సన్నాలు 36,80,425 ఎకరాల్లో సాగు చేశారు. సన్న వరి ధాన్యం 48.91 లక్షల టన్నులు, దొడ్డు రకం వరి ధాన్యం 42.37 లక్షల టన్నులు కొనుగోలు కేంద్రాలకు వస్తాయని అధికారులు అంచనా వేస్తున్నారు. నిజామాబాద్, కామారెడ్డి, యాదాద్రి, నల్గొండ, సూర్యాపేట జిల్లాల ఎక్కువగా సన్న వరి ధాన్యం కొనుగోలు కేంద్రాలకు వస్తున్నాయి.

అయితే సన్న వరి ధాన్యం అమ్మిన రైతులకు బోనస్‌ రూ.500 కోసం ఎదురు చూస్తున్నారు. ఆ డబ్బులు రైతులకు చెల్లించేందుకు ప్రభుత్వం అవసరమైన అన్ని ఏర్పాట్లు చేసింది. వరి ధాన్యం బోనస్‌ చెల్లింపు డబ్బులు నేడు లేదా రేపటి నుంచి రైతుల ఖాతాల్లో జమ చేసేందుకు సిద్ధమవుతున్నారు. ప్రతి క్వింటాకు రూ.500 చొప్పున మెుత్తం 48.91 లక్షల టన్నులకు రూ.2,445 కోట్ల బోనస్‌ డబ్బులు రైతులకు చెల్లించాలని వ్యవసాయశాఖ అధికారులు నిర్ణయం తీసుకున్నారు.

కేంద్ర ప్రభుత్వం ప్రస్తుతం వరికి మద్దతు ధర ఇస్తోంది. గ్రేడ్‌ A రకానికి 2,320, సాధారణ రకానికి 2,300 చెల్లిస్తున్నారు. అయితే రైతులకు చెల్లించే రూ. 500 బోనస్‌ను రాష్ట్ర ప్రభుత్వమే భరించాల్సి ఉంటుంది. ఈ నేపథ్యంలో తొలి విడతగా బోనస్ చెల్లింపునకు రూ.వెయ్యి కోట్ల నిధుల్ని రాష్ట్ర ప్రభుత్వం ఇప్పటికే విడుదల చేసింది. కొనుగోలు కేంద్రాల్లో ధాన్యం అమ్మిన అన్నదాతలందరికీ తొలుత మద్దతు ధర చెల్లించనున్నారు. తర్వాత సన్నాల బోనస్‌ డబ్బులు కూడా చెల్లింపులు చేస్తారు. ఆర్థికశాఖ ఈ-కుబేర్‌ ద్వారా రైతుల ఖాతాలో బోనస్‌ సొమ్ము జమ చేయనున్నారు.