వాళ్లు అనుకుంటే రామరాజ్య స్థాపన కష్టమేమీ కాదు..,చినజీయర్ స్వామి

చిలుకూరు బాలాజీ ఆలయ ప్రధాన అర్చకులు సీఎస్ రంగరాజన్ మీద జరిగిన దాడిపై త్రిదండి చిన్నజీయర్‌ స్వామి స్పందించారు. రంగరాజన్‌పై జరిగిన దాడి ఎంతమాత్రం ఆమోదయోగ్యం కాదని అభిప్రాయపడ్డారు. ప్రస్తుత సమాజంలో ఆలయాల అర్చకుల పరిస్థితి బాగోలేదని ఆవేదన వ్యక్తం చేశారు. అర్చకుల ఆర్థిక పరిస్థితికి, విద్యా అవకాశాలు లేకపోవడానికి చాలా కారణాలు ఉన్నాయని చెప్పుకొచ్చారు. రంగరాజన్ మీద జరిగిన దాడి విషయం తనకు తెలిసిందని.. హింస ద్వారా రామరాజ్యం స్థాపన జరగటమనేది అసాధ్యమని చినజీయర్ స్వామి అభిప్రాయపడ్డారు.

సమాజంలో హింసకు తావు లేదన్న ఆయన, తీవ్రవాదంతోనో ఉగ్రవాదంతోనో సాధించేది ఏమీ లేదని స్పష్టం చేశారు. అలాంటి వాటి వల్ల కేవలం తాత్కాలిక లాభాలు చేకూరుతాయని.. కానీ అవి శాశ్వతం కాదని తెలిపారు. రామరాజ్య స్థాపన రాజ్యాంగబద్ధంగా జరగాలని చిన్నజీయర్ స్వామి ఆకాంక్షించారు. రామరాజ్య స్థాపన అనేది ఏ ఒక్కరితోనో సాధ్యమయ్యేది కాదన్నారు. సమాజంలోని ప్రజలంతా ముక్తకంఠంతో అనుకుంటే రామరాజ్య స్థాపన కష్టమేమి కాదని చెప్పుకొచ్చారు.

మరోవైపు.. రంగరాజన్ మీద జరిగిన దాడి ఘటనపై రాజకీయ, ఆధ్యాత్మిక వేత్తలు స్పందిస్తున్నారు. రంగరాజన్ మీద జరిగిన దాడిని తీవ్రంగా ఖండిస్తున్నారు. ఇప్పటికే బీఆర్ఎస్ వర్కింగ్ ప్రెసిడెంట్ కేటీఆర్, కేంద్ర మంత్రి బండి సంజయ్ కుమార్, ఏపీ డిప్యూటీ సీఎం పవన్ కళ్యాణ్ కూడా స్పందిచారు. రంగరాజన్ మీద దాడి జరగటం దురదృష్టకరమన్నారు. ఇది ఒక వ్యక్తిపై జరిగిన దాడిగా కాకుండా.. ధర్మపరిరక్షణపై దాడిగా భావించాలన్నారు.

ఫిబ్రవరి 7వ తేదీ తెల్లవారుజామున సుమారు 20 మంది చిలుకూరు బాలాజీ ఆలయంలోని తన ఇంటికి వచ్చి తనపై, తన కుమారిడిపై దాడి చేసినట్టుగా రంగరాజన్ మొయినాబాద్ పోలీసులుకు ఫిర్యాదు చేశారు. వీర రాఘవరెడ్డితో పాటు ముగ్గురు, నలుగురు తనపై దాడి చేస్తుంటే.. కొందరు ఆ దాడిని వీడియో చిత్రీకరించారని ఫిర్యాదులో పేర్కొన్నారు. తమ మాట వినకపోతే తీవ్ర పరిణామాలు ఉంటాయని.. ఫలితం భయానకంగా ఉంటుందని హెచ్చరించినట్లు తెలిపారు. తన సైన్యం కోసం మనుషులను రిక్రూట్‌ చేయాలని.. తనకు మద్దతు ఇవ్వాలని బెదిరించినట్లు వివరించారు. తాను మాట్లాడడానికి ప్రయత్నించినప్పుడల్లా.. తనను కొట్టారని, తాను మాట్లాడకూడదని, వినాల్సిందే అంటూ బెదిరించినట్టుగా రంగరాజన్ ఫిర్యాదులో పేర్కొన్నారు.