అమెరికా అధ్యక్ష ఎన్నికలు.. ముందంజులో దూసుకు పోతున్న ట్రంప్

అమెరికా అధ్యక్ష ఎన్నికల ఫలితాలు వెలువడుతున్నాయి. ఈ ఫలితాల్లో రిపబ్లికన్‌ పార్టీ అభ్యర్థి డొనాల్డ్‌ ట్రంప్‌, డెమోక్రటిక్‌ పార్టీ అభ్యర్థి కమలా హారిస్‌ మధ్య పోరు హోరాహోరీగానే సాగుతోంది.తొలుత ట్రంప్‌ ఆధిపత్యం ప్రదర్శించినప్పటికీ.. హారిస్‌ కూడా బలంగా పుంజుకున్నారు. ఇప్పటివరకు వెలువడిన ఫలితాల ప్రకారం..ట్రంప్‌  230 ఎలక్టోరల్‌ ఓట్లతో ఆధిక్యంలో కొనసాగుతున్నారు. ప్రస్తుతం ఆయన కాన్సస్‌, అయోవా, మోంటానా, యుటా, నార్త్‌ డకోటా, వయోమింగ్‌, సౌత్‌ డకోటా, నెబ్రాస్కా, ఓక్లహోమా, టెక్సాస్‌, ఆర్కాన్సాస్‌, లూసియానా, ఇండియానా, కెంటకీ, టెన్నెసీ, మిస్సోరి, మిసిసిపి, ఒహాయో, వెస్ట్‌ వర్జీనియా, అలబామా, సౌత్‌ కరోలినా, ఫ్లోరిడా, ఐడహో, నార్త్‌ కరోలినా రాష్ట్రాలను సొంతం చేసుకున్నారు.

ఇక, అమెరికా ఎన్నికల ఫలితాల్లో డెమోక్రటిక్‌ పార్టీ అభ్యర్థి కమలా హారిస్‌  205 ఎలక్టోరల్‌ సీట్లను కైవసం చేసుకున్నారు. కాలిఫోర్నియా, ఓరెగన్‌, వాషింగ్టన్‌, న్యూ మెక్సికో, వర్జీనియా, ఇల్లినోయీ, న్యూజెర్సీ, మేరీల్యాండ్‌, వెర్మాంట్‌, న్యూయార్క్‌, కనెక్టికట్‌, డెలవేర్‌, మసాచుసెట్స్‌, రోడ్‌ ఐల్యాండ్‌, కొలరాడో, డిస్ట్రిక్ట్‌ ఆఫ్‌ కొలంబియాను సొంతం చేసుకున్నారు.అత్యంత కీలకమైన స్వింగ్‌ స్టేట్‌ జార్జియాలో డెమోక్రటిక్‌ పార్టీ  అభ్యర్థి కమలా హారిస్‌ ఎదురీదుతున్నారు. 2020 ఎన్నికల్లో ఈ రాష్ట్రం డెమోక్రట్లకు 16 ఎలక్టోరల్‌ ఓట్లను తీసుకొచ్చింది. ప్రస్తుతం ఇక్కడ రిపబ్లికన్‌ పార్టీ అభ్యర్థి ట్రంప్‌ ఆధిక్యంలో ఉన్నారు. అటు పెన్సిల్వేనియా (19 ఓట్లు)లో తొలుత హారిస్‌ జోరు కనబడగా.. ప్రస్తుతం ట్రంప్‌ ముందంజలోకి వచ్చారు.