ఏపీలో ఇంటర్ విద్యార్థులకు ఈ విషయం తెలుసా.. కొత్త రూల్ అమల్లోకి, వివరాలివే

ఆంధ్రప్రదేశ్ ప్రభుత్వం ఇంటర్ విద్యార్థులకు సరికొత్త రూల్ తీసుకొచ్చింది. జూనియర్‌ కాలేజీల్లో విద్యా ప్రమాణాలు పెంచడంతో పాటు, ఉత్తీర్ణత శాతాన్ని పెంచేందుకు కీలక నిర్ణయం తీసుకుంది. కొత్తగా విద్యార్థులకు ప్రోగ్రెస్‌ కార్డుల విధానాన్ని తీసుకొచ్చింది. ఫస్టియర్, సెకండియర్ విద్యార్థుల తల్లిదండ్రుల సంతకాలు తప్పనిసరి చేస్తోంది. ప్రోగ్రెస్ కార్డులకు సంబంధించి ఉత్తర్వులు కూడా జారీ అయ్యాయి. ఈ ఏడాది నుంచి ఈ విధానాన్ని అమలు చేస్తున్నారు.. అన్ని ప్రభుత్వ, ఎయిడెడ్‌ కళాశాలల్లో పరీక్షలు నిర్వహించి.. మార్కుల వివరాలు ప్రోగ్రెస్‌ కార్డుల్లో నమోదు చేస్తారు. ఈ కార్డుల్ని తీసుకెళ్లి విద్యార్థులు తల్లిదండ్రులకు చూపించి వారితో సంతకాలు చేయించి కాలేజీకి తెచ్చి ఇవ్వాల్సి ఉంటుంది.

ఇంటర్‌లో నెలకు ఒకటి చొప్పున నాలుగు యూనిట్‌ టెస్ట్‌లు, ఒక క్వార్టర్లీ, ఒక ఆఫ్ ఇయర్లీ పరీక్షలతో పాటు.. ప్రీ ఫైనల్‌ పరీక్షలు రెండుసార్లు నిర్వహిస్తారు. ఏడాదిలో జరిగే 8 పరీక్షల వివరాలు ఈ ప్రోగ్రె్ కార్డులో నమోదు చేస్తారు. విద్యార్థులు ఎన్ని రోజులు కాలేజీకి వస్తున్నారనే వివరాలూ నమోదు చేస్తారు. ఇంటర్‌లో వృత్తి విద్యా కోర్సులు చదివే వారికి తెల్ల రంగు, జనరల్‌ ఫస్టియర్ చదివే వారికి లేత పసుపు రంగు, సెకండియర్ విద్యార్థులకు లేత నీలం రంగుల్లో కార్డులు ప్రింట్ చేశారు.

గత కొంతకాలంగా ప్రైవేటు కళాశాలల్లో ఉత్తీర్ణత శాతం ఎక్కువగా ఉండటం.. ప్రభుత్వ కాలేజీల్లో తక్కువగా నమోదవుతుండటంతో ప్రభుత్వం ఈ నిర్ణయం తీసుకుంది. కార్పొరేట్‌కు దీటుగా ప్రభుత్వ కాలేజీలను తీర్చిదిద్దే దిశగా అడుగులు పడుతున్నాయి. అందుకే ఈ ప్రోగ్రెస్ కార్డుల విధానాన్ని అమలు చేస్తున్నారు. అలాగే కాలేజీలు నిర్వహించే తల్లిదండ్రుల సమావేశంలో విద్యార్థి వివరాల ఈ కార్డుల ద్వారా చర్చకు వస్తాయంటున్నారు. ఈ ప్రోగ్రెస్ కార్డులతో వెనుకబడిన విద్యార్థుల వివరాలు లెక్చరర్లు, తల్లిదండ్రులకు ముందుగానే తెలుస్తుందని.. వారిని బాగా చదివించేందుకు అవకాశం ఉంటుందంటున్నారు. ఈ విధానంతో ఉత్తీర్ణత శాతం పెరుగుతుందని భావిస్తున్నారు. హాజరు వివరాలు ప్రోగ్రెస్ కార్డులో ప్రస్తావిస్తారు కాబట్టి.. విద్యార్థులు సక్రమంగా కాలేజీకి వెళ్తున్నారా లేదా అన్నది తల్లిదండ్రులకు తెలుస్తుంది అంంటున్నారు. రెండు నెలలకు తల్లిదండ్రులతో ఒకసారి కాలేజీలో సమావేశం నిర్వహిస్తారు.

ప్రభుత్వం తీసుకొచ్చిన ఈ ప్రోగ్రెస్‌ కార్డు విధానంతో విద్యార్థులకు మంచి మార్పులు వస్తాయంటున్నారు. తల్లిదండ్రులు ప్రతీ నెలా తమ పిల్లలు ఎలా చదువుతున్నారో తెలుసుకునే అవకాశం ఉంటుంది. వారికి వచ్చే మార్కులను బట్టి అధ్యాపకులకూ విద్యార్థిపై ఓ స్పష్టత వస్తుంది. కచ్చితమైన మార్కులు, హాజరుశాతం పూర్తి వివరాలతో కార్డుల్ని అందజేయనున్నారు. మొత్తం మీద ప్రభుత్వం తీసుకొచ్చిన ఈ ప్రోగ్రెస్ కార్డుల విధానంపై ప్రశంసలు వస్తున్నాయి.