మూడ్రోజులకు ఒక మరణం.. మృత్యుమార్గంగా మారిన రైలుమార్గం.. కారణమదేనట!

రైల్వేశాఖ ఎన్ని జాగ్రత్తలు తీసుకుంటున్నా.. దేశంలో అక్కడక్కడా రైలు ప్రమాద ఘటనలు జరుగుతూ ఉండటం చూస్తున్నాం. రైలు సిబ్బంది నిర్లక్ష్యం కారణంగా జరిగే ప్రమాదాలు కొన్ని అయితే.. రైలు పట్టాలను దాటే సమయంలోనో లేదా ఆత్మహత్యల కారణంగా మరికొన్ని మరణాలు సంభవిస్తూ ఉంటాయి. కానీ ఆంధ్రప్రదేశ్‌లోని ఆ రైలు మార్గం మాత్రం మృత్యుమార్గంగా మారుతోంది. ఆ మార్గంలో జరిగిన ప్రమాదాలు.. సంభవించిన మరణాల సంఖ్యను గమనిస్తే.. ఇది నిజమేనని ఒప్పుకోక తప్పదు.

విజయవాడ రైల్వే డివిజన్ పరిధిలోని దువ్వాడ తుని రైలు మార్గం.. మృత్యుమార్గంగా మారుతోంది. దువ్వాడ - తుని మధ్య 80 కిలోమీటర్ల మేర రైలు మార్గం ఉంది. అయితే ఈ మార్గంలో ఈ ఏడాది జనవరి ఆరంభం నుంచి అక్టోబర్ 31 వరకూ 104 మరణాలు సంభవించాయని లెక్కలు చెబుతున్నాయి. దీని ప్రకారం దువ్వాడ - తుని రైలు మార్గంలో ప్రతి మూడు రోజులకు ఒక మరణం సంభవిస్తోంది. ఈ 104 మరణాల్లో కదిలే రైలు నుంచి పడిపోయి 41 మంది ప్రాణాలు కోల్పోయారు. మరో 41 మంది రైలు పట్టాలు దాటే సమయంలో రైలు ఢీకొనడంతో చనిపోయారు. 17 మంది రైల్వే ట్రాక్‌పై ఆత్మహత్యకు పాల్పడ్డారని, మరో ఐదుగురు సహజంగా లేదా ఇతరత్రా కారణాలతో చనిపోయారని అధికారిక లెక్కలు వెల్లడించాయి.

80 కిలోమీటర్ల మేరకు ఉన్న దువ్వాడ - తుని రైలు మార్గం అత్యంత రద్దీగా ఉంటుంది. ప్రతిరోజూ సగటున 140 నుంచి 150 రైళ్లు ఈ మార్గం గుండా రాకపోకలు సాగిస్తుంటాయి. ఇక చనిపోయిన వారిలో ఎక్కువ మంది బిహార్, పశ్చిమ బెంగాల్ వంటి రాష్ట్రాల నుంచి వచ్చిన వలస కార్మికులే ఉన్నారు. చనిపోయిన వారిలో 69 మందిని గుర్తించగా.. మరో 35 మృతదేహాలు ఎవరివనేది ఇప్పటికీ తెలియడం లేదు. అయితే దువ్వాడ - తుని రైలు మార్గంలో ఈ స్థాయిలో మరణాలకు అనేక కారణాలు ఉన్నాయని అధికారులు చెప్తున్నారు.

దువ్వాడ - తుని రైలు మార్గం ఎక్కువగా జనసాంద్రత ఉన్న ప్రాంతాల గుండా వెళ్తుంది. అంటే గ్రామాల మీదుగా రైలు మార్గం ఉంది. రైలు పట్టాలకు ఇరువైపులా గ్రామాలు ఉండటంతో జనం పట్టాలు దాటేటప్పుడు ప్రమాదాలు జరుగుతున్నాయని అధికారులు చెప్తున్నారు. అలాగే ప్రమాదకరమైన ప్రాంతాలలో ఫెన్సింగ్ వంటి ఏర్పాట్లు చేయలేదు. దీంతో రైళ్లను గమనించకుండా నిర్లక్ష్యంగా పట్టాలు దాటడం వలనే ప్రమాదాలు జరుగుతున్నాయని అధికారులు చెప్తున్నారు. ఈ కారణాలతోనే గత పది నెలల కాలంలో ప్రతి రోజు ఒక మరణం సంభవించిందని చెప్తున్నారు. రైలు పట్టాలు దాటడం గురించి స్థానికులకు అవగాహన కల్పిస్తున్నట్లు చెప్తున్నారు.