అంగన్వాడీలకు గ్రాట్యుటీ.. మంత్రి గుమ్మడి సంధ్యారాణి కీలక ప్రకటన

ఆంధ్రప్రదేశ్‌లోని అంగన్వాడీ కార్యకర్తలకు మంత్రి గుమ్మడి సంధ్యారాణి కీలక వార్త వినిపించారు. అంగన్వాడీ కార్యకర్తల ఆందోళనపై స్పందించిన మంత్రి.. ఈ మేరకు ఓ ప్రకటన విడుదల చేశారు. నవంబర్ 16న అంగన్వాడీ కార్యకర్తలు జిల్లా కలెక్టరేట్ల వద్ద చేసిన ఆందోళనలు తమ దృష్టికి వచ్చాయని మంత్రి చెప్పారు. అంగన్వాడీ కార్యకర్తల సమస్యల పరిష్కారానికి ఆంధ్రప్రదేశ్ ప్రభుత్వం సిద్ధంగా ఉందన్న గుమ్మడి సంధ్యారాణి.. వారితో చర్చించి దశల వారీగా అన్ని సమస్యలను పరిష్కరిస్తామని చెప్పారు. అలాగే అంగన్వాడీ సిబ్బందికి గ్రాట్యుటీ చెల్లింపు విషయాన్ని కూడా ప్రభుత్వం పరిశీలిస్తున్నట్లు మంత్రి గుమ్మడి సంధ్యారాణి వెల్లడించారు. అంగన్వాడీ సిబ్బంది సానుకూలంగా ఆలోచించి సేవలకు ఆటంకం కలగకుండా చూడాలన్న మంత్రి.. వారి సమ్మె వలన చిన్నారులు, బాలింతలు, గర్భిణులు ఇబ్బంది పడతారని అన్నారు. ఆందోళనలకు వెళ్లవద్దని సూచించారు.

మరోవైపు ఆంధ్రప్రదేశ్‌లో 55,607 అంగన్వాడీ కేంద్రాలు ఉన్నట్లు మంత్రి గుమ్మడి సంధ్యారాణి చెప్పారు. ఈ అంగన్వాడీ కేంద్రాలలో 5,31,446 గర్భిణులు, బాలింత తల్లులు, 13,03,384 మంది మూడేళ్ల లోపు పిల్లలు, 7 లక్షల మంది వరకూ మూడేళ్ల నుంచి ఆరేళ్ల లోపు వయసు పిల్లలకు ఆరోగ్య, పోషకాహార సేవలు అందిస్తున్నట్లు ప్రకటనలో వివరించారు. అంగన్వాడీ కార్యకర్త, సహాయకురాలు తల్లీ పిల్లల ఆరోగ్యానికి చేస్తున్న కృషి అభినందనీయమన్న మంత్రి.. ఆందోళనలకు వెళ్లవద్దంటూ విజ్ఞప్తి చేశారు. సమ్మెలు, ఆందోళనల ద్వారా మాత్రమే సమస్యలు పరిష్కారం కావని.. దశలవారీగా అన్ని సమస్యలు పరిష్కరిస్తామని హామీ ఇచ్చారు.

మరోవైపు అంగన్వాడీల గురించి శాసనమండలిలోనూ మంత్రి గుమ్మడి సంధ్యారాణి మాట్లాడారు. ఆంధ్రప్రదేశ్ ప్రభుత్వం అంగన్వాడీ కేంద్రాలలో ప్రాథమిక సదుపాయాల కోసం 7,090 ఆంగన్వాడీ కేంద్రాలకు రూ.లక్ష చొప్పున రూ. 70 కోట్ల 90 లక్షల నిధులను విడుదల చేసినట్లు మంత్రి చెప్పారు. ఈ నిధులతో టీవీలు, ఆర్‌ఓ ప్లాంట్లు, బెంచీలు, కుర్చీలు, పిల్లలకు బొమ్మలు వంటి సదుపాయాలను అందించనున్నట్లు వెల్లడించారు. గత వైసీపీ ప్రభుత్వ హయాంలో నిధులు మంజూరు కాక ఆగిపోయిన అంగన్వాడీ భవనాలకు కూటమి ప్రభుత్వం నిధులు కేటాయించిందన్న మంత్రి.. 4,977 అంగన్వాడీ భవనాలు నిర్మాణ దశలో ఉన్నట్లు వెల్లడించారు. ఈ నిర్మాణాలకు రూ. 32 కోట్ల 64 లక్షల నిధులను కేటాయించినట్లు శాసనమండలిలో గుమ్మడి సంధ్యారాణి వెల్లడించారు.