ఏపీ రైతులకు శుభవార్త.. ధాన్యం అమ్మాలంటే హాయ్ అంటే చాలు..

రైతులకు ఆంధ్రప్రదేశ్ ప్రభుత్వం శుభవార్త చెప్పింది. పండించిన ధాన్యం అమ్మకాలకు ఇక ఇబ్బందులు పడాల్సిన పనిలేదు. ధాన్యం విక్రయాలను ఏపీ ప్రభుత్వం మరింత సులభతరం చేసింది. ఈ విషయాన్ని పౌరసరఫరాల శాఖ మంత్రి నాదెండ్ల మనోహర్ వెల్లడించారు. రైతులు చెమటోడ్చి పండించిన ధాన్యం విక్రయించుకొనేందుకు ప్రయాస అవసరం లేదన్న మంత్రి నాదెండ్ల మనోహర్.. కేవలం వాట్సాప్ మెసేజ్ చేస్తే చాలని అన్నారు. 73373 59375 నంబరుకు వాట్సాప్ నుంచి హాయ్ అని చెబితే చాలు... సేవలు అందుబాటులోకి వస్తాయని అన్నారు. ఏ కేంద్రంలో, ఏ రోజు, ఏ సమయంలో, ఏ రకం ధాన్యం, ఎన్ని బస్తాలు అమ్మాలనుకుంటున్నారో ఆ వివరాలను వాట్సాప్ ద్వారా మెసేజ్ ఇస్తే స్లాట్ బుక్ అవుతుందని అన్నారు. స్లాట్ ఎలా బుక్ చేసుకోవాలనే దానిపై నాదెండ్ల మనోహర్ తన ఎక్స్ ఖాతా వేదికగా వీడియో షేర్ చేశారు.

ఈ ప్రకారం ధాన్యం అమ్మాలనుకుంటున్న రైతు.. ప్రభుత్వం ఇచ్చిన మొబైల్ నంబర్‌కు హాయ్ అని మెసేజ్ పంపాలి. ఆ తర్వాత ధాన్యం అమ్మడానికి షెడ్యూల్ చేసుకోవాలా అని అడుగుతారు. దీనికి షెడ్యూల్ అనే ఆప్షన్ ఎంచుకోవాల్సి ఉంటుంది. ఆ తర్వాత రైతు తన ఆధార్ నంబర్ నమోదు చేయాల్సి ఉంటుంది. ఆ రైతు తన పేరును ధృవీకరించాల్సి ఉంటుంది. ఈ ధ్రువీకరణ పూర్తైన తర్వాత ఎక్కడ అమ్మాలనుకుంటున్నారో ఆ ప్రాంతానికి సంబంధించి ధాన్యం కొనుగోలు కేంద్రాన్ని ఎంచుకోవాలి. ధాన్యం కొనుగోలు కేంద్రాన్ని ఎంచుకున్న తర్వాత రైతుకు మూడు తేదీలను ఆప్షన్‌గా ఇస్తారు.

ఆప్షన్లుగా ఇచ్చిన మూడు తేదీలలో ధాన్యం అమ్మాల్సిన తేదీని రైతు ఎంచుకోవాల్సి ఉంటుంది. ఆ తర్వాత ఏ సమయానికి అమ్మాలనుకుంటున్నారనే దానిపైనా మూడు ఆప్షన్లు ఇస్తారు. సమయాన్ని కూడా రైతు ఎంచుకున్న తర్వాత ఎలాంటి రకం ధాన్యం అమ్మాలనుకుంటున్నారనే దానిపై ఆప్షన్ ఉంటుంది. ధాన్యం రకాన్ని కూడా రైతు ఎంచుకున్న తర్వాత.. ఎన్ని బస్తాలు అమ్మాలనుకుంటున్నారనే వివరాలను అడుగుతారు. ఇది కూడా ఎంచుకున్న తర్వాత ధాన్యం అమ్మకం షెడ్యూల్ పూర్తైనట్లు రైతుకు కూపన్ కోడ్‌తో ప్రత్యేక మెసేజ్ వస్తుంది. ఈ మెసేజ్‌ను సెల్‌ఫోన్‌కు కూడా పంపుతారు. ఈ మొత్తం ప్రక్రియను ఆర్టిఫిషియల్ ఇంటెలిజెన్స్ ద్వారా తెలుగు వాయిస్‌తో వినిపిస్తూ ఉంటారు.