మిథాలీ రాజ్‌తో ఏసీఏ కీలక ఒప్పందం.. గేమ్ ఛేంజింగ్ కానుందా

ఏపీలో క్రీడల ప్రోత్సాహానికి ఆంధ్రప్రదేశ్ ప్రభుత్వం అనేక చర్యలు తీసుకుంటోంది. ఇటీవలే నూతన క్రీడా విధానాన్ని కూడా సీఎం నారా చంద్రబాబు నాయుడు ఆమోదించారు. ఇక రాష్ట్రంలో క్రికెట్‌ను ప్రోత్సహించాలని ఏపీ ప్రభుత్వం భావిస్తోంది. ఇందుకోసం ఆంధ్రా క్రికెట్ అసోసియేషన్ (ఏసీఏ) కీలక నిర్ణయం తీసుకుంది. రాష్ట్రంలో మహిళా క్రికెట్‌ను ప్రోత్సహించడం కోసం భారత మహిళా క్రికెట్ జట్టు మాజీ కెప్టెన్ మిథాలీ రాజ్‌తో ఏసీఏ ఒప్పందం కుదుర్చుకుంది. ఈ ఒప్పందం ప్రకారం మిథాలీ రాజ్‌ ఆంధ్రా క్రికెట్‌ అసోసియేషన్‌ ఉమెన్స్‌ క్రికెట్‌ ఆపరేషన్స్‌ మెంటార్‌గా వ్యవహరించనున్నారు. ఒప్పందంలో భాగంగా మూడేళ్ల పాటు మిథాలీ రాజ్ ఏపీ మహిళా క్రికెట్ మెంటార్‌గా వ్యవహరించనున్నారు.

మూడేళ్ల కాలంలో రాష్ట్రవ్యాప్తంగా యువతలోని ప్రతిభను గుర్తించడంతో పాటుగా వారిని మరింత మెరుగ్గా రాణించేలా మిథాలీ రాజ్ తీర్చిదిద్దనున్నారు. ఏపీలో మహిళల క్రికెట్‌కు కొత్త దిశానిర్దేశం చేసే ప్రయత్నాల్లో భాగంగా మిథాలీ రాజ్ ఒప్పందంపై సంతకం చేసినట్లు ఏసీఏ కార్యదర్శి సతీష్ వెల్లడించారు. మరోవైపు ఆంధ్రా క్రికెట్ అసోసియేషన్ అనంతపురంలో అకాడమీ ఏర్పాటు చేయాలని భావిస్తోంది. మహిళా క్రికెటర్ల కోసం అనంతపురంలో ఈ అకాడమీ ఏర్పాటు చేయనున్నారు. వేర్వేరు వయసు ఉన్న 80 మంది బాలికలను ఈ అకాడమీకి ఎంపిక చేస్తారు. ఏడాది పాటు వారికి క్రికెట్‌లో శిక్షణ ఇస్తారు.

అనంతపురంలో ఏర్పాటు చేసే ఈ అకాడమీలో సహాయక సిబ్బందితో పాటుగా వైద్య సిబ్బందిని కూడా అందుబాటులో ఉంచుతారు. విజయనగరం, మూలపాడులోనూ ఇలాంటి క్రికెట్ అకాడమీలను ప్రారంభించే యోచనలో ఏసీఏ ఉంది. ఈ అకాడమీలోనూ మిథాలీ రాజ్ కీలకంగా వ్యవహరించనున్నారు. యువ క్రీడాకారిణులకు గైడెన్స్ ఇవ్వనున్నారు. దీంతో ఏపీ మహిళా క్రికెట్‌కు మిథాలీ రాజ్ గేమ్ ఛేంజర్ అయ్యే అవకాశం ఉంది.

మరోవైపు రెండేళ్ల కిందట మిథాలీ రాజ్ క్రికెట్‌ నుంచి రిటైరయ్యారు. 1999లో అంతర్జాతీయ క్రికెట్లోకి ఎంట్రీ ఇచ్చిన మిథాలీ రాజ్.. ఇండియా తరఫున 232 వన్డే మ్యాచ్‌లు ఆడారు. 50.68సగటుతో 7805 పరుగులు చేశారు. మిథాలీ రాజ్ కెప్టెన్సీలో టీమిండియా రెండుసార్లు ప్రపంచకప్ ఫైనల్ చేరుకుంది.