ఏడాదికి రూ.1 కోటి జీతం.. మనశ్శాంతి లేక జాబ్ వదిలేసిన టెకీ, పక్కాగా ప్లాన్ చేశాడుగా

అతడు ఒక 30 ఏళ్ల యువకుడు. చిన్నతనం నుంచి కష్టపడి చదువుకుని మంచి ఉద్యోగం సాధించుకున్నాడు. ఏడాదికి రూ.1 కోటి జీతంతో మంచి మల్టీ నేషనల్ కంపెనీలో జాబ్ తెచ్చుకున్నాడు. అంటే నెలకు రూ.8 లక్షలకు పైనే సంపాదిస్తున్నాడు. పెళ్లి కూడా చేసుకున్నాడు. ఆయన భార్య కూడా ఒక మంచి ఉద్యోగం చేస్తోంది. ఆమె ఇంగ్లీష్ ప్రొఫెసర్‌గా పనిచేస్తున్నారు. అయితే ఆ యువకుడికి ఆ ఉద్యోగంలో ఒత్తిడి, మానసిక ప్రశాంతత కరవైంది. ఆ జాబ్ నుంచి బ్రేక్ తీసుకోవాలని నిర్ణయించుకున్నాడు. మొట్టమొదటగా ఆ విషయాన్ని తన భార్యకు చెప్పాడు. అందుకు ఆమె కూడా సహకరించింది. దీంతో వెంటనే జాబ్ మానేశాడు. అయితే ఆ తర్వాత తాము ఎలా జీవించాలి అనేది పక్కగా ప్లాన్ చేసుకున్నారు. వారి ప్లాన్‌ సోషల్ మీడియాలో వైరల్ కావడంతో నెటిజన్లు రకరకాలుగా కామెంట్లు చేస్తున్నారు.

మహారాష్ట్రలోని ముంబైకి చెందిన వరుణ్‌ హసీజా అనే 30 ఏళ్ల సాఫ్ట్‌వేర్ ఇంజినీర్ చేసిన పనికి ఇప్పుడు నెటిజన్లు ప్రశంసలు కురిపిస్తున్నారు. చిన్న వయసులో భారీ ప్యాకేజీతో బెంగళూరులోని మంచి ఎమ్‌ఎన్‌సీ కంపెనీలో జాబ్ కొట్టాడు. ఏడాదికి కోటి రూపాయల జీతం అంటే.. నెలకు రూ.8 లక్షలకు పైనే సంపాదిస్తున్నాడు. దీంతో తనకు వచ్చిన జీతంతో బాగా ఎంజాయ్ చేసేవాడు. అయితే ఆఫీస్‌కు వెళ్లినపుడు మాత్రం వర్క్ ప్రెజర్, టార్గెట్లతో పూర్తిగా విసిగిపోయాడు. ప్రస్తుతం చేస్తున్న జాబ్ నుంచి ఒక సంవత్సరం బ్రేక్ తీసుకోవాలని నిర్ణయించుకున్నాడు. ఈ విషయాన్ని ఆయన భార్య మోక్షద మన్‌చందాకు చెప్పడంతో ఆమె కూడా బాగా సపోర్ట్ చేసింది. మోక్షద మన్‌చందా ఒక ఇంగ్లీష్ ప్రొఫెసర్‌గా పనిచేస్తోంది.

అయితే జాబ్ మానేసిన తర్వాత ఏం చేయాలి అనేది వారిద్దరూ కలిసి చాలా పకడ్బందీగా ప్లాన్ చేసుకున్నారు. రోజువారీ ఖర్చులు, ఇన్సూరెన్స్‌లు, ఇంటి ఖర్చులు, టూర్‌లకు పెట్టే ఖర్చులు, ప్రయాణాలకు సంబంధించి.. అన్ని ఖర్చులను 3 నెలల కోసం ముందుగానే ఒక ఎక్సెల్ షీట్ తయారు చేసుకున్నారు. అయితే ఈ 3 నెలల్లో ఏది అత్యవసరం అనుకున్నారో వాటికే ఖర్చులు చేసుకోవాలని నిర్ణయించుకున్నారు. అంతకుముందు చేసిన కొన్ని వృథా ఖర్చులను పూర్తిగా తగ్గించాలని నిర్ణయం తీసుకున్నారు. అదే సమయంలో తమ సేవింగ్స్‌ మాత్రం ఆపలేదు.

జాబ్ మానేసినపుడు వచ్చే డబ్బుతో 6 నెలల పాటు ఎలాంటి ఇబ్బంది లేకుండా బతికేయొచ్చు అని లెక్కలు వేసుకున్నారు. ఇక గతంలో ఉన్న అనవసర ఖర్చులను తగ్గించేసుకుని.. కావాల్సినవి మాత్రమే ఫైనల్ చేసుకుని.. వాటన్నింటినీ ఎక్సెల్‌ షీట్‌ రూపంలో వరుణ్ హసీజా సోషల్ మీడియాలో పోస్ట్ చేశాడు. ఇప్పుడు అది వైరల్‌గా మారడంతో నెటిజన్లు స్పందిస్తున్నారు. లేఆఫ్‌లలో జాబ్ పోగొట్టుకున్న వారు.. కంపెనీల్లో పింక్‌స్లిప్‌ అందుకున్నవాళ్లు.. ఇలాంటి ప్లాన్ వేసుకుంటే ఇబ్బందుల్లో పడకుండా ఉండొచ్చు అనేది నేర్చుకున్నాం అంటూ కామెంట్లు పెడుతున్నారు. ఏడాదికి కోటి రూపాయల జీతం వదిలేశావ్ నీకు మిగిలింది ఏంటి అని అనే వారికి.. మనశ్శాంతి, ప్రశాంతత, సంతోషం, తన ఫ్యామిలీకి కేటాయించే సమయం అని వరుణ్‌ హసీజా చెబుతున్నాడు. అయితే ఈ ఏడాది బ్రేక్ తీసుకున్న తర్వాత.. ఏదైనా క్రియేటివ్ బిజినెస్ వైపు వెళ్తానని వరుణ్ హసీజా వెల్లడించాడు.