మోస్ట్ వాంటెడ్ స్మగ్లర్.. పుష్ప-2 సినిమా చూస్తూ అడ్డంగా దొరికేశాడు!

అతడు ఓ పేరుమోసిన క్రిమినల్.. డ్రగ్స్ అక్రమ రవాణా చేస్తూ పోలీసులకు పట్టుబడకుండా తిరుగుతున్నాడు. మోస్ట్ వాంటెడ్ జాబితాలో ఉన్న వాడికోసం పోలీసులు నిఘా పెట్టారు. చివరకు పుష్ప-2 సినిమా చూసేందుకు వచ్చినట్టు తెలుసుకుని అక్కడకు చేరుకున్నారు. సినిమా మధ్యలో పోలీసులు థియేటర్‌లోకి ప్రవేశించడంతో ప్రేక్షకులు ఏం జరగుతుందో తెలియక గందరగోళానికి గురయ్యారు. ఓ వ్యక్తిని అరెస్ట్ చేసి తీసుకెళ్లడంతో షాకయ్యారు. చివరకు అతడు ఓ స్మగ్లర్ అని తెలిసి ఊపిరి పీల్చుకున్నాడు. పోలీసులకు దొరక్కుండా తప్పించుకు తిరుగుతోన్న మోస్ట్ వాంటెడ్ డ్రగ్ స్మగ్లర్.. పుష్ప-2 సినిమా చూస్తూ అడ్డంగా దొరికిపోయిన ఘటన మహారాష్ట్రలోని నాగ్‌పూర్‌లో గురువారం అర్ధరాత్రి చోటుచేసుకుంది.

రెండు హత్యలు, డ్రగ్స్ స్మగ్లింగ్ సహా అనేక ఘటనలకు సంబంధించి 27 కేసుల్లో నిందితుడిగా ఉన్న గ్యాంగ్‌స్టర్ విశాల్ మెష్రామ్ కోసం 10 నెలలుగా పోలీసులు గాలిస్తున్నారు. గతంలో పోలీసులపై కూడా దాడిచేసిన చరిత్ర అతడికి ఉంది. తప్పించుకుని తిరుగుతూ పోలీసులను బురిడీ కొట్టిస్తున్నాడు. అయితే, ఇటీవల విడుదలైన ‘పుష్ప-2 ది రూల్’ సినిమా చూసేందుకు అతడు వస్తున్నట్టు పోలీసులకు తెలిసింది. దీంతో సినిమా ప్రదర్శిస్తోన్న మల్లీప్లెక్స్‌ వద్దకు గురువారం రాత్రి చేరుకుని చుట్టుముట్టారు. సినిమా మధ్యలో పోలీసులను చూసి నిర్ఘాంతపోయిని విశాల్.. తప్పించుకునే దారిలేక లొంగిపోయాడు.

పోలీస్ అధికారి ఒకరు మాట్లాడుతూ.. ‘విశాల్ మెష్రమ్‌పై రెండు హత్యలు, డ్రగ్స్ అక్రమ రవాణా సహా 27 కేసులు ఉన్నాయి. పోలీసులపై దాడి సహా అతడి హింసాత్మక కార్యకలాపాలు గురించి ప్రతి ఒక్కరికీ తెలుసు.. ఈ కేసుల్లో పది నెలల నుంచి అతడ్ని అరెస్ట్ చేయడానికి ప్రయత్నిస్తున్నాం.. కానీ, తప్పించుకు తిరుగుతున్నాడు.. చివరకు అతడ్ని సెంట్రల్ నాగ్‌పూర్‌లోని ఓ మల్టీప్లెక్స్‌లో పుష్ప-2 సినిమా చూస్తుండగా పట్టుకున్నాం’ అని తెలిపారు. సినిమా చూడటానికి విశాల్ వస్తున్నట్టు ముందస్తు సమాచారం వచ్చిందని చెప్పారు. అతడు వాడుతున్న కొత్త స్పోర్ట్స్ బైక్‌తో కచ్చితంగా ఎక్కడ ఉన్నాడో సైబర్ నిపుణులు ట్రాక్ చేయగలిగారని ఆ పోలీస్ అధికారి వివరించారు. థియేటర్‌లోకి పోలీసులు రావడంతో ప్రేక్షకులు కొంత అయోమయానికి గురయ్యారు.