మృతదేహాన్ని రేప్ చేయడం నేరం కాదు.. సంచలన తీర్పునిచ్చిన ఛత్తీస్‌గఢ్ హైకోర్టు

ఛత్తీస్‌గఢ్ హైకోర్టు తాజాగా ఇచ్చిన తీర్పు తీవ్ర చర్చనీయాంశంగా మారింది. మృతదేహంతో శృంగారంలో పాల్గొన్నందుకు శిక్ష విధించే నిబంధన.. భారత చట్టాల్లో లేదని పేర్కొంటూ.. నిందితుడిని నిర్దోషిగా ప్రకటిస్తూ సంచలన తీర్పును ఛత్తీస్‌గఢ్ హైకోర్టు వెల్లడించింది. అదే సమయంలో చనిపోయిన బాలికపై అత్యాచారం చేయడం అనేది అత్యంత భయంకరమైన చర్య అయినప్పటికీ.. పోక్సో గానీ, ఇతర చట్టాల్లో గాని.. సంబంధిత నిబంధనల ప్రకారం.. శవాలపై రేప్ చేయడం అనేది నేరంగా పరిగణించబడదని కోర్టు స్పష్టం చేసింది.

ఛత్తీస్‌గఢ్‌ గరియాబంద్ జిల్లాకు చెందిన 9 ఏళ్ల బాలికను నితిన్ యాదవ్, నీలకంఠం గణేష్ అనే వ్యక్తులు కిడ్నాప్ చేసి అతి దారుణంగా హత్య చేశారు. ఆ తర్వాత ఆ బాలిక మృతదేహంపై నిందితులు అత్యాచారానికి తెగబడ్డారు. అయితే ఈ వ్యవహారంలో తాము దొరకకుండా అన్ని చర్యలు తీసుకున్నారు. అయితే బాలిక కనిపించడం లేదని కుటుంబ సభ్యులు ఇచ్చిన ఫిర్యాదుతో కేసు నమోదు చేసుకున్న పోలీసులు.. రంగంలోకి దిగి ఈ మిస్టరీని ఛేదించారు. పోలీసుల విచారణలో నితిన్ యాదవ్, నీలకంఠం గణేష్‌లే ఈ దారుణానికి ఒడిగట్టినట్లు తేలడంతో వారిద్దరిని అరెస్ట్ చేశారు. ఇక ఈ కేసులో విచారణ జరిపిన ట్రయల్ కోర్టు.. హత్య, ఇతర నేరాలకు పాల్పడిన ప్రధాన నిందితుడు నితిన్‌ యాదవ్‌కు యావజ్జీవ కారాగార శిక్ష విధించింది.

 ఇక ఈ ఘటనలో సాక్ష్యాలను నాశనం చేసినందుకు సహ నిందితుడు నీలకంఠం నగేష్‌కు 7 ఏళ్ల జైలు శిక్ష విధించింది. అయితే ఈ కేసులో బాలిక చనిపోయిన తర్వాత ఆమెపై నీలకంఠం నగేష్ రేప్ చేయగా.. ఈ కేసులో మాత్రం అతడికి కోర్టు శిక్ష విధించలేదు. శవంపై అత్యాచారం చేసిన కేసులో నిందితుడిని నిర్దోషిగా తీర్పునిచ్చింది. దీంతో ట్రయల్ కోర్టు ఇచ్చిన ఈ తీర్పును.. బాధిత బాలిక తల్లి.. ఛత్తీస్‌గఢ్ హైకోర్టులో సవాల్ చేసింది.

దీనిపై విచారణ జరిపిన చీఫ్ జస్టిస్ రమేష్ సిన్హా, జస్టిస్ బిభు దత్తా గురులతో కూడిన ద్విసభ్య ధర్మాసనం.. ట్రయల్ కోర్టు ఇచ్చిన తీర్పును సమర్ధించింది. ఈ క్రమంలోనే చనిపోయిన బాలిక తల్లి పిటిషన్‌ను తిరస్కరించిన హైకోర్టు బెంచ్.. భారతీయ చట్టంలోని శవంతో లైంగిక సంపర్కానికి శిక్ష విధించే నిబంధన లేదని పేర్కొంది. అయితే మృతదేహంపై అత్యాచారానికి ఒడిగట్టడం అనేది చాలా తీవ్రమైన విషయం అని కోర్టు అభిప్రాయం వ్యక్తం చేసింది.