రాహుల్ గాంధీకి షాక్.. సమన్లు జారీచేసిన యూపీ కోర్టు

కాంగ్రెస్ ఎంపీ, లోక్‌సభలో ప్రతిపక్ష నేత రాహుల్ గాంధీకి ఉత్తర్ ప్రదేశ్ కోర్టు సమన్లు జారీచేసింది. అసెంబ్లీ ఎన్నికల ప్రచారంలో కులగణనపై ఆయన చేసిన వ్యాఖ్యలకు వ్యతిరేకంగా దాఖలైన కేసులో బరేలీ జిల్లా కోర్టు ఈ సమన్లు జారీ చేసినట్లు అధికారిక వర్గాలు వెల్లడించాయి. కులగణనపై రాహుల్ చేసిన వ్యాఖ్యలు దేశంలో అశాంతిని రేకెత్తించేలా ఉన్నాయని, అంతర్యుద్దానికి దారితీసేలా ఉన్నాయని పేర్కొంటూ పంకజ్ పాఠక్ అనే వ్యక్తి పిటిషన్ దాఖలు చేశాడు. ఈ పిటిషన్‌ విచారణకు స్వీకరించిన కోర్టు.. జనవరి 7న విచారణకు హాజరుకావాలని రాహుల్ గాంధీకి నోటీసులు జారీచేసింది.

వాస్తవానికి ఈ పిటిషన్‌ను ప్రజాప్రతినిధులు కోర్టులోనే ముందు దాఖలు చేయగా... దానిని తిస్కరించింది. దీంతో పంకజ్ పాఠక్ జిల్లా కోర్టుకు వెళ్లారు. పిటిషనర్ పాఠక్ మాట్లాడుతూ.. ‘అసెంబ్లీ ఎన్నికల ప్రచారంలో కాంగ్రెస్ నేత రాహుల్‌ గాంధీ కులగణనపై చేసిన వ్యాఖ్యలు దేశంలో అంతర్యుద్ధానికి దారి తీసేలా ఉన్నాయి.. అందుకే ఆ వ్యాఖ్యలపై తొలుత ప్రజాప్రతినిధుల కోర్టులో కేసు వేశాం.. అక్కడ పిటిషన్ కొట్టివేశారు.. దీంతో బరేలీ జిల్లా కోర్టులో పిటిషన్ దాఖలు చేశాం.. ఈ క్రమంలోనే రాహుల్‌ గాంధీకి కోర్టు సమన్లు జారీ చేసింది. వచ్చే ఏడాది జనవరి 7న హాజరుకావాలని ఆదేశించింది’ అని తెలిపారు.

మరోవైపు, అంబేద్కర్‌ను ఉద్దేశించి అనుచిత వ్యాఖ్యలు చేశారనే ఆరోపిస్తూ కేంద్ర హోం మంత్రి అమిత్ షా రాజీనామా చేయాలని రాహుల్ గాంధీ సహా కాంగ్రెస్ పార్టీ డిమాండ్ చేస్తున్నాయి. ఇది రాజ్యాంగంపై దాడేనని, బీజేపీ, ప్రధాని నరేంద్ర మోదీ, అమిత్ షాలు బాబా సాహెబ్ అంబేద్కర్‌ను అవమానించారని రాహుల్ ఆరోపించారు. ఈ ఘోర తప్పిదాలను భారత్ క్షమించబోదని, దీనిపై అమిత్ షా క్షమాపణలు చెప్పి రాజీనామా చేయాలని ఆయన కోరారు. ఈ అంశంపై దేశవ్యాప్తంగా శనివారం కాంగ్రెస్ శ్రేణులు నిరసనలు చేపట్టాయి. ఇదే అంశంపై పార్లమెంట్ వద్ద చేపట్టిన ఆందోళన.. కాంగ్రెస్, బీజేపీల మధ్య తోపులాటకు దారితీసింది. ఈ ఘటనలో ఇద్దరు బీజేపీ ఎంపీలకు గాయపడగా.. రాహుల్ గాంధీపై ఫిర్యాదుతో కేసు నమోదయ్యింది.