రోజుకు 15 గంటల గొడ్డు చాకిరీ.. కష్టాలు చెప్పుకుని బోరున ఏడ్చేసిన టెకీ.. నెటిజన్ల రియాక్షన్ ఇదే

పని ఒత్తిడి తట్టుకోలేక అనారోగ్యం పాలు కావడం, ఆత్మహత్యలకు పాల్పడుతున్న ఘటనలు తీవ్ర ఆందోళన కలిగిస్తోంది. టార్గెట్లు పూర్తిచేయలేక.. తీవ్రమైన ఒత్తిడికి గురై డిప్రెషన్‌లోకి వెళ్లిపోతున్నారు. ఈ క్రమంలో కఠిన నిర్ణయం తీసుకుంటున్నారు. తాజాగా, ఓ సాఫ్ట్‌వేర్ ఇంజినీర్ పనిచేసే ఆఫీసులో తన కష్టాలను ఏకరవు పెడుతూ.. బోరున ఏడ్చేసిన వీడియో ఒకటి సోషల్ మీడియాలో వైరల్ అవుతోంది. తాను 12 నుంచి 15 గంటలు కష్టపడి పనిచేస్తున్నా.. శిక్షణ ఇవ్వకపోవడంతో పని విషయంలో పలు సందేహాలు వస్తున్నాయని వాపోయాడు. టీమ్ లీడర్‌ను అడిగితే గైడెన్స్ ఇవ్వడం లేదు సరికదా.. అందరి ముందు తనను అవమానిస్తున్నాడని ఆవేదన వ్యక్తం చేశాడు. పని ఒత్తిడి తట్టుకోలేక గూగుల్ మీట్‌లో టీమ్ లీడర్ ముందు ఏడ్చేశానని కన్నీటిపర్యంతమయ్యాడు.

స్టార్టప్ కంపెనీలో తాను ఎదుర్కొంటున్న కష్టాలను వివరిస్తూ ఆ టెకీ సోషల్ మీడియా ప్లాట్‌ఫాం రెడ్డిట్‌లో పెట్టిన పోస్ట్ ప్రస్తుతం వైరల్‌గా మారింది. దీంతో అతడికి మద్దతుగా నెటిజన్లు కామెంట్లు చేస్తూ.. నీ తప్పేమీ లేదని ఓదార్చుతున్నారు. రోజుల తరబడి ధైర్యంగా పనిచేసి ఒక్కసారిగా ఓపెన్ అయ్యారని, మిమ్మల్ని మీరు నిందించుకోవద్దని సర్దిచెబుతున్నారు. జీతం కన్నా ఆత్మగౌరవం ముఖ్యమని, మరో కంపెనీకి మారాలని సూచిస్తున్నారు.

స్టార్టప్ కంపెనీలో ఉద్యోగులు ఎదుర్కొంటున్న కష్టాల గురించి చెబుతూ.. ‘భారత్‌లోని ఓ స్టార్టప్ కంపెనీలో నేను పనిచేస్తున్నాను.. ఉద్యోగంలో చేరిన తర్వాత సరైన శిక్షణ ఇవ్వలేదు.. రోజూ దాదాపుగా 15 గంటలు పనిచేయాల్సి వస్తోంది.. అయితే, స్టార్టప్ కంపెనీ వ్యవస్థాపకులలో ఒకరు టీమ్ లీడర్‌గా వ్యవహరిస్తున్నారు.. ఆయన అందరి ముందూ తనను అవమానించాడు.. పని విషయంలో ఎదురయ్యే సందేహాలను తీర్చుకోవడానికి తాను ప్రయత్నిస్తే మార్గదర్శనం చేయాల్సిన వ్యక్తి ఇలా అవమానించడం తట్టుకోలేక పోయాను.. అందరి ముందు గూగుల్ మీట్‌లోనే ఏడ్చేశాను.. ఈ పరిస్థితిని ఎలా ఎదుర్కోవాలో తెలియడంలేదు.. మీటింగ్ పూర్తయిన తర్వాత నేను లీవ్ తీసుకుంటున్నట్లు చెప్పాను’ అని ఆ టెకీ వివరించాడు. దీనిపై నెటిజన్లు స్పందిస్తూ.. మిమ్మల్ని మీరు తక్కువ చేసుకోవద్దు.. వెంటనే ఆ ఉద్యోగానికి రాజీనామా చేసి.. మరో ఉద్యోగం చూసుకోవాలని సూచించారు.

‘జీవితంలో స్వీయ ప్రమాణాలతో మనల్ని మనం అంచనా వేసుకుంటాం.. మీ భావోద్వేగాలను ప్రభావితం చేసే ఎవరికీ అవకాశం ఇవ్వొద్దు.. ఇతరులకు ఇబ్బంది కలిగించని విధంగా మీకు ఏది అనిపిస్తే దానిని వ్యక్తపరిచే హక్కు ఉంది.. ఏడుపు వస్తే ఏడ్చేయండి.. అది ఎవరికైనా అర్థం కాకపోతే వారే తిట్టుకుంటారు.. బెస్ట్ ఆఫ్ లక్’’ అని ఓ నెటిజన్ సలహా ఇచ్చాడు. నెటిజన్ల సలహాలు, సూచలనపై ఆ టెకీ స్పందిస్తూ.. వారికి ధన్యవాదాలు తెలిపారు. తాను కొత్త ఉద్యోగన్వేషణలో ఉన్నానని తెలిపాడు.