దళితుల కోసం కొత్త పథకం.. దేశవ్యాప్తంగా అంబేద్కర్‌పై చర్చ వేళ కీలకం

రాజ్యాంగంపై చర్చ సందర్భంగా రాజ్యసభలో మాట్లాడిన కేంద్ర హోం శాఖ మంత్రి అమిత్ షా.. అంబేద్కర్‌ను ఉద్దేశించి చేసిన వ్యాఖ్యలు ప్రస్తుతం దేశవ్యాప్తంగా తీవ్ర దుమారానికి కారణం అయ్యాయి. కాంగ్రెస్ సహా ఇండియా కూటమిలోని ప్రతిపక్ష పార్టీలు.. అంబేద్కర్‌పై చేసిన వ్యాఖ్యలకు గానూ కేంద్ర మంత్రివర్గం నుంచి అమిత్ షాను భర్తరఫ్ చేయాలని.. ప్రధానమంత్రి నరేంద్ర మోదీ, కేంద్ర ప్రభుత్వాన్ని డిమాండ్ చేస్తున్నారు. ఇక రాష్ట్రాల్లో కూడా అమిత్ షా వ్యాఖ్యలకు వ్యతిరేకంగా రాజకీయ పార్టీలు, పలు సంఘాలు తీవ్ర నిరసనలు, ఆందోళనలు చేస్తున్నాయి. ఈ క్రమంలోనే మరికొన్ని రోజుల్లోనే ఢిల్లీలో అసెంబ్లీ ఎన్నికలు జరగనున్న వేళ.. అనేక పథకాలు, హామీలు ప్రకటిస్తున్న అధికార ఆమ్ ఆద్మీ పార్టీ తాజాగా మరో కొత్త పథకాన్ని ప్రవేశపెట్టింది.

దేశంలో అంబేడ్కర్‌ వివాదం నడుస్తున్న వేళ.. ఆమ్ ఆద్మీ పార్టీ నేషనల్ కన్వీనర్, మాజీ ముఖ్యమంత్రి అరవింద్ కేజ్రీవాల్ ఢిల్లీ అసెంబ్లీ ఎన్నికల ముందు దళితుల కోసం సరికొత్త పథకాన్ని ప్రకటించడం గమనార్హం. దళిత విద్యార్థుల ఉన్నత విద్య కోసం డాక్టర్ బీఆర్ అంబేద్కర్ పేరిట కొత్త స్కాలర్‌‌షిప్ పథకాన్ని కేజ్రీవాల్ ప్రకటించారు. డబ్బులు లేని కారణంగా దళిత వర్గానికి చెందిన ఏ ఒక్క వ్యక్తి కూడా ఉన్నత విద్యకు దూరం కాకూడదని ఈ పథకాన్ని తీసుకువచ్చినట్లు కేజ్రీవాల్ తెలిపారు. కేంద్ర హోం శాఖ మంత్రి అమిత్ షా.. అంబేద్కర్‌ను అగౌరవపరిచినందుకు.. తాము దళితులను గౌరవించేందుకు ఈ డాక్టర్ బీఆర్ అంబేద్కర్ స్కాలర్‌షిప్ పథకాన్ని తీసుకువచ్చినట్లు పేర్కొన్నారు.

ప్రపంచవ్యాప్తంగా ఉన్న ఏ టాప్ యూనివర్సిటీల్లో అయినా చదువుకోవాలనుకునే దళిత వర్గానికి చెందిన విద్యార్థులకు.. అడ్మిషన్ పొందిన తర్వాత వారి పూర్తి ఖర్చులను ఢిల్లీ ప్రభుత్వమే భరిస్తుందని ఈ సందర్భంగా కేజ్రీవాల్ హామీ ఇచ్చారు. ఈ స్కాలర్‌షిప్ పథకం దళితులలోని ప్రభుత్వ ఉద్యోగుల పిల్లలకు కూడా అమలు చేయనున్నట్లు కేజ్రీవాల్ స్పష్టం చేశారు. అంబేద్కర్‌ను అవమానించినందుకు.. ఈ పథకంతో బీజేపీకి, అమిత్ షాకు సమాధానం ఇస్తున్నామని కేజ్రీవాల్ పేర్కొన్నారు.

ఇక ఫిబ్రవరిలో ఢిల్లీ అసెంబ్లీ ఎన్నికలు జరగనున్నట్లు తెలుస్తోంది. ఈ నేపథ్యంలోనే ఢిల్లీలోని 70 అసెంబ్లీ నియోజకవర్గాలకు ఇప్పటికే అభ్యర్థులను ప్రకటించేసిన ఆప్.. ప్రచారంలో దూసుకెళ్తోంది. ఇక మాజీ సీఎం, ఆప్ కన్వీనర్ కేజ్రీవాల్ వివిధ రకాల వర్గాల ప్రజలకు వరాల జల్లు కురిపిస్తున్నారు. తాము తిరిగి ఢిల్లీలో అధికారంలోకి వస్తే మహిళలకు నెలకు రూ.2100 ఇస్తామని ప్రకటించారు. అంతేకాకుండా 60 ఏళ్లు దాటిన వృద్ధులు.. ప్రభుత్వ, ప్రైవేటు ఆస్పత్రుల్లో ఉచితంగా మెడికల్ చికిత్స తీసుకోవచ్చని.. వాటికి అయ్యే ఖర్చులన్నీ ఢిల్లీ ప్రభుత్వమే భరిస్తుందని హామీ ఇచ్చారు.