శ్రీశైలం మల్లన్న భక్తులకు అలర్ట్.. మహాశివరాత్రి బ్రహ్మోత్సవాల ముహూర్తం ఫిక్స్

ప్రముఖ శైవక్షేత్రం శ్రీశైలంలో మహాశివరాత్రి వేడుకలకు ముహూర్తం ఫిక్స్ అయ్యింది. 2025 ఫిబ్రవరి 19 నుంచి శ్రీశైలంలో మహాశివరాత్రి బ్రహ్మోత్సవాలు నిర్వహిస్తారు. ఫిబ్రవరి 19 నుంచి మార్చి 1వ తేదీ వరకు శ్రీశైలంలో మహాశివరాత్రి బ్రహ్మోత్సవాలు జరగనున్నాయి. ఈ విషయాన్ని శ్రీశైలం దేవస్థానం ఈవో శ్రీనివాసరావు వెల్లడించారు. 11 రోజులపాటు శ్రీశైలంలో మహాశివరాత్రి బ్రహ్మోత్సవాలు జరగనున్నాయి. మహాశివరాత్రి సందర్భంగా శ్రీశైలానికి భక్తుల రద్దీ అధికంగా ఉంటుంది. ఈ నేపథ్యంలో శ్రీశైలంలో మహాశివరాత్రి బ్రహ్మోత్సవాల ఏర్పాట్లపై రెవెన్యూ, పోలీసు, అటవీశాఖ అధికారులతో ఈవో శ్రీనివాసరావుసమావేశం నిర్వహించారు. అన్ని శాఖలు పూర్తిగా సమన్వయంతో వ్యవహరించి.. మహాశివరాత్రి బ్రహ్మోత్సవాలను సమర్థంగా నిర్వహించేలా చూడాలని ఈవో సూచించారు.

మరోవైపు శివరాత్రి బ్రహ్మోత్సవాల సందర్భంగా శ్రీశైలానికి వచ్చే భక్తులకు ఎలాంటి ఇబ్బందులు కలగకుండా దేవస్థానం చర్యలు తీసుకుంటోంది. మహాశివరాత్రి బ్రహ్మాత్సవాలకు అన్ని ఏర్పాట్లను ఫిబ్రవరి మొదటి వారంలోగా పూర్తయ్యేలా చూడాలని ఈవో శ్రీనివాసరావు అధికారులను ఆదేశించారు. గతేడాది కంటే 30 శాతం అదనపు ఏర్పాట్లు ఉండాలని ఆదేశించారు. అలాగే బ్రహ్మోత్సవాల సందర్భంగా వాహనసేవలు, స్వామివారికి పట్టువస్త్రాల సమర్పణ, మహాశివరాత్రి రోజున పాగాలంకరణ, బ్రహ్మోత్సవ కల్యాణం, రథోత్సవం ఏర్పాట్లను పకడ్బందీగా చేపట్టాలని ఆదేశించారు.

ఇక శ్రీశైలానికి పాదయాత్రతో వచ్చే భక్తులకు ఇబ్బంది కలగకుండా శ్రీశైలం దేవస్థానం చర్యలు తీసుకుంటోంది. ఇందులో భాగంగా నాగలూటి, పెద్దచెరువు, భీమునికొలను, కైలాస ద్వారం, సాక్షిగణపతి ప్రాంతాల్లో ప్రత్యేక ఏర్పాట్లు చేయనున్నారు. శివదీక్ష చేపట్టి వచ్చే స్వాములకు ప్రత్యేక క్యూ లైన్ ఏర్పాటు, ఇరుముడి సమర్పణతో పాటుగా భక్తులు సేదతీరేందుకు చలువ పందిళ్లు, షామియానాలు ఏర్పాటు చేయాలని శ్రీశైలం దేవస్థానం నిర్ణయించింది. అలాగే భక్తుల కోసం మంచినీరు, పారిశుద్ధ్యం, వాహనాల పార్కింగ్, సూచిక బోర్డులు ఏర్పాటు చేయనున్నారు. అలాగే విద్యుద్దీపాలు ఏర్పాటు చేయనున్నారు. మొత్తంగా శివరాత్రికి శ్రీశైలం మల్లన్నను దర్సించుకుందామని వచ్చే భక్తులకు ఇబ్బందులు కలగకుండా చర్యలు చేపడుతున్నారు. ఈవో శ్రీనివాసరావు సైతం ఇదే విషయాన్ని అధికారులకు స్పష్టం చేశారు.