సంక్రాంతికి ఊరెళ్తున్నారా..? ఏపీఎస్ఆర్టీసీ శుభవార్త.. టికెట్లపై డిస్కౌంట్

పెద్ద పండగ దగ్గరకొచ్చింది. ఊరూవాడ సంక్రాంతి సంబరాలకు సిద్ధమైంది. పట్నంలో ఉండేటోళ్లంతా పల్లెలకు ప్రయాణం కడుతున్నారు. సంక్రాంతి పండుగను సొంతూర్లో అయినోళ్ల మధ్యన జరుపుకోవాలనే ఆశతో పట్నంవాసులు.. ప్రయాణాలకు సిద్ధమౌతున్నారు. అయితే రైళ్లల్లో చాంతాడంత వెయిటింగ్ లిస్టులు భయపెడుతున్నాయి. బస్సులకు వెళ్దామంటే ప్రైవేట్ ట్రావెల్స్ దోపిడీతో గుండె గుభేల్ మంటోంది. ప్రయాణాన్ని వాయిదా వేసుకుందామంటే ఊరెళ్లాల్సిందేనంటూ మనసు లాగుతోంది. ఈ పరిస్థితుల్లో సగటు మధ్యతరగతి జీవికి ఊరట నిచ్చేలా ఏపీఎస్ఆర్టీసీ కీలక నిర్ణయం తీసుకుంది. సంక్రాంతి పండుగ రద్దీని దృష్టిలో పెట్టుకుని 7200 అదనపు బస్సులు నడపాలని ఏపీఎస్ఆర్టీసీ నిర్ణయించింది.

తెలుగు రాష్ట్రాల ప్రజలు చాలా మంది ఉద్యోగం కోసమో, ఉపాధి కోసమో పొరుగు రాష్ట్రాలకు వలస వెళ్లారు. అలాంటి వారంతా పండుగ కోసం సొంతూరికి వచ్చేందుకు సిద్ధమవుతున్నారు. అలాంటి వారి కోసం పొరుగు రాష్ట్రాలకు అదనపు బస్సులు నడపాలని ఏపీఎస్ ఆర్టీసీ నిర్ణయించింది. తెలంగాణతో పాటుగా కర్ణాటక రాష్ట్రానికి కూడా బస్సులు నడపనున్నారు. జనవరి 8 నుంచి జనవరి 13 వరకూ 3900 ప్రత్యేక బస్సులను ఏపీఎస్ఆర్టీసీ నడపనుంది. ముఖ్యంగా హైదరాబాద్ నుంచి ఏపీకి వచ్చే వారు ఎక్కువ మంది ఉంటారు. ఈ కారణంతోనే హైదరాబాద్ నుంచి ఆంధ్రప్రదేశ్‌లోని పలుచోట్లకు 2,153 బస్సులు ఏర్పాటు చేశారు. అలాగే కర్ణాటక రాజధాని బెంగళూరు నుంచి 375 బస్సులు, విజయవాడ నుంచి 300 ప్రత్యేక బస్సులు ఏపీఎస్ ఆర్టీసీ నడపనుంది.

ఇక పండుగ పూర్తి చేసుకున్న తర్వాత తిరుగు ప్రయాణానికి కూడా ఏపీఎస్ ఆర్టీసీ ప్రత్యేక బస్సులు నడపనుంది. జనవరి 16 నుంచి జనవరి 20 వరకూ 3200 ప్రత్యేక బస్సులను ఏర్పాటు చేసింది. అన్నింటికంటే ముఖ్యమైన విషయం ఏమిటంటే.. ఈ ప్రత్యేక బస్సులలో ఎలాంటి అదనపు ఛార్జీలు ఉండవంటూ ప్రయాణికులకు ఆర్టీసీ శుభవార్త వినిపించింది. ఈ ప్రత్యేక బస్సులలో సాధారణ ఛార్జీలనే వసూలు చేస్తారని తెలిపింది. అలాగే వచ్చేందుకు, తిరిగి వెళ్లేందుకు రెండు వైపులా టికెట్లు రిజర్వేషన్ చేసుకుంటే టికెట్ ధర మీద 10 శాతం రాయితీ కూడా ఇస్తున్నట్లు ఏపీఎస్ఆర్టీసీ ప్రకటించింది. ప్రత్యేక బస్సుల్లో ముందస్తు టికెట్‌ బుకింగ్‌ సౌకర్యం కూడా కల్పిస్తోంది.

ఈ నేపథ్యంలో సంక్రాంతి పండుగకు సొంతూర్లకు వెళ్లేవారు ఈ అవకాశాన్ని ఉపయోగించుకోవాలని ఏపీఎస్ఆర్టీసీ అధికారులు కోరుతున్నారు. ప్రయాణికుల భద్రత, సౌకర్యం కోసం ప్రత్యేక బస్సులు ఏర్పాటు చేశామని.. అదనపు ఛార్జీలు కూడా లేవని చెప్తున్నారు. ముందస్తు టికెట్ బుకింగ్ సౌకర్యం అందుబాటులో ఉన్నందున ప్రయాణికులు త్వరపడాలని సూచిస్తున్నారు.