ట్రూడో రాజీనామా.. కెనడాకు డొనాల్డ్ ట్రంప్ బంపరాఫర్.. సాధ్యమవుతందా?

కెనడా ప్రధాని జస్టిన్‌ ట్రూడో రాజీనామా ప్రకటనపై కాబోయే అమెరికా అధ్యక్షుడు డొనాల్డ్‌ ట్రంప్ స్పందించారు. అమెరికాలో కెనడాను విలీనానికి మరోసారి పిలుపునిచ్చారు. కెనడా 51వ రాష్ట్రంగా చేరాలనే ప్రతిపాదనను పునరుద్ఘాటించిన ట్రంప్.. ఈమేరకు తన సోషల్ మీడియా వేదిక ట్రూత్ సోషల్‌‌లో పోస్ట్‌ చేశారు. గతంలో ఒకసారి ట్రంప్ ఈ ప్రతిపాదన తీసుకొచ్చిన విషయం తెలిసిందే. ‘అమెరికాలో 51వ రాష్ట్రంగా ఉండటం కెనడాలోని మెజార్టీ ప్రజలు కోరుకుంటున్నారు.. ఆ దేశానికి అధిక రాయితీలు ఇచ్చి అమెరికా నష్టపోవాల్సిన అవసరం లేదు.. కెనడా ప్రధాని ట్రూడోకు ఈ విషయం తెలుసు కాబట్టే ఆయన రాజీనామా చేశారు. అమెరికాలో విలీనమైతే దిగుమతి సుంకాలు ఉండవు, పన్నులు తగ్గుతాయి. అంతేకాకుండా రష్యా, చైనాలకు చెందిన నౌకల నుంచి ఎలాంటి ముప్పు ఉండదు’ అని ట్రంప్‌ అభిప్రాయపడ్డారు.

అమెరికా అధ్యక్ష ఎన్నికల్లో గెలిచిన తర్వాత ట్రంప్ మాట్లాడుతూ.. కెనడా, చైనా, మెక్సికోలపై 25 శాతం సుంకం వడ్డిస్తామని ప్రకటించారు. తర్వాత ఫ్లోరిడాలోని తన మార్ ఎ లాగో ఎస్టేట్‌లో కెనడా ప్రధానితో ట్రంప్‌ భేటీ అయ్యారు. అక్రమ వలసలు, డ్రగ్స్‌ స్మగ్లింగ్‌ విషయంలో చర్యలు తీసుకోవాలని.. లేనిపక్షంలో సుంకాలు పెంచుతానని ట్రంప్‌ హెచ్చరించారు. ఒకవేళ, విఫలమైతే అమెరికాలో 51వ రాష్ట్రంగా చేరాలని ట్రూడోకు సూచించారు. ఈ క్రమంలో ‘గవర్నర్‌ ఆఫ్‌ కెనడా’ అంటూ ట్రూడోపై వ్యంగ్యస్త్రాలు సంధించారు.

అటు, ప్రధాని పదవితో పాటు లిబరల్‌ పార్టీ అధ్యక్ష బాధ్యతల నుంచి కూడా తప్పుకోనున్నట్టు ట్రూడో ప్రకటించారు. తన వారసుడ్ని పార్టీ ఎంపిక చేసేవరకూ ప్రధాని పదవిలో కొనసాగుతానని స్పష్టం చేశారు. పార్టీ పగ్గాలతో పాటు కెనడా నూతన ప్రధానిగా మార్క్‌ కార్నీ, లీ బ్లాంక్‌లలో ఎవరో ఒకరు చేపట్టనున్నట్లు సమాచారం. కాగా, గతేడాది కెనడా నుంచి అమెరికా దాదాపు 423 బిలియన్ డాలర్ల ఉత్పత్తులను దిగుమతి చేసుకుంది. దీని వల్ల కెనడాలో 20 లక్షల మంది ఉద్యోగ, ఉపాధికి కలిగింది. ఒకవేళ, సుంకాలు పెంచితే ఉద్యోగాల్లో కోత తప్పదు.