జడ్ మోడ్ సొరంగాన్ని ప్రారంభించిన ప్రధాని.. అక్కడ మోదీకి ఏమేం నచ్చాయంటే

జమ్ము కశ్మీర్ పర్యటనలో ఉన్న ప్రధాన మంత్రి నరేంద్ర మోదీ.. ఈరోజు సోన్‌మార్గ్‌లో నిర్మించిన జెడ్ మోడ్ టన్నెల్‌ను ప్రారంభించారు. అనంతరం సొరంగం లోపలికి వెళ్లి ఆ మార్గాన్ని పరిశీలించారు. అలాగే ప్రాజెక్టు అధికారులతో చాలా సేపు ముచ్చటించారు. ఆపై టన్నెల్ పూర్తి చేసేందుకు ఎంతగానో కష్టపడిన భవన నిర్మాణ కార్మికులను సైతం కలిసి ప్రశంసలు అందించారు. ఆ సొరంగ మార్గం తనకు ఎంతగానో నచ్చిందని.. టన్నెల్ వల్ల అనేక ఉపయోగాలు ఉన్నాయని వివరించారు. అక్కడి ప్రజలు సైతం తనకు చాలా బాగా నచ్చారంటూ మోదీ చెప్పుకొచ్చారు.

శ్రీనగర్-లేహ్ జాతీయ రహదారిపై సోన్‌మార్గ్ ప్రాంతంలో దాదాపు 2 వేల 700 కోట్ల రూపాయలతో ఈ భారీ టన్నెల్‌ను నిర్మించారు. కొండ చరియలు విరగడం, మంచు కురవడం కారణంగా జమ్ము కశ్మీర్‌లో రాకపోకలకు తీవ్ర అంతరాయం కల్గుతోంది. ఆ విషయం గుర్తించిన కేంద్ర ప్రభుత్వం.. ఈ భారీ సొరంగం మార్గాన్ని నిర్మించింది. సముద్ర మట్టానికి 8 వేల 650 అడుగుల ఎత్తులో.. 6.5 కిలో మీటర్ల పొడవుతో దీన్ని నిర్మించారు. 2015వ సంవత్సరంలో నిర్మాణ పనులు ప్రారంభం కాగా.. ఇటీవలే పనులు పూర్తయ్యాయి. ఈక్రమంలోనే సొంరగ మార్గం ప్రారంభోత్సవానికి మహూర్తం ఫిక్స్ చేసి.. పెద్ద ఎత్తున ఏర్పాట్లు చేశారు.

ఈ ప్రారంభోత్సవానికి ప్రధాని నరేంద్ర మోదీ ముఖ్య అతిథిగా హాజరు కాబోతున్నట్లు కూడా గతంలోనే ప్రకటించారు. అయితే తాజాగా ఈ ఉదయం 10.45 గంటలకు శ్రీనగర్ వెళ్లిన ప్రధాని మోదీ ఈ జడ్ మోడ్ సొరంగాన్ని ప్రారంభించారు. ఈ కార్యక్రమంలో జమ్ము కశ్మీర్ ముఖ్యమంత్రి ఒమర్ అబ్దుల్లాతో పాటు లెఫ్టినెంట్ గవర్నర్ మనోజ్ సిన్హా, కేంద్రమంత్రి నితిన్ గడ్కరీ కూడా ఉన్నారు. అనంతరం వీరందరూ సొరంగంలోకి వెళ్లి మార్గాన్ని పరిశీలించారు. ప్రాజెక్టు అధికారులతో పాటు నిరతంరం కష్టపడి రహదారిని నిర్మించిన కార్మికులతో మాట్లాడారు. ఆ తర్వాత ప్రధాని మోదీ బహిరంగ సభలో పాల్గొన్నారు.

ఆ సభలో మాట్లాడుతూనే.. సోనామార్గ్‌ ప్రజల మధ్య ఉన్నందుకు చాలా ఆనందంగా ఉందని తెలిపారు. ఈ సొరంగ మార్గం వల్ల రాకపోకలు గణనీయంగా పెరుగుతాయని వివరించారు. అలాగే జమ్ము మరియు కశ్మీర్‌లో పర్యాటకం పెద్ద ఎత్తున అభివృద్ధి చెందుతుందని ఆశాభావం వ్యక్తం చేశారు. ముఖ్యంగా ఏడాది పొడవునా ఎలాంటి సీజన్‌లోనైనా ఈ రహదారి మార్గం ద్వారా లద్దాఖ్‌ను చేరుకోవచ్చని తెలిపారు. జమ్ము కశ్మీర్‌లో గతేడాది సెప్టెంబర్-అక్టోబర్ నెలల్లో అసెంబ్లీ ఎన్నికలు జరిగగా.. ఎన్నికల తర్వాత ప్రధాని నరేంద్ర మోదీ అక్కడికి వెళ్లడం ఇదే తొలిసారి.