హెల్మెట్ లేకపోతే పెట్రోల్ బంద్.. రోడ్డు ప్రమాదాల నివారణకు సర్కార్ సరికొత్త ఆలోచన

రోడ్డు ప్రమాదాలను అరికట్టేందుకు కేంద్ర, రాష్ట్ర ప్రభుత్వాలు.. పలు స్వచ్ఛంద సంస్థలు అనేక చర్యలు చేపడుతూ ఉంటారు. అనేక అవగాహన కార్యక్రమాలు చేపడుతూ ఉంటారు. అయినా కొందరు మాత్రం నిబంధనలు పాటించకుండా రోడ్లపై ప్రయాణించడం వల్ల ప్రమాదాలు జరిగి ప్రాణాలు కోల్పోతున్నారు. అయితే హెల్మెట్ లేకపోవడం వల్ల చనిపోయే వారి సంఖ్య పెరుగుతుండటం.. జరుగుతున్న ప్రమాదాల్లో ఇలాంటి వారే ఎక్కువ ఉండటం ఇప్పుడు తీవ్ర ఆందోళనకరంగా మారింది. అందుకే హెల్మెట్ పెట్టుకోకపోతే ట్రాఫిక్ పోలీసులు భారీగా జరిమానాలు విధిస్తున్నారు. అయినా ట్రాఫిక్ పోలీసులకు తప్పించుకుంటూ హెల్మెట్ పెట్టుకోకుండా వెళ్లే వారి సంఖ్య భారీగానే ఉంది. ఈ నేపథ్యంలోనే ఉత్తర్‌ప్రదేశ్ ప్రభుత్వం సంచలన నిర్ణయం తీసుకుంది. హెల్మెట్ పెట్టుకోని వారికి పెట్రోల్ పోయవద్దని పెట్రోల్ బంక్ యాజమాన్యాలకు ఆదేశాలు జారీ చేస్తున్నారు. హెల్మెట్ ఉన్నవారికి మాత్రమే పెట్రోల్ పోయాలని సూచించారు.

రాష్ట్రంలో ద్విచక్ర వాహనాల ప్రమాదాలను తగ్గించేందుకు ఉత్తర్‌ప్రదేశ్‌ రవాణా శాఖ ఈ "నో హెల్మెట్.. నో పెట్రోల్" అనే కొత్త విధానాన్ని తీసుకువచ్చింది. హెల్మెట్‌ లేకుండా వచ్చిన వారికి పెట్రోల్ పోయవద్దని పెట్రోల్‌ బంక్ నిర్వాహకులకు కఠిన ఆదేశాలు జారీ చేసింది. ఈ మేరకు ఉత్తర్‌ప్రదేశ్‌ రాష్ట్రంలో 75 జిల్లాల కలెక్టర్లకు యూపీ రవాణాశాఖ కమిషనర్‌ బ్రజేష్‌ నారాయణ సింగ్‌ లేఖలు పంపించారు. బైక్ నడిపేవారితోపాటు వెనుక కూర్చున్నవారు సైతం కచ్చితంగా హెల్మెట్‌ ధరించాలని ఆ ఆదేశాల్లో పేర్కొన్నారు. వాహనదారులకు అవగాహన కల్పించేందుకు పెట్రోల్‌ బంకుల ముందు ‘నో హెల్మెట్, నో ఫ్యూయెల్‌’ అనే బోర్డులను ప్రదర్శించాలని సూచించారు.

 బైక్‌పై వెళ్తున్న వారు హెల్మెట్‌ ధరించకపోవడం వల్లే రోడ్డు ప్రమాదాల్లో మృతుల సంఖ్య పెరుగుతోందన్న గణాంకాల విడుదల అయిన వేళ యూపీ సర్కార్ ఈ నిర్ణయం తీసుకుంది. ప్రజల ప్రాణాలు కాపాడటం, రోడ్డు భద్రతను నిర్ధారించడమే రవాణా శాఖ లక్ష్యమని తెలిపింది. అయితే ఇదే నో హెల్మెట్ నో ఫ్యూయెల్ కార్యక్రమాన్ని 2019లోనే ప్రతిష్ఠాత్మకంగా గౌతమ్‌బుద్ధ నగర్‌ జిల్లాలో ప్రవేశపెట్టినా.. అది అమలు చేయడంలో నిర్లక్ష్యం జరిగిందని గుర్తించారు. గతంలో వచ్చిన అనుభవాల నేపథ్యంలోనే తాజాగా ఆదేశాల అమలుపై పర్యవేక్షణ అవసరమని.. ఇందుకోసం అధికారులు తరచూ తనిఖీలు నిర్వహించాలని సూచించారు.

ఉత్తర్‌ప్రదేశ్ వ్యాప్తంగా ద్విచక్ర వాహనాల ప్రమాదాల్లో ఏటా దాదాపు 26 వేల మంది చనిపోతున్నారని ప్రభుత్వం గుర్తించింది. వీరిలో అత్యధిక మంది హెల్మెట్‌ ధరించకపోవడం వల్లే ప్రాణాలు కోల్పోయారని గణాంకాల్లో వెల్లడైంది. ఈ నేపథ్యంలోనే ఇటీవల రవాణాశాఖపై సమీక్ష నిర్వహించిన ఉత్తర్‌ప్రదేశ్ ముఖ్యమంత్రి యోగి ఆదిత్యనాథ్‌.. రోడ్డు ప్రమాదాలను నివారించేందుకు చర్యలు చేపట్టి కఠిన ఆదేశాలు తీసుకోవాలని సూచించారు.