ఎన్నికల వేళ కేజ్రీవాల్‌కు బిగ్ షాక్.. తెరపైకి మళ్లీ ఢిల్లీ లిక్కర్ కేసు

దేశవ్యాప్తంగా ఢిల్లీ మద్యం పాలసీ కేసు ఎంత దుమారం రేపిందో తెలిసిందే. గత 3 ఏళ్లుగా దేశవ్యాప్తంగా వివిధ రాష్ట్రాలకు చెందిన వారిని, వివిధ పార్టీలకు చెందిన వారిని సీబీఐ, ఈడీ అధికారులు అరెస్ట్ చేసి విచారణ జరిపిన సంగతి తెలిసిందే. ఇందులో భాగంగానే ఢిల్లీ ముఖ్యమంత్రిగా ఉన్న సమయంలోనే అరవింద్ కేజ్రీవాల్‌ను అరెస్ట్ చేయడం.. ఆప్ నేతలు, ఢిల్లీ మంత్రులుగా ఉన్న మనీష్ సిసోడియా, సత్యేందర్ జైన్ సహా పలువురు ఎంపీలు, ఎమ్మెల్యేలు అరెస్ట్ చేసిన విషయం తెలిసిందే. ఇక ఈ ఢిల్లీ లిక్కర్ పాలసీ కేసులో అరెస్ట్ అయిన దాదాపు అందరికీ.. బెయిల్ మంజూరు కావడంతో వారంతా జైలు నుంచి బయటికి వచ్చారు.

ఈ నేపథ్యంలోనే తాజాగా ఈ ఢిల్లీ మద్యం కుంభకోణం కేసులో కీలక పరిణామం చోటు చేసుకుంది. ఢిల్లీ మాజీ ముఖ్యమంత్రి, ఆమ్ ఆద్మీ పార్టీ నేషనల్ కన్వీనర్ అరవింద్ కేజ్రీవాల్‌ను విచారణ జరిపేచేందుకు ఈడీకి కేంద్ర హోంశాఖ గ్రీన్ సిగ్నల్ ఇచ్చింది. మరికొన్ని రోజుల్లోనే ఢిల్లీ అసెంబ్లీ ఎన్నికలు జరగనున్న నేపథ్యంలో ఇప్పుడు కేజ్రీవాల్‌పై ఈడీ విచారణకు అనుమతి రావడం.. ఢిల్లీ రాజకీయాల్లో హాట్ టాపిక్‌గా మారింది. ప్రజాప్రతినిధులను విచారణ జరపాలంటే ఈడీ ముందస్తు అనుమతి పొందాలని సుప్రీంకోర్టు గతేడాది నవంబర్‌లో ఆదేశించిన నేపథ్యంలో తాజాగా కేంద్రం నుంచి ఈడీకి అనుమతులు వచ్చాయి.

ఈ క్రమంలోనే అరవింద్ కేజ్రీవాల్‌ను.. ఢిల్లీ మద్యం పాలసీ కుంభకోణం కేసులో విచారణకు అనుమతించాలని కోరుతూ గత నెలలో ఢిల్లీ లెఫ్టినెంట్‌ గవర్నర్‌ వీకే సక్సేనాకు ఈడీ అధికారులు లేఖ రాశారు. దానికి ఎల్జీ వీకే సక్సేనా ఆమోదం తెలపడంతో ఆ విషయాన్ని కేంద్ర హోంశాఖ దృష్టికి ఈడీ తీసుకెళ్లింది. ఆ తర్వాత కేజ్రీవాల్‌ను విచారించేందుకు ఈడీకి కేంద్రం గ్రీన్‌ సిగ్నల్‌ ఇచ్చింది. దీంతో త్వరలోనే కేజ్రీవాల్‌ను ఈడీ అధికారులు విచారించే అవకాశాలు స్పష్టంగా కనిపిస్తున్నాయి.

కొత్త మద్యం పాలసీలో భాగంగా అవకతవకలకు పాల్పడ్డారన్న ఆరోపణలపై 2024 మార్చి 21వ తేదీన అప్పుడు ఢిల్లీ ముఖ్యమంత్రిగా ఉన్న అరవింద్ కేజ్రీవాల్‌ను ఈడీ అధికారులు విచారణ జరిపి అరెస్ట్ చేశారు. ఆ తర్వాత ఇదే వ్యవహారంలో సీబీఐ కూడా కేసు నమోదు చేయగా.. గతేడాది జూన్‌లోనే కేజ్రీవాల్‌ను కస్టడీలోకి తీసుకుంది. దీనిపై కేజ్రీవాల్ సుప్రీంకోర్టును ఆశ్రయించగా.. గత సెప్టెంబరులో బెయిల్‌ మంజూరైంది. ఇక ఆ తర్వాత కొన్ని నెలల పాటు జైలులో ఉండి.. బయటికి వచ్చిన తర్వాత అసెంబ్లీ ఎన్నికలకు ముందు ఢిల్లీ ముఖ్యమంత్రి పదవికి కేజ్రీవాల్ రాజీనామా చేసి.. ఆ బాధ్యతలను అతిశీకి అప్పగించారు. మరోవైపు.. 70 సీట్లు ఉన్న ఢిల్లీ అసెంబ్లీకి ఫిబ్రవరి 5వ తేదీన ఒకేవిడతలో అసెంబ్లీ ఎన్నికల పోలింగ్‌ జరగనుంది. ఫిబ్రవరి 8వ తేదీన కౌంటింగ్ చేపట్టి రిజల్ట్స్ విడుదల చేయనున్నారు.