ఉపాధి కోసం సౌదీ అరేబియా వెళ్లే భారతీయులకు షాక్.. కొత్త రూల్స్

వీసా నిబంధనల్లో మార్పుల తీసుకువస్తూ.. సౌదీ అరేబియా కీలక నిర్ణయం తీసుకుంది. సౌదీ అరేబియాకు వెళ్లి ఉపాధి పొందాలనుకునేవారికి ఆ దేశం కొత్త రూల్స్ పెడుతోంది. తమ దేశానికి వచ్చే వారిని నియంత్రించడంలో భాగంగా వీసా రూల్స్‌ను కఠినతరం చేసింది. దీంతో భారత్ నుంచి అధికంగా సౌదీ అరేబియాకు వెళ్లే వారికి ఇది పెద్ద ఎదురుదెబ్బగా మారింది. సాధారణంగా భారత్‌కు చెందిన స్కిల్డ్ ఉద్యోగులు అమెరికా, కెనడా, ఆస్ట్రేలియా వంటి దేశాలకు ఉద్యోగ, ఉపాధి అవకాశాల కోసం వెళ్తూ ఉంటారు. అయితే అన్ స్కిల్డ్ లేబర్ మాత్రం.. భారత్ నుంచి ఎక్కువగా ఉపాధి కోసం గల్ఫ్ దేశాలకు వెళ్తూ ఉంటారు.

ఇళ్లల్లో పనులు చేయడం, భవన నిర్మాణ పనులు, దగ్గరి నుంచి ఒంటెలను చూసుకోవడం సహా అనేక పనులు చేయడానికి భారత్ నుంచి గల్ఫ్ దేశాలకు వెళ్తూంటారు. ఇవే కాకుండా చాలా ఉద్యోగాలు, పనులు చేసుకునేందుకు సౌదీ అరేబియా దేశానికి వెళ్తున్నారు. అక్కడి దేశాలకు కార్మికులు చాలా అవసరం. అందుకే భారత్ నుంచి ఎంతో మంది కార్మికులు.. ఆ దేశాల అభివృద్ధిలో కీలక పాత్ర పోషిస్తున్నారు. అయితే.. ఇప్పుడు అలా ఉపాధి కోసం వస్తున్న వారికి కొన్ని షరతులు పెట్టాలని సౌదీ అరేబియా ప్రభుత్వం నిర్ణయించుకుంది.

ఇక నుంచి సౌదీ అరేబియా వర్క్ వీసాకు దరఖాస్తు చేసుకోవాలనుకునేవారు తప్పనిసరిగా విద్య, వృత్తి అర్హతలను సంబంధించి ముందస్తుగా వెరిఫికేషన్ పూర్తి చేయించుకోవాల్సి ఉంటుంది. ఫేక్ సర్టిఫికెట్లు సమర్పించి సౌదీ అరేబియాకు వస్తున్న వారి సంఖ్య రోజురోజుకూ పెరుగుతుండటంతో.. ఈ అక్రమాలను అడ్డుకట్ట వేయడానికి ఇలాంటి నిర్ణయం తీసుకున్నట్లుగా సౌదీ అరేబియా ప్రభుత్వవర్గాలు చెబుతున్నాయి. ఇక ఈ కొత్త వీసా నిబంధనలు ఇప్పటికే అమల్లోకి వచ్చాయి. సౌదీ అరేబియాలోని భారత దౌత్య కార్యాలయం ఈ మేరకు అధికారిక ప్రకటన కూడా చేసింది. మరోవైపు.. వర్క్ వీసా జారీ చేసేందుకు తప్పనిసరిగా చేయాల్సిన పనుల్లో.. ప్రొఫెషనల్ వెరిఫికేషన్‌ను కూడా చేర్చినట్లు తెలిపింది.

అయితే ఈ కొత్త నిబంధనలు తీసుకువచ్చేందుకు సౌదీ అరేబియా ప్రభుత్వం.. గత 6 నెలలుగా కసరత్తు చేస్తోంది. సౌదీ అరేబియా ప్రభుత్వం ఈ నిబంధనలు తీసుకురావడానికి వేర్వేరు కారణాలు చెబుతున్నప్పటికీ.. అసలు కారణం మాత్రం భారత్ నుంచి ఉపాధి కోసం భారీగా వచ్చేవారిని నియంత్రించడం అనే అనుమానాలు వ్యక్తం అవుతున్నాయి. ఈ కొత్త విధానం ప్రకారం.. వర్క్ వీసాలతో దరఖాస్తు చేసుకున్న వారి సర్టిఫికెట్లను తామే జారీ చేసినట్లు సదరు సంస్థలు ధృవీకరించాల్సి ఉంటుంది.

ఇక సౌదీ అరేబియాలో అత్యధికంగా ఉపాధి పొందుతున్న విదేశీయుల్లో భారతీయలు రెండో స్థానంలో ఉన్నారు. సౌదీ అరేబియాలో 24 లక్షల మందికిపైగా భారతీయులు ఉపాధి పొందుతున్నట్లు గణాంకాలు చెబుతున్నాయి. వీరిలో 8 లక్షల మంది ఇళ్లల్లో పని చేస్తున్నారు. భారత్ కంటే అధికంగా బంగ్లాదేశ్ వాసులు.. సౌదీ అరేబియాలో ఎక్కువ మంది ఉన్నారు. సౌదీ అరేబియాలో 27 లక్షల మంది బంగ్లాదేశీయులు ఉపాధి పొందుతున్నారు.