మూడ్రోజుల్లోనే కూతురి పెళ్లి.. కన్యాదానం చేయాల్సిందిపోయి కాల్చి కాటికి పంపాడు

కుల, మత, ప్రాంత బేధాలను మర్చి అనేక మంది ప్రపంచ వ్యాప్తంగా తిరుగుతూ.. అందరితోనూ స్నేహం చేస్తున్నారు. కేవలం స్నేహమే కాదండోయ్.. తమకు నచ్చితే విదేశీయులను సైతం పెళ్లిళ్లు చేసుకుంటున్నారు. అలాంటి ఈ సమాజంలోనే ఇతర కులానికి చెందిన వాళ్లను ప్రేమించి, పెళ్లి చేసుకుంటామంటే హత్య చేసే తల్లిదండ్రులు కూడా ఉన్నారు. ఇలాంటి పనే చేశాడో మధ్య ప్రదేశ్‌కు చెందిన తండ్రి. మూడ్రోజుల్లో కూతురు పెళ్లి ఉండగా కన్యాదానం చేయాల్సిందిపోయి అందరి ఎదుటే ఆమెను కాల్చి కాటికి పంపాడు. ఈ దారుణ ఘటన ఎలా జరిగిందో మనం ఇప్పుడు తెలుసుకుందాం.

మధ్య ప్రదేశ్‌లోని గ్వాలియర్ ప్రాంతానికి చెందిన మహేష్ గుర్జర్ ఓ దాబాను నడుపుతూ జీవిస్తున్నాడు. అయితే అతడికి 20 ఏళ్ల కుమార్తె తనూ గుర్జర్ ఉంది. ఇటీవలే కూతురును ఓ అయ్య చేతిలో పెడితే తన భారం తీరుతుందనుకున్న అతడు ఆమెకు పెళ్లి నిశ్చయించాడు. ఈనెల 18వ తేదీనే పెళ్లికి ముహూర్తం కూడా పెట్టించాడు. అయితే కూతురు తనూ గుర్జర్‌కు ఈ పెళ్లి ఏమాత్రం ఇష్టం లేదు. ఎందుకంటే తనూ గుర్జర్ ఆగ్రాకు చెందిన భికం అలియాస్ విక్కీ మావైను ప్రేమించింది. ఆరేళ్లుగా అతడితో ప్రేమాయణం సాగిస్తున్న ఆమె.. అతడినే పెళ్లి చేసుకుంటానని వివరించింది.

కానీ ఇద్దరివీ వేర్వేరు కులాలు కావడంతో.. మహేశ్ గుర్జర్ కూతురు ప్రేమ పెళ్లికి ఒప్పుకోలేదు. అయితే తనూ గుర్జర్ మాత్రం కచ్చితంగా అతడినే పెళ్లి చేసుకుంటానని పట్టుబట్టింది. దీంతో తీవ్ర ఆగ్రహానికి గురైన తండ్రి ఆమెను ఓ గదిలో బంధించాడు. అప్పటి నుంచి ఆమెను కొడుతూ, తిడుతూ.. ఆమె మనసు మార్చే ప్రయత్నం చేశాడు. ఈక్రమంలోనే తనూ గుర్జర్ ఓసారి ఇంటి నుంచి తప్పించుకుని బయట పడింది. సోషల్ మీడియా ద్వారా తన సమస్యను వవరించి.. తనకు ప్రాణ హాని కూడా ఉందని చెప్పింది. ఈ వీడియో సోషల్ మీడియాలో వైరల్ కావడంతో.. పోలీసులు ఎంట్రీ ఇచ్చారు.

మేజర్ అయిన తనూ గుర్జర్ ఇష్టానికి వ్యతిరేకంగా ఏమీ చేయకూడదని పోలీసులు చెప్పారు. ఈక్రమంలోనే గ్రామస్థులు అంతా వచ్చి పంచాయితీ పెట్టారు. అందరూ ఆమెకు నచ్చని పెళ్లి చేయొద్దని తండ్రి మహేశ్ గుర్జర్‌కు వివరించారు. కానీ అతడు మాత్రం తన కూతురు మనసు మారుస్తానని.. తనూను తన వెంటే పంపమని కోరాడు. అందుకు తనూ నిరాకరించింది. తనను మరెక్కడైనా ఉంచాలని పోలీసులను కోరింది. ఈక్రమంలోనే తండ్రి ఓ పది నిమిషాలు మాత్రమే కూతురుతో ప్రైవేటుగా మాట్లాడాతనని అన్నాడు. సరే అని పెద్దలంతా చెప్పగా ఆమెను తీసుకుని పక్కకు వెళ్లాడు.

తన వెంట తెచ్చుకున్న తుపాకీని తీసి కూతురు తనూ గుర్జర్‌ను కాల్చేశాడు. అలాగే ఆ పక్కనే ఉన్న తనూ కజిన్ రాహుల్ కూడా కాల్పులకు పాల్పడ్డాడు. మొత్తం మూడు బుల్లెట్లు ఆమె శరీరంలోకి దూసుకెళ్లాయి. ఈ విషయాన్ని అర్థం చేసుకునేలోపే రాహుల్ పారిపోయాడు. కానీ మహేష్ మాత్రం అక్కడే ఉన్నాడు. వెంటనే పోలీసులు అతడిని అరెస్ట్ చేసి తనూ గుర్జర్ మృతదేహాన్ని పోస్టుమార్టం నిమిత్తం స్థానిక ప్రభుత్వ ఆస్పత్రికి తరలిచారు. ప్రస్తుతం రాహుల్‌ని వెతికే పనిలో పడ్డారు. గ్రామ పెద్దలతో పాటు పోలీసుల మధ్యే ఇంత దారుణం జరిగేసరికి అంతా షాక్ అవుతున్నారు. కాసేపు మాట్లాడతానని చెప్పి కాల్చి చంపడాన్ని ఏమాత్రం జీర్ణించుకోలేక కన్నీరు పెడుతున్నారు.