కుంభమేళా పుణ్యస్నానం తర్వాత మెరుగుపడ్డ స్టీవ్ జాబ్స్ సతీమణి ఆరోగ్యం

ప్రపంచ వ్యాప్తంగా కోట్లాది మంది హాజరయ్యే మహా కుంభమేళా గురించి అందరికీ తెలిసిందే. ఉత్తర ప్రదేశ్‌లోని ప్రయాగ్‌రాజ్‌లో జరిగే ఈ కుంభమేళాలో అనేక కోట్ల మంది పుణ్య స్నానాలు ఆచరిస్తారు. దీని వల్ల అనేక లాభాలు కల్గుతాయని చాలా మంది మాటల్లో వివరించినా.. ఈ సంఘటన మాత్రం అదే నిజమని ప్రూవ్ చేసింది. ముఖ్యంగా పుణ్య స్నానానికి ముందు అస్వస్థతకు గురైన ఓ విదేశీ మహిళ.. స్నానం ఆచరించిన తర్వాత పూర్తి ఆరోగ్యంగా మారినట్లు సమాచారం. ఆ విదేశీ మహిళ ఎవరు ఆ కథేంటో మనం ఇప్పుడు తెలుసుకుందాం.

ఉత్తర ప్రదేశ్‌లోని ప్రయాగ్‌రాజ్‌లో జరుగుతున్న మహా కుంభ మేళాకు దేశ ప్రజలతో పాటు అనేక మంది విదేశీయులు కూడా హాజరు అవుతున్నారు. వీరిలాగే పుణ్య స్నానం ఆచరించేందుకు.. యాపిల్ కంపెనీ సహ వ్యవస్థాపకుడు దివంగత స్టీవ్ జాబ్స్ సతీమణి లారీన్ పావెల్ జాబ్స్ వచ్చారు. ఈ విషయం మనం అందరికీ తెలిసిందే. అయితే ప్రయాగ్‌రాజ్‌కు చేరుకున్న మొదటి రోజునే లారీన్ వెంటనే పలు పూజా కార్యక్రమాల్లో పాల్గొన్నారు. మహా కుంభమేళా విజయవంతం కావాలని ఆ భగవంతుడిని ప్రార్థించినట్లు కూడా చెప్పారు.

అయితే ఎక్కువగా జనాలు ఉండడం, వాతావరణ మార్పల వల్ల లారీన్.. జనవరి 14వ తేదీ అంటే మకర సంక్రాంతి రోజు అనారోగ్యానికి గురయ్యారు. ఈ విషయాన్ని నేరుగా నిరంజనీ ఆఖాడాకు చెందిన మహా మండలేశ్వర్ స్వామి కైలాసానంద గిరి మహారాజ్ తెలిపారు. ఆమె ఆరోగ్యం కుదుట పడేవరకు.. తాము ఏర్పాటు చేసిన శిబిరంలోనే ఉంటుందని చెప్పారు. అంతేకాకుండా ఆమెకు వైద్య సేవలు అందిస్తున్నట్లు కూడా వెల్లడించారు. ఆమె ఆరోగ్యం కుదుట పడ్డాకే త్రివేణి సంగమంలో పవిత్ర స్నానం ఆచరిస్తారని వెల్లడించారు.

కానీ లారీన్ పావెల్ జాబ్స్ ఆరోగ్యంలో ఎలాంటి మార్పు రాలేదు. అయినప్పటికీ ఆమెకు దేవుడిపై ఉన్న నమ్మకంతో.. అనారోగ్య సమస్యలతోనే పుణ్య స్నానం ఆచరించేందుకు బయలుదేరారు. మనసారా దేవుడికి ప్రార్థన చేసుకుని.. గంగ స్నానం చేశారు. అయితే స్నానం చేసి బయటకు వచ్చిన వెంటనే ఆమె ఆరోగ్యం పూర్తిగా కుదిటపడిందట.

అప్పటి వరకు చాలా నీరసంగా ఉన్న లారీన్.. స్నానం తర్వాత చాలా ఉత్సాహంగా మారినట్లు ఉత్తర ప్రదేశ్ సర్కారు వెల్లడించింది. ప్రస్తుతం ఆమె చాలా ఆరోగ్యంగా ఉన్నట్లు స్పష్టం చేసింది. ఈ వార్త తెలుసుకున్న ప్రతీ ఒక్కరూ.. పుణ్య స్నానం ఆచరిస్తే కలిగే లాభాల గురించి వివరిస్తున్నారు. అన్ని ఉపయోగాలు ఉన్నాయి కాబట్టే కోట్లాది మంది అక్కడకు వెళ్తున్నట్లు చెప్పుకొస్తున్నారు.

ఇదంతా ఇలా ఉండగా.. జనవరి 10వ తేదీనే లారీన్ పావెల్ జాబ్స్ తన పేరును కమలగా మార్చుకున్నారు. అయితే ఆమెకు ఈ పేరు పెట్టింది ఆమె గురువు నిరంజనీ ఆఖాడాకు చెందిన మహా మండలేశ్వర్ స్వామి కైలాసానంద గిరి మహారాజ్. లారీన్ ప్రయాగ్ రాజ్ రావడం ఇదే తొలిసారి కాదు. గతంలో కూడా మెడిటేషన్ చేసేందుకు కైలాసానంద గిరి మహారాజ్ ఆశ్రమానికి వచ్చారు.